ជាតិ
រដ្ឋបាលខេត្តកណ្តាល ហាមពលរដ្ឋលេងគប់ទឹក និងម្សៅ នៅបុណ្យចូលឆ្នាំខ្មែរ លោក គង់ សោភ័ណ្ឌ អភិបាលខេត្តកណ្តាល។ រូបភាពពី រដ្ឋបាលខេត្តកណ្តាល.PNG
×
ដោយ៖ សែម ប្រាក់ដាវ
ភ្នំពេញ៖ រដ្ឋបាលខេត្តកណ្តាល មិនអនុញ្ញតឱ្យលេងគប់ទឹក បាញ់ទឹក លេងម្សៅ និងល្បែងណាដែលប៉ះពាល់ដល់សន្តិសុខសណ្ដាប់ធ្នាប់ទេ។ រដ្ឋបាលកណ្តាល អំពាវនាវដល់ពលរដ្ឋទាំងអស់ ត្រូវគោរពច្បាប់ចរាចរណ៍ និងប្រុងប្រយ័ត្នចំពោះគ្រោះអគ្គិភ័យ ដើម្បីរក្សាសន្តិសុខ សុវត្ថិភាព នាពេលចូលឆ្នាំខ្មែរ។
យោងតាមសេចក្ដីជូនដំណឹងរបស់រដ្ឋបាលខេត្តកណ្តាល ក៏បានហាមមិនឱ្យលេងបាញ់ទឹក ជះទឹក គប់ស្បោងទឹក លាបធ្យូង ប៉ាតម្សៅ ទះគក់ដោយដៃ ឬវាយដោយរំពាត់ដល់អ្នកដំណើរ និងបង្ហោះម៉ូតូប្រដេញគ្នានៅតាមផ្លូវ ដែលអាចបង្កគ្រោះថ្នាក់ជាយថាហេតុ។ ជាមួយគ្នានេះ រដ្ឋបាលកណ្តាល លើកទឹកចិត្តឱ្យពលរដ្ឋខ្មែរចូលរួមលេងល្បែងប្រជាប្រិយខ្មែរគ្រប់ប្រភេទ។
រដ្ឋបាលខេត្តកណ្តាល ក៏អំពាវនាវពលរដ្ឋត្រូវយកចិត្តទុកដាក់ក្នុងការថែរក្សាសុខភាព និងប្រុងប្រយ័ត្នចំពោះករណីអគ្គិភ័យ និងត្រូវអនុវត្តតាមវិធានការ ៣កុំ ៣ការពារ ដើម្បីចៀសវាងការឆ្លងជំងឺរាតត្បាតផ្សេងៗ។ក្រៅពីនេះ អាជ្ញាធរ។
សូមបញ្ជាក់ដែរ រដ្ឋបាលខេត្តកណ្តាល ក៏បានរៀបចំសង្រ្កាន្តខេត្តកណ្តាល នៅភ្នំព្រះរាជទ្រព្យ ក្នុងសុ្រកពញាឮ។ ក្នុងកម្មវិធីសង្រ្កាន្ត ក៏មានកម្មវិធីលែ្បងប្រជាបិ្រយ ការដាក់តាំងបង្ហាញសមិទ្ធផលរបស់ខេត្ត, ការតាំងពិព័រណ៍, ប្រគំតន្រ្តីសម័យខ្នាតធំ, តន្រី្តស្គរដី, រត់ប្រណាំង, ការប្រណាំងកង់ប្រពៃណី,ការទាញព្រ័ត្រ, បង្ហោះគោម និងបាញ់កាំជ្រួច។ ព្រឹត្តិការណ៍សង្រ្កាន្តនេះ មានរយៈពេល៣ថ្ងៃ ចាប់ពីថ្ងៃទី១៤ ដល់ទី១៦ ខែមេសា ដើម្បីអបអរពិធីបុណ្យចូលឆ្នាំថ្មីប្រពៃណីជាតិខ្មែរ និងបង្កភាពរីករាយជូនពលរដ្ឋក្នុងខេត្ត៕
© រក្សាសិទ្ធិដោយ thmeythmey.com