ជាតិ
ពីនេះ ពីនោះ
«កុង» មានន័យច្រើនបែប៖ ជីតា, គណនីធនាគារ, ដែលវៀច, មិនស៊ីចង្វាក់គ្នា..
× ពាក្យ «កុង» មានការពន្យល់បាន៧បែបផ្សេងៗគ្នា។ នេះបើតាមវចនានុក្រមខ្មែរ២០២២របស់ក្រុមប្រឹក្សាជាតិភាសាខ្មែរ ដែលបានធ្វើបច្ចុប្បន្នលើវចនានុក្រមខ្មែរសម្តេចព្រះសង្ឃរាជ ជួន ណាត។
«កុង» ជាកិរិយាសព្ទ មានន័យថា បំបាត់ប្រវ័ញ្ច។ ជានាមសព្ទ «កុង» មានន័យថា វត្ថុអ្វីៗដែលមានសណ្ឋានកោង, ដែលរំពត់បង្កុងឡើង៖ កុងទូក, កុងសូត្រ, កុងសម្រាប់រែកកណ្តាប់ ។ ជាគុណនាម គឺ ដែលវៀច, ដែលកោង៖ ផ្លូវកុង។
ន័យមួយទៀត គឺជាពាក្យកម្ចីភាសាចិន ដោយ «កុង» គឺឪពុករបស់មាតា ឬ បិតា ( ជីតា ) ។ ជាគុណសព្ទ «កុង» មានន័យថា ដែលវៀច, ដែលកោង៖ ផ្លូវកុង។
វចនានុក្រមខ្មែរ២០២២ ផ្តល់និយមន័យបន្ថែមទៀតចំពោះពាក្យ «កុង»។ «កុង» ជានាមសព្ទ ដែលសំដៅលើរង្វាស់ផ្ទៃក្រឡាដីប្រមាណ១៦,២ហិកតាឬ៤០អា បួនជ្រុង : ឪឡឹកចំនួន៥កុង។ «កុង» ជាក្រង់ ឬជង្រុកសម្រាប់ដាក់ស្រូវ។
ពាក្យដែលពេញនិយមប្រើនាពេលបច្ចុប្បន្ន គឺ «កុង» ដែលមានន័យថា គណនីធនាគារ, ការរៀបចំបែបបទជាមួយធនាគារ ដើម្បីអនុញ្ញាតឱ្យយើងអាចដាក់ឬដកប្រាក់ : ខ្ញុំបានទៅបើកកុងធនាគារមួយ។ ពាក្យនេះ ចេញពីភាសាបារាំង Compte។
រីឯ «កុង» មួយទៀត ជាកិរិយាសព្ទ, ជាគុណកិរិយា ហើយដែលត្រូវបានចាត់ទុកជាពាក្យសាមញ្ញនោះ គឺចេញពីភាសាបារាំង Contre។ ពាក្យនេះ មានន័យថា មិនត្រូវគ្នា, មិនស៊ីសង្វាក់គ្នា, ទាស់គ្នា : សុខនិងសៅតែងតែកុងគ្នាជានិច្ច៕
© រក្សាសិទ្ធិដោយ thmeythmey.com