អាម៉េរិក និងកូរ៉េខាងជើងព្រមានជាច្រើនខែមកហើយថា ក្រុងព្យុងយ៉ាងកំពុងត្រៀមតេស្តនុយក្លេអ៊ែរលើកទី៧ ដែលខកខានសាកល្បងតាំងពីឆ្នាំ២០១៧។ មិនទាន់សាកល្បងនុយក្លេអ៊ែរ កូរ៉េខាងជើងនៅឆ្នាំនេះបាញ់មីស៊ីលសាកល្បងមិនតិចជាង៤០ដងនោះទេដែលមានទាំងមីស៊ីលរយៈចម្ងាយខ្លី រយៈចម្ងាយមធ្យម រយៈចម្ងាយឆ្ងាយ ក៏ដូចជាមីស៊ីលបាលីស្ទីកអន្តរទ្វីបជាដើម។

ក្រសួងការពារជាតិអាម៉េរិកនៅថ្ងៃទី​២៧ ខែតុលា ក្នុងយុទ្ធសាស្រ្តការពារជាតិថ្មីសរសេរថា គ្មានសេណារីយ៉ូណាដែលរបបមេដឹកនាំកូរ៉េខាងជើង លោក គីម ជុងអ៊ុនអាចប្រើអាវុធនុយក្លេអ៊ែរ ហើយបន្តដឹកនាំរបបនេះទៀតទេ។ បន្ថែមពីលើនេះ ក្រុងវ៉ាស៊ីនតោននឹងឱ្យក្រុងព្យុងយ៉ាងទទួលខុសត្រូវចំពោះការផ្ទេរអាវុធនុយក្លេអ៊ែរ ឬបច្ចេកវិទ្យា​ និងសម្ភារៈពាក់ព័ន្ធទៅឱ្យប្រទេសផ្សេងទៀត។

ការវាយប្រហារនុយក្លេអ៊ែរណាមួយដោយកូរ៉េខាងជើងប្រឆាំងអាម៉េរិក ឬសម្ព័ន្ធមិត្ត និងដៃគូគឺជារឿងមិនអាចទទួលយកបាន ហើយនឹងនាំឱ្យរបបនេះឈានដល់ទីបញ្ចប់»។ យុទ្ធសាស្រ្តការពារជាតិរបស់អាម៉េរិកបញ្ជាក់បែបនេះ។

នៅថ្ងៃដដែល អ្នកនាំពាក្យក្រុមប្រឹក្សាសន្តិសុខជាតិសេតវិមាន លោក John Kirby លើកឡើងថា មេដឹកនាំកូរ៉េខាងជើងប្រហែលត្រៀមខ្លួនដើម្បីតេស្តនុយក្លេអ៊ែរនៅពេលណាក៏បាន។ បើតាមលោក Kirby ខណៈបន្តត្រៀមខ្លួនសម្រាប់គ្រប់កាលៈទេសៈដែលអាចកើតមានឡើង  អាម៉េរិកប្តេជ្ញាចាំចរចាជាមួយកូរ៉េខាងជើងជានិច្ច។​

ប៉ុន្តែម្តងទៀត ខ្ញុំចង់សង្កត់ធ្ងន់ថា ពួកយើងសុខចិត្តចូលតុចរចាដោយគ្មានលក្ខខណ្ឌ ហើយគ្មានហេតុផលអ្វីដែលការតេស្ត(នុយក្លេអ៊ែរ)កើតឡើងម្តងទៀតនោះទេ»។ លោក Kirby លើកឡើងបែបនេះដោយបញ្ជាក់ថា ដោយសារតែលោក គីម មិនបានបង្ហាញតម្រុយចង់ចរចា អាម៉េរិកត្រូវតែធ្វើអ្វីដើម្បីប្រាកដថាអាចការពារខ្លួន និងសម្ព័ន្ធមិត្ត។