ទាក់ទងនឹងករណីរំដោះនេះ លោក មាស ច័ន្ទពិសិដ្ឋ ព្រះរាជអាជ្ញាអយ្យការអមសាលាដំបូងខេត្តសៀមរាប ស្នើឱ្យពលរដ្ឋជឿជាក់លើសមត្ថកិច្ច ក្នុងការបង្ក្រាបក្រុមជនល្មើសទាំងនោះ។ ថ្លែងក្នុងទិវាជាតិប្រយុទ្ធប្រឆាំងគ្រឿងញៀន នៅខេត្តសៀមរាប នាព្រឹកថ្ងៃទី១៨ សីហា ឆ្នាំ២០២៣ លោក ច័ន្ទពិសិដ្ឋ បានបញ្ជាក់ថា៖«សូមអស់លោកលោកស្រី ជឿលើកម្លាំងសមត្ថកិច្ច យើងពិតជាមិនឱ្យរួចពីសំណាញ់ច្បាប់បានទេ។ ហើយសូមបញ្ជាក់ថា ប្រតិបត្តិការរបស់យើងមានតម្រុយខ្លះហើយ ហើយយើងនឹងឈានដល់ការបង្រ្កាបជាបន្តបន្ទាប់ ហើយប្រហែលជាបន្ដិចទៀតនឹងបានដឹងព័ត៌មានទាំងអស់គ្នានេះហើយ អ៊ីចឹងសូមកុំមានការព្រួយបារម្ភ ដូច្នេះការជួញដូរគ្រឿងញៀនមិនអាចរួចពីសំណាញ់ច្បាប់បានទេ»។
 

កាលពីថ្ងៃទី១៧ សីហា ក្រុមខ្មាន់កាំភ្លើង បានបិទមុខជិតនិងប្រដាប់ដោយអាវុធ បានចូលមករំដោះជនជាតិចិនក្នុងពេទ្យធ្មេញមួយ ស្ថិតនៅតាមបណ្ដោយផ្លូវជាតិលេខ៦ នាភូមិតាភុល សង្កាត់ស្វាយដង្គំ។ ក្រោយមករថយន្តដែលរំដោះនោះ ត្រូវបានសមត្ថកិច្ចប្រទះឃើញទុកចោល លើដីទំនេរមួយនៅភូមិគ្រួស សង្កាត់ស្វាយដង្គំ និងមានវត្ថុតាងមួយចំនួន ដូចជាអាវុធ ខោអាវ និងរបាំងមុខ ជាដើម។ អ្នកទោសជនជាតិចិនដែលបានរំដោះគេចខ្លួននោះ កំពុងអនុវត្តន៍ទោសចំនួន៥២ឆ្នាំ ពីបទជួញដូរគ្រឿងញៀន និងត្រូវបានសមត្ថកិច្ចចាប់ខ្លួនបាននៅថ្ងៃទី១១ សីហា ឆ្នាំ២០០៩។