សម្តេចនាយករដ្ឋមន្ត្រី ហ៊ុន ម៉ាណែត កាលពីថ្ងៃទី១៣ ខែកញ្ញា បានចេញសេចក្តីសម្រេចស្តីពីការបង្កើតគណៈកម្មការចំពោះកិច្ចត្រួតពិនិត្យ និងដោះស្រាយបញ្ហាដំណើរចេញ ចូលរបស់ពលករខ្មែរតាមព្រំដែនកម្ពុជា។
គណៈកម្មការចំពោះកិច្ចនេះ ដឹកនាំដោយលោកឧបនាយករដ្ឋមន្ត្រី នេត សាវឿន ដោយមានលោក គៀត ច័ន្ទថារិទ្ធ រដ្ឋលេខាធិការក្រសួងមហាផ្ទៃជាអនុប្រធានប្រចាំ លោក សំរិទ្ធ ឌី រដ្ឋលេខាធិការក្រសួងមហាផ្ទៃ និងលោក សៀក សុជាតិ រដ្ឋលេខាធិការក្រសួងការពារជាតិ ជាអនុប្រធាន។
សមាជិកផ្សេងទៀតរបស់គណៈកម្មការ មាន លោក ថោង សំអាត រដ្ឋលេខាធិការទីស្តីការគណៈរដ្ឋមន្ត្រី, លោក ហេង ចាន់ឌី រដ្ឋលេខាធិការក្រសួងអធិការកិច្ច, បណ្តាអភិបាលខេត្តជាប់ព្រំដែន, អគ្គនាយកគយ និងរដ្ឋាករ, អគ្គនាយកអន្តោប្រវេសន៍, អគ្គស្នងការរងទទួលបន្ទុកព្រំដែន, ប្រធាននាយកដ្ឋានកណ្តាលនគរបាលព្រំដែន, ប្រធាននាយកដ្ឋាននគរបាលការពារព្រំដែនគោក និងនាយកទីចាត់ការការងារព្រំដែន។
គណៈកម្មការចំពោះកិច្ចមានតួនាទី និងភារកិច្ច តាមដាន និងត្រួតពិនិត្យការអនុវត្តវិធានការនានាដែលបានដាក់ចេញដោយរដ្ឋាភិបាល ដើម្បីលុបបំបាត់ភាពមិនប្រក្រតី និងបាតុភាពផ្សេងៗ ក៏ដូចជាបញ្ហាប្រឈមនានាចំពោះពលករខ្មែរ ក្នុងការចេញ ចូល និងឆ្លងកាត់ព្រំដែន។
គណៈកម្មការមានសិទ្ធិជំរុញដល់អាជ្ញាធរមានសមត្ថកិច្ចពាក់ព័ន្ធនៅតាមព្រំដែន ដើម្បីជួយសម្រួលដំណើរចេញ ចូលរបស់ពលករខ្មែរឲ្យបានត្រឹមត្រូវ, ទទួល និងដោះស្រាយបណ្ដឹងតវ៉ានានារបស់ពលករខ្មែរពាក់ព័ន្ធនឹងដំណើរឆ្លងកាត់ព្រំដែន, សិក្សាស្រាវជ្រាវលើប្រភពបញ្ហា ឬភាពមិនប្រក្រតីនានា ដែលបង្កការរំខានដល់ដំណើរចេញចូល ឬប៉ះពាល់ដល់ផលប្រយោជន៍របស់ពលករខ្មែរតាមព្រំដែន, រៀបចំឲ្យមានប្រព័ន្ធឆ្លើយតបបន្ទាន់មិនប្រក្រតី, ត្រួតពិនិត្យដើម្បីសម្រួលឲ្យពលករអាចទំនាក់ទំនង និងរាយការណ៍ភាពតាមដានការអនុវត្តតួនាទីភារកិច្ចរបស់អាជ្ញាធរមានសមត្ថកិច្ចពាក់ព័ន្ធក្នុងករណីមានបណ្ដឹងមិនសុខចិត្តពីពលករ។
ការយកកម្រៃក្រៅផ្លូវការ ក៏ត្រូវលុបបំបាត់ផងដែរ ដោយគណៈកម្មការចំពោះកិច្ចនេះ មានភារកិច្ច ចុះពិនិត្យ សិក្សា និងវាយតម្លៃអំពីស្ថានភាពនៃការយកកម្រៃក្រៅផ្លូវការ, ដាក់ចេញវិធានការ ចុះប្រតិបត្តិការ ឬចេញសេចក្ដីណែនាំ ដើម្បីលុបបំបាត់ការយកកម្រៃក្រៅ ផ្លូវការសម្រាប់ការធ្វើដំណើរចេញចូលនៅច្រកទ្វារព្រំដែន សំដៅសម្រួលដល់ការធ្វើដំណើរចេញ ចូលរបស់ពលករនៅតាមព្រំដែន និងធ្វើរបាយការណ៍ជូនប្រមុខរដ្ឋាភិបាលអំពីវឌ្ឍនភាពការងារ និងបញ្ហាប្រឈមទាក់ទងនឹងការងារ។
គណៈកម្មការអាចបង្កើតក្រុមការងារមួយចំនួនតាមការចាំបាច់ រួមទាំងមានសិទ្ធិប្រើត្រារបស់ទីស្តីការគណៈរដ្ឋមន្ត្រី ដើម្បីដំណើរការងាររបស់ខ្លួនផងដែរ ដោយថវិកាចំណាយ មធ្យោបាយ និងសម្ភារបរិក្ខារសម្រាប់បេសកកម្ម ជាបន្ទុករបស់ក្រសួង ស្ថាប័នសាមី៕