ជាកូនទី៣ ក្នុងចំណោមបងប្អូន៦នាក់ រចំ ប្លី មានឪពុកម្ដាយ ជាកសិករដាំដំឡូង រស់នៅ ភូមិជ្រុង ឃុំកក់ ស្រុកបរកែវ ខេត្តរតនគិរី។ ក្នុងចំណោមសាច់ញាតិគ្រួសាររបស់ រចំ ប្លី ពុំមាននរណាម្នាក់បានរៀនរហូតដល់ថ្នាក់ឧត្តមសិក្សាឡើយ ដោយមានតែបងប្រុសទីពីររបស់នាងម្នាក់ប៉ុណ្ណោះដែលរៀនបានខ្ពស់ជាងគេ គឺត្រឹមថ្នាក់ទី១២។

 

ក្ដីស្រមៃ របស់យុវតីជនជាតិដើមភាគតិចរូបនេះ មិនបានបញ្ចប់ត្រឹមថ្នាក់ទី១២ឡើយ គឺរូបនាងចង់បន្តរៀនឱ្យចប់ដល់ថ្នាក់មហាវិទ្យាល័យ ដើម្បីជាគំរូ និងចង់ជួយស្រោចស្រង់ដល់ប្អូនៗរបស់នាងឱ្យរៀនចប់ដូចគ្នាដែរ។ រចំ ប្លី រៀបរាប់ដូច្នេះ៖ «បំណងខ្ញុំចង់ឱ្យរៀនឱ្យចប់ ទោះលំបាកក៏ដោយខំប្រឹងមិនបោះបង់ត្រឹមហ្នឹងទេព្រោះខំស៊ូយូរហើយ»។ 

ជាប់បាក់ឌុប តែខ្វះលទ្ធភាព
រចំ ប្លី បានប្រឡងជាប់និទ្ទេសC មកពីវិទ្យាល័យបរកែវ លើមុខវិជ្ជាវិទ្យាសាស្រ្ត។ ចំពោះលទ្ធផលវិញ រចំ ប្លី ទទួលបាននិទ្ទេសA លើមុខវិជ្ជា រូប

ជីវវិទ្យា ឯភាសាខ្មែរ បាននិទ្ទេស B  ប្រវត្តិ Cនិងគណិត គីមី ភាសាបរទេស បាន F ។ ទោះលទ្ធផលមិនល្អឥតខ្ចោះ តែនេះជាមោទកភាព សម្រាប់យុវតី រចំ ប្លី  និងគ្រួសារ គាប់ចិត្ត នឹងលទ្ធផលដែលនាងខិតខំប្រឹងប្រែងរៀនសូត្រកន្លងមក។ ​

 

ក្រោយលទ្ធផលបាក់ឌុប ត្រូវបានប្រកាស រំលងបានបួនថ្ងៃ រចំ ប្លី ក៏ទទួលដំណឹងល្អមួយទៀត គឺរូបនាង បានជាប់អាហារូបករណ៍ជំនាញរូបវិទ្យា ពីសកលវិទ្យាល័យភូមិន្ទភ្នំពេញ។ អំឡុងពេលសិក្សា រចំ ប្លី បានដាក់អាហារូបករណ៍តាមរយៈក្រសួងអប់រំ លើជំនាញរូបវិទ្យា​ ព្រោះបំណងអនាគតក្មេងស្រីជនបទរូបនេះ ចង់ក្លាយជាគ្រូបង្រៀនវិទ្យាល័យ។  

 

ត្រេកអរផង បារម្ភផង! រចំ ប្លីរីករាយខ្លាំងណាស់ដែលខ្លួនមានឱកាសទទួលបានអាហាររូបករណ៍១០០ភាគរយ តែក្នុងអារម្មណ៍ត្រេកអរនោះ ក៏មានអារម្មណ៍សៅហ្មងលាយឡំគ្នាដែរ

ព្រោះរូបនាងមិនទាន់ច្បាស់ថា អាចមានឱកាសបន្តការសិក្សានៅភ្នំពេញឬអត់។ «ខ្ញុំអត់ទាន់ច្បាស់ចាំសួរម៉ែពុកឱ្យពួកគាត់សម្រេចសិន។ ណាមួយខ្វះលទ្ធភាពផង »។

នេះជាការអះអាងរបស់យុវតី រចំ ប្លី។

 

តាមពិតទៅឪពុកម្ដាយរបស់ រចំ ប្លី ជាអ្នកស្រលាញ់ការសិក្សានិងចង់បញ្ចូនកូនឱ្យរៀនបានខ្ពង់ខ្ពស់។ ប៉ុន្តែសេដ្ឋកិច្ចគ្រួសារជាកត្តារាំងស្ទុះធំបំផុត ដែលធ្វើឱ្យគ្រួសាររបស់ រចំ ប្លី ស្ទះស្ទើរ

ក្នុងការបញ្ចូនកូនស្រី​ឱ្យរៀននៅភ្នំពេញ។ បើតាមយុវតីជនជាតិដើមភាគតិចចារ៉ាយរូបនេះទោះបីជាខ្លួនទទួលបានអាហារូបករណ៍ អាចសម្រាលបន្ទុកមួយផ្នែកក្ដីប៉ុន្តែគ្រួសារនាងក៏នៅតែខ្វះលទ្ធភាព ដោយសារឆ្ងាយពីផ្ទះ ហើយថ្លៃចាយនិងស្នាក់នៅត្រូវចំណាយច្រើន។«បើខ្ញុំមិនបានរៀន ខ្ញុំស្ដាយអាហារូបករណ៍ តែគ្រួសារក៏

គាត់ពិបាក យើងគ្មានលទ្ធភាព ត្រូវចំណាយច្រើន ទាំងថ្លៃស្នាក់ ថ្លៃចាយច្រើនទៀត»។ 

 

ទោះបីមិនសូវរំពឹងថា ខ្លួនអាចមានឱកាសចាប់យកអាហារូបករណ៍ ដែលកំពុងហុចមកតែ រចំ ប្លី នៅតែមានសង្ឃឹមថា ខ្លួននឹងអាចស្វែងរក អង្គការណាមួយផ្ដល់អាហារូបករណ៍លើការស្នាក់នៅឬជំនួយខ្លះៗ ដើម្បីឱ្យនាងអាចមានលទ្ធភាពបន្តការសិក្សានៅភ្នំពេញបាន។ 

 

សម្រាប់ រចំ ប្លី ប្រសិនជារូបនាងខកខានឱកាសបន្តការសិក្សានៅឆ្នាំនេះតែនាងមិនបោះបង់ចោលក្ដីស្រមៃឡើយ ដោយយុវតីរូបនេះ នឹងធ្វើការងារមួយឆ្នាំសិនទើបបន្តការសិក្សាឆ្នាំក្រោយ។ យុវតីវ័យ២០ឆ្នាំរូបនេះ បានតាំងចិត្តបែបនេះថា៖«ខ្ញុំមិនបោះបង់ទេ។បើសិនខ្ញុំឈប់រៀនត្រឹមហ្នឹង យើងនឹងអត់ឱកាស។ បើយើងរៀនបានខ្ពស់យើងនឹងមានលទ្ធភាពធ្វើការល្អ។ ម៉្យាងបើយើងអត់រៀនបានចប់ យើងមិនអាចជួយគ្រួសារបានច្រើន

ជីវភាពនៅតែលំបាក»៕