ជាតិ
សេដ្ឋកិច្ចអន្តរជាតិ
ក្រុមហ៊ុនចិនកំពុងសិក្សាសង់ផ្លូវរថភ្លើងភ្ជាប់ពីព្រលានថ្មីមកក្រុងសៀមរាប លោក លី វណ្ណៈ (ឆ្វេង) នាយករដ្ឋបាលសាលាខេត្តសៀមរាប និងលោក ឌុច សារ៉េត (ស្ដាំ) អនុប្រធានសមាគមទេសចរណ៍កម្ពុជាខេត្តសៀមរាប
× សៀមរាប៖ ក្រុមហ៊ុន China Metro កំពុងសិក្សានិងស្វែងរកកិច្ចសហការជាមួយអាជ្ញាធរខេត្ត ដើម្បីសាងសង់ផ្លូវរថភ្លើងមួយខ្សែភ្ជាប់ពីព្រលានយន្តហោះអន្ដរជាតិសៀមរាប-អង្គរ ស្រុកសូទ្រនិគម មកកាន់ក្រុងសៀមរាប។
នាយករដ្ឋបាលសាលាខេត្តសៀមរាបលោក លី វណ្ណៈ បានប្រាប់សារព័ត៌មានថ្មីៗថា ភាគីក្រុមហ៊ុនបាន មកជួបអាជ្ញាធរខេត្តនៅចុងខែ សីហា កន្លងទៅ ដើម្បីបង្ហាញគម្រោងសិក្សាសង់ផ្លូវរថភ្លើងពីព្រលានយន្តហោះ មកកាន់ក្រុងសៀមរាប។ លោកបញ្ជាក់ថា គម្រោងនេះមានប្រវែងប្រមាណ៣០គីឡូម៉ែត្រ ដោយខ្សែរថភ្លើងចេញពីព្រលាន ហើយមកដល់ក្រុងសៀមរាបបែងចែកជាពីរ គឺខ្សែទីមួយឆ្ពោះទៅតំបន់អង្គរ និងមួយទៀតមកកាន់ចំណតក្នុងក្រុងសៀមរាប។
តាមការអះអាងរបស់លោក លី វណ្ណៈ គម្រោងនេះស្ថិតក្នុងដំណាកការសិក្សាប៉ុណ្ណោះ ដោយបច្ចុប្បន្ន ក្រុមហ៊ុនកំពុងសិក្សាព័ត៌មានពីភាគីពាក់ព័ន្ធទាំងផ្នែកអគ្គិសនី ទឹក ផ្លូវ បរិស្ថានជាដើម ដើម្បីធានាថា ខ្សែរថភ្លើងធុនស្រាលនេះ អាចសាងសង់ទៅរួចក្នុងកម្រិតច្បាស់លាស់។ លោកបន្ថែមថា៖«គម្រោងនេះសិ្ថតក្នុងការសិក្សានៅឡើយទេ អត់ទាន់ចេញជាផ្លូវការទេ»។
កិច្ចប្រជុំថ្ងៃទី២៣ សីហា ពីគម្រោងសិក្សាផ្លូវរថភ្លើងធុនស្រាលពីព្រលានយន្តហោះអន្ដរជាតិសៀមរាប-អង្គរ នៅសាលាខេត្តសៀមរាប។ រូបភាពពីរដ្ឋបាលខេត្តសៀមរាប
ដោយសារគម្រោងត្រូវឆ្លងកាត់តំបន់រមណីយដ្ឋានអង្គរ ដូច្នេះភាគីក្រុមហ៊ុនក៏កំពុងសិក្សាជាមួយ អាជ្ញាធរជាតិអប្សរាផងដែរ ទៅលើទីតាំង និងតំបន់បុរាណដ្ឋានដែលត្រូវប៉ះពាល់ឬបញ្ជៀស។
ជាមួយនឹងគម្រោងថ្មីនេះ ក្នុងនាមរដ្ឋបាលខេត្តលោក លី វណ្ណៈមានក្ដីជឿជាក់ថា នឹងបង្កើតការងារជូន ប្រជាពលរដ្ឋមួយផ្នែកទៀត។ ក្រៅពីនោះទេសចរក៏នឹងចំណេញពេលវេលា និងថវិកាផងដែរ ពេលមកកម្សាន្តខេត្តសៀមរាប។ លោក លី វណ្ណៈ ប្រាប់ដូច្នេះថា៖« នេះជាគម្រោងថ្មីសម្រាប់សៀមរាប បើអាចដំណើរការបានបង្កើតការងារជូនពលរដ្ឋ ជួយកាត់បន្ថយពេលវេលា និងថវិការបស់ទេសចរពីព្រលានយន្តហោះមកក្រុង និងពីក្រុងទៅព្រលាន»។
គម្រោងនេះ ក៏មានការសាទរពីសមាគមទេសចរណ៍ផងដែរ។ អនុប្រធានសមាគមទេសចរណ៍កម្ពុជាខេត្តសៀមរាប លោក ឌុច សារ៉េត យល់ថានេះជាភាពវិជ្ជមាននៃការអភិវឌ្ឍក្នុងខេត្តសៀមរាប។ លោក សារ៉េត លើកឡើងថា៖« យើងពិតជារីករាយ និងជាការវិវឌ្ឍន៍ថ្មីមួយទៀតដែលរាជរដ្ឋាភិបាល អាជ្ញាធរ និងក្រុមហ៊ុនពាក់ព័ន្ធកំពុងរៀបចំ»។
យ៉ាងណា គម្រោងសាងសង់ផ្លូវរថភ្លើងនេះ ចង់មិនចង់វាបានប៉ះពាល់ដល់ប្រតិបត្តិករដឹកជញ្ជូនមួយផ្នែក ផងដែរ។ តែលោក ឌុច សារ៉េត យល់ថា គេត្រូវយល់ពីការអភិវឌ្ឍនានាដើម្បីឆ្លើយតបតាមតម្រូវការ ដូច្នេះការបង្កើតរថភ្លើងនេះ ក៏ជួយសេវាដឹកជញ្ជូនក្នុងខេត្តសៀមរាបឱ្យមានភាពសម្បូរបែបដូចប្រទេស ជិតខាងដែលគេបានធ្វើរួចហើយដែរ។ លោក សារ៉េត បន្ថែមថា៖«ខ្ញុំគិតថាក្នុងដំណាក់កាលមួយដែលប្រទេសត្រូវការអភិវឌ្ឍន៍អ្វីៗវាមានការវិវឌ្ឍន៍ជានិច្ច ពេលយើងមានអ្វីៗទំនើប មានអ្វីៗកាន់តែប្រែប្រួល ជាពិសេសព្រលានយន្តហោះថ្មីដែលមានវិសាលភាពធំ ចំនួនទេសចរដែលចូលមកសៀមរាបក៏កាន់តែច្រើន ដើម្បីសម្រួលតាមបរិបទនេះ ការរៀបចំហេដ្ឋារចនាសម្ព័ន្ធក៏ត្រូវតែមាន»៕
© រក្សាសិទ្ធិដោយ thmeythmey.com