កិច្ចប្រជុំថ្នាក់ដឹកនាំអាស៊ាន-ចិនលើកទី២៥ ត្រូវបានរៀបចំឡើងនៅទីក្រុងភ្នំពេញថ្ងៃទី១១ ខែវិច្ឆិកាក្រោមការដឹកនាំរបស់ប្រធានផ្លាស់វេនអាស៊ានកម្ពុជា។ 

 

អំឡុងជំនួបជាមួយមេដឹកនាំអាស៊ានទាំង១០ លើកលែងមីយ៉ាន់ម៉ា នាយករដ្ឋមន្រ្តីចិន លី ខឹឈាំង លើកឡើងថា ចិន និងអាស៊ានគឺជាដៃគូយុទ្ធសាស្រ្តគ្រប់ជ្រុងជ្រោយដែលមានអនាគតរួមគ្នា ហើយបានឈរជាមួយគ្នាគ្រប់កាលៈទេសៈ ទោះស្ថានភាពក្នុងតំបន់ និងអន្តរជាតិកំពុងផ្លាស់ប្តូរយ៉ាងខ្លាំងក៏ដោយ។

 

«ការជ្រើសរើសភាគីណាមួយមិនមែនជាជម្រើសរបស់យើងទេ។ ភាពបើកចំហ និងកិច្ចសហប្រតិបត្តិការគឺជាមធ្យោបាយដើម្បីសម្រេចការដោះស្រាយបញ្ហាប្រឈមរួមរបស់យើង»។ លោក លី បញ្ជាក់បែបនេះដោយសង្កត់ធ្ងន់ថា ចិននឹងបន្តយកអាស៊ានជាអាទិភាពខ្ពស់ក្នុងទំនាក់ទំនងការទូតតំបន់របស់ខ្លួន ហើយនឹងគាំទ្រដល់ការកសាងសហគមន៍អាស៊ាន ព្រមទាំងមជ្ឈភាពអាស៊ានក្នុងកិច្ចសហប្រតិបត្តិការអាស៊ីបូព៌ា។

 

នាយករដ្ឋមន្រ្តីចិនរូបនេះ បន្តថា ចិនត្រៀមខ្លួនជាស្រេចក្នុងការធ្វើការជាមួយអង្គការថ្នាក់តំបន់មួយនេះដើម្បីបន្តផ្តោតលើការអភិវឌ្ឍ និងកិច្ចសហប្រតិបត្តិការ ហើយកសាងសហគមន៍ចិន-អាស៊ានឱ្យកាន់តែជិតស្និទ្ធជាមួយអនាគតរួមគ្នា។ លើសពីនេះ លោក លី ស្នើឱ្យភាគីទាំងពីរចាំបាច់ត្រូវបង្កើតការឯកភាពគ្នាឱ្យមាំទាំជាងនេះលើកិច្ចសហប្រតិបត្តិការអភិវឌ្ឍរួមមានពាណិជ្ជកម្ម និងនយោបាយជាដើម។ 

 

ទាក់ទងនឹងបញ្ហាសមុទ្រចិនខាងត្បូងវិញ លោកបញ្ជាក់ថា ចិនត្រៀមជាស្រេចធ្វើការជាមួយរដ្ឋអាស៊ានក្នុងការដោះស្រាយបញ្ហានេះដោយផ្អែកលើច្បាប់អន្តរជាតិ និងការគោរពគ្នាទៅវិញទៅមក។ លោក លី ក៏បានកោតសរសើរពីការវិវឌ្ឍដោយវិជ្ជមាននៃកិច្ចពិភាក្សាលើក្រមប្រតិបត្តិសមុទ្រចិនខាងត្បូង (COC) ដែលជាយន្តការដោះស្រាយជម្លោះរវាងចិន និងបណ្តារដ្ឋអាស៊ានមួយចំនួនផងដែរ។

 

សូមបញ្ជាក់ថា ទំនាក់ទំនងរវាងចិន និងអាស៊ានបានដំឡើងទៅជាភាពជាដៃគូយុទ្ធសាស្រ្តគ្រប់ជ្រុងជ្រោយជាផ្លូវការនៅឆ្នាំ២០២១ នៅថ្ងៃបើកកិច្ចប្រជុំពិសេសរំឭកខួបលើកទី៣០នៃទំនាក់ទំនងកិច្ចសន្ទនាចិន-អាស៊ាន។

 

បន្ថែមពីលើនេះ ១៣ឆ្នាំជាប់គ្នាមកនេះ ចិននៅតែជាដៃគូពាណិជ្ជកម្មដ៏ធំបំផុតរបស់អាស៊ានដែលឈានដល់ ៥៤៤,៩ ពាន់លានដុល្លារក្នុង៧ខែដំបូងនៃឆ្នាំ២០២២។ ចិន និងអាស៊ាននៅឆ្នាំ២០០២បានចុះហត្ថលេខាលើកិច្ចព្រមព្រៀងក្រមខណ្ឌលើកិច្ចសហប្រតិបត្តិការសេដ្ឋកិច្ចគ្រប់ជ្រុងជ្រោយ ហើយនាំឱ្យមានការបង្កើតតំបន់ពាណិជ្ជកម្មសេរីចិន-អាស៊ាននៅឆ្នាំ២០១០ ដែលផ្តោតលើលំហូរទំនិញ សេវាកម្ម និងការវិនិយោគដោយសេរី៕