ជាតិ
សម្រេចចុងក្រោយ! បទ «ឱភ្នំពេញអើយ» និពន្ធទំនុកច្រៀងដោយ លោក កែវ ចិន្តា ហើយបក្ស CPP ជាម្ចាស់កម្មសិទ្ធិ រូបពីក្រុមព្រះសុរិយា
× ភ្នំពេញ៖ សេចក្ដីសម្រេចចុងក្រោយ នៃម្ចាស់កម្មសិទ្ធិលើបទ “ឱភ្នំពេញអើយ” គឺជាកម្មសិទ្ធិរបស់គណបក្សប្រជាជនកម្ពុជា (CPP)។ និពន្ធទំនុកច្រៀង ដោយសមមិត្ត កែវ ចិន្តា សម្រួលតន្រ្តីដោយសមមិត្ត ជ័យ សុភា និងច្រៀងដោយសមមិត្តនារី សូ ចន្នី។
បន្ទាប់ពីមានការសម្របសម្រួល ដោះស្រាយបញ្ហា ដោយក្រសួងវប្បធម៌ និងវិចិត្រសិល្បៈ និងក្រសួងព័ត៌មាន លើករណីរំលោភបំពានសិទ្ធិសីលធម៌ អ្នកនិពន្ធចម្រៀងបទ “ឱភ្នំពេញអើយ” រួចមក ភាគីពាក់ព័ន្ធទាំងអស់ បានសម្រេចទទួលយក និងឯកភាពថា បទចម្រៀង “ឱភ្នំពេញអើយ” ជាស្នាដៃនិពន្ធទំនុកច្រៀងដោយ សមមិត្ត កែវ ចិន្តា សម្រួលតន្រ្តីដោយសមមិត្ត ជ័យ សុភា និងច្រៀងដោយសមមិត្តនារី សូ ចន្នី ដោយយកតាមលំនាំបទឡាវឡឹក និងជាកម្មសិទ្ធិបេតិកភណ្ឌរបស់គណបក្សប្រជាជនកម្ពុជា។
នៅថ្ងៃទី៣០ ខែតុលា ឆ្នាំ២០២៣នេះ រដ្ឋមន្ត្រីក្រសួងព័ត៌មាន លោក នេត្រ ភក្រ្តា បានប្រកាសដល់ប្រព័ន្ធផ្សព្វផ្សាយព័ត៌មានទាំងអស់ ឱ្យផ្សព្វផ្សាយបទចម្រៀង “ឱភ្នំពេញអើយ” ជាសំឡេងដើម ឬច្រៀងថ្មីឡើងវិញ ត្រូវរក្សាឈ្មោះអ្នកនិពន្ធទំនុកច្រៀង អ្នកសម្រួលតន្ត្រី អ្នកច្រៀង និងម្ចាស់កម្មសិទ្ធិ ឱ្យបានត្រឹមត្រូវ តាមលិខិតលេខ ៥០៨ឆ.ត ចុះថ្ងៃទី២៥ ខែតុលា ឆ្នាំ២០២៣ របស់ក្រសួងវប្បធម៌ និងវិចិត្រសិល្បៈ។
ក្នុងករណីមានការផ្សព្វផ្សាយ លើបណ្ដាញសង្គមនានា ដោយប្រើប្រាស់ឈ្មោះផ្ទុយពីខ្លឹមសារ លិខិតខាងលើ លោក នេត្រ ភក្រ្តា សូមឱ្យមានការកែតម្រូវ ឬដកចេញ ដើម្បីជាការគោរព និងផ្ដល់តម្លៃដល់ស្នាដៃម្ចាស់ដើម នៃបទចម្រៀងនេះ៕
Tag:
បទចម្រៀង
កម្មសិទ្ធិបញ្ញា
បទ ឱភ្នំពេញអើយ
សិល្បៈ
វប្បធម៌
© រក្សាសិទ្ធិដោយ thmeythmey.com