លោក ម៉េត យ៉េត ជាកសិករនៅស្រុកកំរៀង ខេត្តបាត់ដំបង ទើបចាប់ផ្តើមដាំដំណាំតាសក់ផ្អែម និងឪឡឹកលឿង។ ដ្បិតដាំដុះលើកដំបូង តែកសិកររូបនេះរំភើបចំពោះទិន្នផលដំណាំថ្មីនេះ​ពិសេសបានចំណូលខុសគ្នាឆ្ងាយ ធៀបនឹងការដាំដំឡូង និងពោត។ 

 

លោក ម៉េត យ៉េត ចំណាយពេលជាង២ខែប៉ុណ្ណោះដើម្បីបានតាសក់បេះលក់ ខុសពីពោត និងដំឡូង ដែលមានអាយុជិតមួយឆ្នាំទើបអាចប្រមូលផលបាន។ លោក ម៉េត យ៉េត ដាំត្រសក់ផ្អែមពណ៌លឿង និងក្រឡាសំណាញ់ និងដាំឪឡឹកលឿងលាយគ្នាខ្លះដែរ។ តាសក់ផ្អែមមួយគីឡូក្រាម លោកអាចលក់បាន ចន្លោះពី៤០០០រៀលទៅ៦០០០រៀល ដែលជាសមាគមត្រសក់ផ្អែមមានជ័យនៅខេត្តសៀមរាប ប្រមូលទិញពីកសិករទាំងអស់ ដើម្បីទុកចែកចាយទៅទីផ្សារខាងក្រៅ។ 

 

គិតត្រឹមចុងខែ សីហា កន្លងទៅ កសិករដាំតាសក់ផ្អែមលោក ម៉េត យ៉េត បេះត្រសក់ និងឪឡឹកលក់គិតជាថវិកាបានប្រមាណ៣០លានរៀល។ ចំនួននេះ លោក យ៉េត ប្រាប់ថា ខុសគ្នាពី ១០ទៅ២០ដង ពីចំណូលដំឡូងមី និងពោត ដែលលើដាំលើផ្ទៃដីជិត២ហិកតានេះ។ 

 

ញញឹមបណ្ដើរ និងនិយាយបណ្ដើរ លោក ម៉េត យ៉េត ប្រាប់ថា នឹងបន្តពង្រីកការដាំឱ្យកាន់តែច្រើន គឺចំនួន១៥,០០០ដើម ទៅ១៧,០០០ដើម ខណៈដែលវគ្គទី១នេះលោកដាំត្រឹម១ម៉ឺនដើមប៉ុណ្ណោះ៕