ជាតិ
កម្ពុជា-អាម៉េរិក ប្តេជ្ញាបន្តកិច្ចសហប្រតិបត្តិការជាមួយគ្នាឱ្យកាន់តែជិតសិទ្ធ
× សម្តេចនាយករដ្ឋមន្ត្រី ហ៊ុន ម៉ាណែត បានទទួលជួប និងពិភាក្សាការងារជាមួយឯកអគ្គរដ្ឋទូតសហរដ្ឋអាម៉េរិកប្រចាំកម្ពុជា លោក W. Patrick Murphy នាព្រឹកថ្ងៃទី២៧ ខែកញ្ញា។ ក្នុងជំនួបនៅវិមានសន្តិភាព ភាគីទាំងពីរសុទ្ធតែបានប្តេជ្ញាចិត្តបន្តកិច្ចសហប្រតិបត្តិការជាមួយគ្នាឱ្យកាន់តែជិតស្និទ្ធបន្ថែមទៀត។
តាមខ្លឹមសារនៃជំនួបដែលបង្ហាញដោយភាគីកម្ពុជា សម្តេច ហ៊ុន ម៉ាណែត បានចាប់ផ្តើមដោយជម្រាបលោក W. Patrick Murphy អំពីលទ្ធផលលទ្ធផលនៃជំនួបទេ្វភាគី ជាពិសេសជាមួយលោកស្រី Victoria Nuland អនុរដ្ឋមន្ត្រីការបរទេសស្តីទីសហរដ្ឋអាម៉េរិក នៅក្រុងញូវយ៉ក កន្លងមក។
សម្តេចបានលើកឡើងពីជំនួយក្នុងទំហំទឹកប្រាក់ប្រមាណ១៨លានដុល្លារដែលរដ្ឋាភិបាលអាម៉េរិក បានផ្តល់ឡើងវិញជូនកម្ពុជាតាមរយៈទីភ្នាក់ងារអាមេរិកសម្រាប់ការអភិវឌ្ឍអន្តរជាតិ (USAID) នឹងត្រូវប្រើប្រាស់សម្រាប់ការកែលម្អការផ្ដល់សេវាសុខាភិបាលទាំងក្នុងផ្នែករដ្ឋ និងផ្នែកឯកជន ការការពារបរិស្ថានប្រកបដោយចិរភាព ការការពារ និងការប្រយុទ្ធនឹងជំងឺរបេង និងការបណ្ដុះបណ្ដាលផ្នែកសហគ្រិនភាពដល់យុវជនកម្ពុជា ជាដើម។
ភាគីទាំងពីរក៏បានពិភាក្សាគ្នាពាក់ព័ន្ធនឹងការធ្វើមាតុភូមិនិវត្តន៍ពលរដ្ឋខ្មែរ និងបេសកកម្មស្រាវជ្រាវ និងជីករុករកអដ្ឋិធាតុជនជាតិអាមេរិកបាត់ខ្លួន (POW/MIA) ផងដែរ ដោយសុទ្ធតែបានបង្ហាញពីការយកចិត្តទុកដាក់រៀងខ្លួនក្នុងការងារទាំងនេះ។
ដូចគ្នាផងដែរ ស្ថានទូតអាម៉េរិកប្រចាំកម្ពុជា បានគូសបញ្ជាក់អំពីជំនួបពិភាក្សាប្រកបដោយផ្លែផ្ការវាងសម្តេចនាយករដ្ឋមន្ត្រី ហ៊ុន ម៉ាណែត និងលោកឯកអគ្គរដ្ឋទូត W.Patrick Murphy។ លោក Murphy បានមើលឃើញពីកិច្ចខំប្រឹងប្រែងរបស់នាយករដ្ឋមន្ត្រីកម្ពុជា នាអំឡុងបេសកកម្មនៅញូវយ៉ក ដោយបានជួបពិភាក្សាជាមួយមន្ត្រី និងពាណិជ្ជករអាម៉េរិក ជាច្រើនរូប។
លោក Murphy បានលើកឡើងពីការប្តេជ្ញាចិត្តដ៏យូរអង្វែងរបស់អាមេរិកក្នុងការគាំទ្រប្រជាជនកម្ពុជាដើម្បីរួមចំណែកអភិវឌ្ឍន៍របស់ប្រទេសតាមរយៈការផ្តល់ជំនួយប្រមាណ៣ពាន់លានដុល្លារនារយៈពេល៣០ឆ្នាំចុងក្រោយនេះ។
ក្រៅពីសង្កត់ធ្ងន់អំពីសារសំខាន់នៃសិទ្ធិមនុស្ស ការការពារសេរីភាពជាមូលដ្ឋាន លោក Murphy បានជំរុញកម្ពុជាឱ្យរក្សាជំហរឯករាជ្យ និងតុល្យភាពនៃគោលនយោបាយបរទេស ហើយបន្តសកម្មភាពខ្លាំងក្លាលើការប្រយុទ្ធប្រឆាំងការជួញដូរមនុស្ស និងការបោកប្រាស់តាមប្រព័ន្ធអ៊ីនធ័រណិត៕
© រក្សាសិទ្ធិដោយ thmeythmey.com