មួយម៉ឺនអាល័យឆ្នាំទី៧នេះ នឹងធ្វើ៤ថ្ងៃ ក្នុងខែវិច្ឆិកាខាងមុខ

ជាតិ

មួយម៉ឺនអាល័យឆ្នាំទី៧នេះ នឹងធ្វើ៤ថ្ងៃ ក្នុងខែវិច្ឆិកាខាងមុខ

28, Oct 2023 , 2:00 pm

រូបភាព

រូបផ្ដល់ឱ្យដោយក្រុម ព្រះ សុរិយា

ដោយ: ប៉ូ សាគុន

ភ្នំពេញ៖ មួយម៉ឺនអាល័យឆ្នាំទី៧នេះ ធ្វើឡើងដើម្បីអបអរខួបលើកទី៧០ នៃទិវាឯករាជ្យជាតិ និងអបអរសាទរខួប៧០ព្រះវស្សា នៃទិវារំលឹកថ្ងៃព្រះរាជសម្ភព ព្រះករុណា ព្រះបាទសម្ដេច ព្រះនរោត្តម សីហមុនី ជាអម្ចាស់ជីវិតតម្កល់លើត្បូង ព្រះមហាក្សត្រនៃព្រះរាជាណាចក្រកម្ពុជា។

ក្រុមព្រះសុរិយា នឹងប្រារព្ធកម្មវិធីមួយម៉ឺនអាល័យលើកទី៧ រយៈពេល៤ថ្ងៃ ពីថ្ងៃទី១ដល់ទី៤ ខែវិច្ឆិកា ឆ្នាំ២០២៣ នាសាលមជ្ឈមណ្ឌលសហប្រតិបត្តិការកម្ពុជាកូរ៉េ(CKCC) ស្ថិតនៅក្នុងបរិវេណសាកលវិទ្យាល័យភូមិន្ទភ្នំពេញ រាជធានីភ្នំពេញ។ កម្មវិធីនេះ បើកជូនសាធារណជន ចូលទស្សនាដោយមិនគិតថ្លៃ។

រៀបចំឡើងដោយក្រុមព្រះសុរិយា កម្មវិធីមួយម៉ឺនអាល័យលើកទី៧ ធ្វើឡើងក្នុងគោលបំណង ជាការតបស្នងព្រះមហាករុណាទិគុណ មិនអាចកាត់ថ្លៃបាន ចំពោះព្រះមហាវីរក្សត្រ ព្រះបរមរតនកោដ្ឋ ព្រះបិតាសិល្បៈភាពយន្តខ្មែរ ដែលពេញមួយព្រះជន្ម បានលះបង់ព្រះកាយពល ព្រះរាជបញ្ញាញាណ ព្រះរាជទ្រព្យ ក្នុងការធ្វើឱ្យវិស័យសិល្បៈភាពយន្តខ្មែរ កកើតមកប្រកបដោយមោទកភាពជាទីបំផុត។

កម្មវិធីនេះ ក៏ធ្វើឡើងដើម្បី បណ្ដុះស្មារតីយុវជនកម្ពុជាបច្ចុប្បន្ន ឱ្យស្រឡាញ់ គោរព ដឹងគុណចំពោះបុព្វបុរសខ្មែរ និងព្រះមហាក្សត្រខ្មែរគ្រប់ព្រះអង្គ ជាពិសេសព្រះករុណា ព្រះមហាវីរក្សត្រ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត។

ដើម្បីផ្សាយពីភាពយន្តខ្មែរ ដែលសល់ពីការបំផ្លាញ ដោយរបបខ្មែរក្រហម ឱ្យមហាជន និងយុវជនទស្សនា សិក្សាស្វែងយល់ ពីបទពិសោធន៍ ជីវភាព ការរស់នៅ សេដ្ឋកិច្ច វប្បធម៌ និងសីលធម៌ របស់ប្រជារាស្ត្រ តាមរយៈភាពយន្ត។

តាមរយៈក្រុមព្រះសុរិយា វិស័យភាពយន្ត កើតឡើងក្រោមព្រះរាជកិច្ច ចាត់ចែងដ៏ខ្ពង់ខ្ពស់បំផុតរបស់ ព្រះមហាវីរក្សត្រ ព្រះបរមរតនកោដ្ឋ ព្រះបិតាសិល្បៈភាពយន្ត ក្រោយពេលដែលអាណានិគមនិយមបារាំង បានប្រគល់ឯករាជ្យជាតិពេញលេញ ព្រះអង្គបានសព្វព្រះរាជហឫទ័យ ចាត់បញ្ជូនបញ្ញវ័ន្តខ្មែរជាច្រើនរូប ទៅសិក្សារៀនសូត្រនៅបរទេស ដើម្បីមកផលិតភាពយន្តខ្មែរ ប្រកបដោយគុណភាពខ្ពស់ ដើម្បីបម្រើជូនប្រជានុរាស្ត្រ និងផ្សព្វផ្សាយទៅបរទេស។

កម្មវិធីមួយម៉ឺនអាល័យឆ្នាំទី៧នេះ មានការបញ្ចាំងភាពយន្តខ្មែរ ដែលសល់ពីការបំផ្លាញដោយសង្គ្រាម។ មានចម្រៀងសរសើរ និងថ្វាយព្រះរាជអាល័យ ពីសង្គមរាស្ត្រនិយម និងចម្រៀងតែងនិពន្ធថ្មី។ ចម្រៀងថ្វាយព្រះពរ ព្រះករុណាជាអម្ចាស់ជីវិតតម្កល់លើត្បូង ព្រះមហាក្សត្រនៃព្រះរាជាណាចក្រកម្ពុជា។ ការចាក់បញ្ចាំងភាពយន្តឯកសារ ក្នុងការទាមទារឯករាជ្យ។ ការតាំងពិព័រណ៍ ស្ដីពីព្រះរាជបេសកកម្ម ក្នុងការទាមទារឯករាជ្យជាតិ។ ការតាំងពិព័រណ៍ស្ដីពី ព្រះរាជបេសកកម្ម ព្រះករុណាជាអម្ចាស់ជីវិតតម្កល់លើត្បូង ព្រះមហាក្សត្រនៃព្រះរាជាណាចក្រកម្ពុជា។

តាំងពិព័រណ៍ ផ្សារសិប្បកម្មផលិតផលខ្មែរ មកពីខេត្តសៀមរាប និងរាជធានីភ្នំពេញ។ មហោស្រពចាប៉ីដងវែង។ មហោស្រពអាហារបួស។

សូមរំលឹកថា កម្មវិធីមួយម៉ឺនអាល័យ បានប្រារព្ធឡើងចំនួន៦លើករួចមកហើយ គឺចាប់ផ្តើមក្នុងឆ្នាំ២០១៦ និងរៀបចំជាបន្តបន្ទាប់រហូតដល់ឆ្នាំ២០១៩។ អំឡុងឆ្នាំ២០២០ និង២០២១ វិបត្តិកូវីដ-១៩ បានរារាំងដល់ដំណើរការរៀបចំកម្មវិធីនេះ។ នៅឆ្នាំ២០២២ កម្មវិធីមួយម៉ឺនអាល័យ ចាប់រៀបចំកម្មវិធីលើកទី៦ របស់ខ្លួន៕