លោកឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ កាលពីថ្ងៃទី២៨ ខែសីហា បានទទួលជួបឯកអគ្គរាជទូតតែងតាំងថ្មីទាំង៧រូប នៅទីស្តីការក្រសួង មុនពេលមន្ត្រីទាំងនោះ ចេញទៅបំពេញបេសកកម្មនៅបណ្តាប្រទេសគោលដៅរៀងៗខ្លួន។
ជាមួយនឹងការផ្តាំផ្ញើឱ្យខិតខំបំពេញការងារប្រកបដោយការទទួលខុសត្រូវខ្ពស់ លោក សុខ ចិន្តាសោភា ដែលទើបកាន់តំណែងបានជាងមួយសប្តាហ៍ បានផ្តល់អនុសាសន៍ណែនាំដល់ទូតទាំងអស់ខិតខំជំរុញ កិច្ចការការទូតសេដ្ឋកិច្ច ការទូតម្ហូបអាហារ ការទូតកីឡា និងការទូតសិល្បៈ។
បើតាមរដ្ឋមន្ត្រីការបរទេស ទាំងនេះ ជាវិស័យអាទិភាពចម្បងនៃការងារការបរទេសក្នុងអាណត្តិរាជរដ្ឋាភិបាលថ្មី ហើយក៏ជាផ្នែកមួយក្នុងការផ្សព្វផ្សាយអំពីសក្តានុពលសេដ្ឋកិច្ច ទេសចរណ៍ និងវប្បធម៌កម្ពុជាទៅកាន់ពិភពលោក ព្រមទាំងពង្រឹងទំនាក់ទំនងរវាងកម្ពុជាជាមួយប្រទេសនានា។
ជាមួយគ្នានេះ លោកសន្យាខិតខំធ្វើយ៉ាងណានឹងជួយស្វះស្វែងផ្តល់លទ្ធភាពដល់បណ្តាស្ថានឯកអគ្គរាជទូត និងស្ថានតំណាងអចិន្ត្រៃយ៍នៃព្រះរាជាណាចក្រកម្ពុជាប្រចាំនៅក្រៅប្រទេស ដើម្បីសម្រេចបាននូវប្រសិទ្ធភាពខ្ពស់ក្នុងការបំពេញការងារ។
មន្ត្រីទូតទាំង៧ ត្រូវបានតែងតាំងកាលពីចុងអណត្តិទី៦ ក្រោមការដឹកនាំរបស់លោក ប្រាក់ សុខុន។ ឥស្សរជនទាំងនោះ មាន លោក លុយ ដាវីត ដែលត្រូវជំនួសលោក កេត សាផាន់ ជាឯកអគ្គរាជទូតខ្មែរប្រចាំប្រទេសបារាំង អ៊ីតាលី ព័រទុយហ្គាល់ ម៉ាល់តា អេស្ប៉ាញ បូរីក្សត្រអង់ជ័រ និងបូរីក្សត្រម៉ូណាកូ ដែលមាននិវេសនដ្ឋាននៅទីក្រុងប៉ារីស។
លោក ឡាយ សំកុល ជំនួសលោក កាន់ ផារិទ្ធ ជាឯកអគ្គរាជទូតកម្ពុជាប្រចាំចក្រភពអង់គ្លេស អៀរឡង់ ដាណឺម៉ាក ស៊ុយអែត ន័រវេស និងហ្វាំងឡាំង ដែលមាននិវេសនដ្ឋាននៅទីក្រុងឡុងដ៏។ លោក សុក ជា ជំនួសលោក មាស គឹមហេង ជាឯកអគ្គរាជទូតកម្ពុជា ប្រចាំតួកគី តាហ្ស៊ីគីស្ថាន អាសៃបៃហ្សង់ កាហ្សាក់ស្ថាន ហ្សកហ្ស៊ី កៀហ្ស៊ីស៊ីស្ថាន ប៉ាគីស្ថាន និងរដ្ឋអ៊ីស្រាអែល ដែលមាននិវសេនដ្ឋាននៅទីក្រុងអង់ការ៉ា។
លោក ទាន សំណាង ជំនួសលោក អ៊ីវ ហ៊ាង ជាឯកអគ្គរាជទូតកម្ពុជា ប្រចាំឥណ្ឌូណេស៊ី និងទីម័រខាងកើត ដែលមាននិវេសនដ្ឋាននៅទីក្រុងហ្សាការតា។ លោក ហ៊ុលក្រង ផាណង ជំនួសលោកស្រី ថោង សុគន្ធារី ឯកអគ្គរាជទូតកម្ពុជាប្រចាំប្រទេសឡាវ។
លោក ឈាង ធីរ៉ា ជំនួសលោកស្រី ផែន សាវនី ជាឯកអគ្គរាជកម្ពុជា ប្រចាំអាល្លឺម៉ង់ ប៉ូឡូញ សាធារណរដ្ឋឆែក ក្រូអាត ហុងគ្រី ស្លូវ៉ាគី ស្លូវ៉ានី និងអ៊ុយក្រែន ដែលមាននិវេសនដ្ឋាននៅទីក្រុងប៊ែរឡាំង។ លោក តាន់ ប៊ុនប៉ា ជំនួសលោក តាន់ វុដ្ឋា ជាឯកអគ្គរាជទូតកម្ពុជាប្រចាំសាធារដ្ឋស៊ែប៊ី ដែលមាននិវេសនដ្ឋាននៅទីក្រុងប៊ែលក្រាត។
មុននឹងចេញទៅបំពេញបេសកកម្មរៀងៗខ្លួន ឯកអគ្គរាជទូតតែងតាំងថ្មីទាំង៧រូប ក៏បានចូលក្រាបថ្វាយបង្គំលា ព្រះករុណាព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុន, ជម្រាបលាសម្តេច សាយ ឈុំ ប្រធានព្រឹទ្ធសភា និងលោកស្រី ឃួន សុដារី ប្រធានរដ្ឋសភា ផងដែរ។
នៅចំពោះមុខរដ្ឋមន្ត្រី លោក លុយ ដាវីត តំណាងឱ្យឯកអគ្គរាជទូតទើបតែងតាំងថ្មីទាំងអស់ បានបង្ហាញពីការប្តេជ្ញាចិត្តបំពេញការងារជូនពលរដ្ឋខ្មែរ ឱ្យទាន់ពេលវេលា និងទទួលបានសេវាល្អ ព្រមទាំងលើកកម្ពស់វិស័យការទូតសេដ្ឋកិច្ច ជំរុញពាណិជ្ជកម្ម និងទាក់ទាញវិនិយោគបរទេសឱ្យបានច្រើនដើម្បីមកវិនិយោគនៅកម្ពុជា៕