អន្តរជាតិ
ហ្វីលីពីន តៃវ៉ាន់ ម៉ាឡេស៊ី និងវៀតណាម ច្រានចោលផែនទីចិនថ្មីបំផុតអំពីសមុទ្រចិនខាងត្បូង
រូបឯកសារ៖ រូបភាពពីអាកាសបង្ហាញនាវារបស់ចិនធ្វើដំណើរនៅតំបន់កោះ Thitu ដែលហ្វីលីពីនកាន់កាប់ក្នុងតំបន់កោះ Spratly នៃសមុទ្រចិនខាងត្បូង កាលពីថ្ងៃទី ៩ ខែមីនា ឆ្នាំ ២០២៣។
×![]()
ដោយ: VOA
ប្រទេសហ្វីលីពីន ម៉ាឡេស៊ី កោះតៃវ៉ាន់ និងប្រទេសវៀតណាមបានច្រានចោលថាគ្មានមូលដ្ឋាននូវផែនទីចេញផ្សាយដោយប្រទេសចិន ដែលបង្ហាញតំបន់មួយចំនួនដែលចិនទាមទារអធិបតេយ្យភាពរបស់ខ្លួន រួមទាំងក្នុងសមុទ្រចិនខាងត្បូង ហើយដែលរដ្ឋាភិបាលក្រុងប៉េកាំងបាននិយាយកាលពីថ្ងៃព្រហស្បតិ៍ថា ផែនទីនេះគួរត្រូវគេពិនិត្យមើលដោយសមហេតុផលនិងគ្មានបុរេវិនិច្ឆ័យ។
ប្រទេសចិនបានចេញផ្សាយផែនទីនៃខ្សែបន្ទាត់រាងអក្សរ U គ្របដណ្តប់លើតំបន់ប្រមាណ ៩០% នៃសមុទ្រចិនខាងត្បូង ដែលតំបន់ជាប្រភពមួយនៃបណ្តាជម្លោះជាច្រើននៅក្នុងផ្លូវសមុទ្រមួយមានការដណ្តើមគ្នាខ្លាំងក្នុងពិភពលោក ដែលនៅទីនោះនាវាចរណ៍ពាណិជ្ជកម្មជាង ៣ លានលានដុល្លារបានឆ្លងកាត់រៀងរាល់ឆ្នាំ។
ក្រោយការចុះផ្សាយនេះ ប្រទេសហ្វីលីពីនបានអំពាវនាវដល់ប្រទេសចិនឱ្យ «មានការទទួលខុសត្រូវនិងគោរពតាមកាតព្វកិច្ចរបស់ខ្លួន» តាមរយៈច្បាប់អន្តរជាតិនិងសេចក្តីសម្រេចមួយរបស់តុលាការអាជ្ញាកណ្តាលកាលពីឆ្នាំ ២០១៦ ដែលបានប្រកាសថាខ្សែបន្ទាត់នោះគ្មានមូលដ្ឋានផ្លូវច្បាប់ទេ។
ប្រទេសម៉ាឡេស៊ីបាននិយាយថា ខ្លួនបានដាក់ពាក្យតវ៉ាខាងការទូតមួយអំពីផែនទីនេះហើយ។
ប្រទេសចិនបាននិយាយថា ខ្សែបន្ទាត់នេះផ្អែកលើផែនទីប្រវត្តិសាស្ត្ររបស់ផងខ្លួន។ គេមិនបានដឹងភ្លាមៗទេថា តើផែនទីថ្មីបំផុតនេះមានសញ្ញាបង្ហាញការទាមទារដែនទឹកថ្មីណាមួយឬបែបណាទេ។
ដោយឡែកក្រសួងការបរទេសវៀតណាមបាននិយាយថា ការទាមទាររបស់ចិនផ្អែកលើផែនទីនេះគ្មានតម្លៃ ហើយរំលោភលើច្បាប់នៃប្រទេសវៀតណាមនិងច្បាប់អន្តរជាតិ។
ខ្សែបន្ទាត់រាងដូចអក្សរ U របស់ប្រទេសចិន លាតសន្ធឹងរហូតដល់ចម្ងាយ ១ពាន់ ៥រយគ.ម.ខាងត្បូងកោះ Hainan របស់ចិន ហើយបានកាត់ចូលក្នុងតំបន់សេដ្ឋកិច្ចផ្តាច់មុខ EEZs របស់ប្រទេសវៀតណាម ហ្វ៊ីលីពីន ម៉ាឡេស៊ី ព្រុយណេ និងប្រទេសឥណ្ឌូណេស៊ី។
នៅពេលត្រូវសួរថាហេតុដូចម្តេចបានជាប្រទេសចិនចេញផ្សាយផែនទីថ្មីបំផុតរបស់ផងខ្លួនមានចំណុច ១០ ប្រៀបធៀបនឹងផែនទីមួយ ដែលមានចំណុច ៩ កន្លងមក អ្នកនាំពាក្យក្រសួងការបរទេសចិនលោក Wang Wenbin បាននិយាយថា រដ្ឋាភិបាលក្រុងប៉េកាំងមានការជាក់ច្បាស់អំពីដែនដីខ្លួន។
លោក Wang Wenbin បានថ្លែងប្រាប់សន្និសីទកាសែតជាប្រចាំមួយថា៖ «គោលជំហររបស់ប្រទេសចិនអំពីបញ្ហាសមុទ្រចិនខាងត្បូងតែងតែច្បាស់លាស់ជានិច្ច។ អាជ្ញាធរមានសមត្ថកិច្ចនៃប្រទេសចិនតែងតែធ្វើបច្ចុប្បន្នភាពជាទៀងទាត់និងចេញផ្សាយផែនទីជាស្តង់ដារៀងរាល់ឆ្នាំ»។
ចំណែក ប្រទេសឥណ្ឌាបាននិយាយថា ខ្លួនបានដាក់ពាក្យតវ៉ាខ្លាំងមួយជាមួយប្រទេសចិនអំពីផែនទីថ្មីមួយដែលទាមទារយកដែនដីរបស់ឥណ្ឌា ដែលជាការរកាំរកូសថ្មីបំផុតក្នុងចំណងទាក់ទងរអាក់រអួលរវាងមហាប្រទេសទាំងពីរនេះនៅអាស៊ី៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
