ក្រសួងមហាផ្ទៃ អនុញ្ញាតឱ្យបង្កើតបក្សដើម្បីកម្ពុជា(គ.ដ.ក)​ តាមការស្នើសុំរបស់លោក សុខសុវណ្ណ ។ បក្សនេះ មានទីស្នាក់ការកណ្ដាលនៅ ភូមិព្រៃល្ង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។ ក្រោយទទួលបានការអនុញ្ញាតនេះ លោក សុខសុវណ្ណ នឹងរៀបចំកែសម្រួលសញ្ញាសម្គាល់បក្សឡើងវិញ តាមការណែនាំរបស់ក្រសួង។ 

 

អតីតមន្ត្រីគណបក្សយុវជនកម្ពុជារូបនេះ បានបញ្ជាក់ប្រាប់សារព័ត៌មានថ្មីៗថា ដើម្បីឱ្យបក្សអាចដំណើរការទៅបានស្របតាមច្បាប់ស្ដីពី គណបក្សនយោបាយ លោកនឹងចុះប្រមូលស្នាមមេដៃ ឬប្រមូលសមាជិកឱ្យបាន ៤ ០០០នាក់។ 

 

បើតាមលោក សុវណ្ណ គោលបំណងនៃការបង្កើតបក្សដើម្បីកម្ពុជានេះឡើង ដោយសារស្រលាញ់ជាតិ ប្រជាធិបតេយ្យ និងដើម្បីប្រយោជន៍ជាតិជារួម ។ 

 

បរិបទនយោបាយនៅកម្ពុជាសព្វថ្ងៃ មានចរន្តនៃការចងសម្ព័ន្ធភាពពីរក្រុម។ ក្រុមទី១ បក្សនយោបាយចំនួន២៧ ចងសម្ព័ន្ធជាមួយបក្សកាន់អំណាច ។ ចំណែកមួយទៀត មានបក្ស៤ រួមមានបក្សភ្លើងទៀន បក្សឆន្ទៈខ្មែរ បក្សខ្មែររួបរួមជាតិ និងបក្សប្រជាធិបតេយ្យមូលដ្ឋាន ចងសម្ព័ន្ធភាពគ្នា។ 

 

នៅពេលចោទសួរទៅកាន់ លោក សុខសុវណ្ណ ថាតើបក្សថ្មីដែលនឹងចេញរូបរាងឡើងនេះ នឹងមានបំណង ចូលរួមចងសម្ព័ន្ធជាមួយបណ្ដាបក្សណាមួយឬទេ? តំណាងបក្ស ដើម្បីកម្ពុជារូបនេះ ពុំទាន់បានគិតទេ ។ ប៉ុន្តែលោក ឆ្លៀតបន្ថែមបែបនេះ៖ «បើសិនជាចូលរួមសម្ព័ន្ធ ក៏ត្រូវពិនិត្យមើលដែរ ថាចូលនោះដើម្បីប្រយោជន៍កម្ពុជា ឬដើម្បីប្រយោជន៍បុគ្គល! ប៉ុន្តែ បើសិនចូលសម្ព័ន្ធ ដើម្បីបម្រើផលប្រយោជន៍ជាតិច្បាស់លាស់ ខ្ញុំនឹងសម្រេចចិត្តចូល»។ 

 

ប៉ុន្មានខែមកនេះ លោក ឯ​ម សុខសុវណ្ណ បានស្នើទៅក្រសួងមហាផ្ទៃចំនួនពីរលើកមកហើយ ប៉ុន្តែត្រូវបានក្រសួងបដិសេធ។ លើកទីមួយ គេឃើញលោក សុវណ្ណ ស្នើសុំបង្កើតបក្សអាយ៉ងខ្មែរ និងលើកទីពីរ បក្សខ្ញុំបម្រើខ្មែរ ។ ប៉ុន្តែក្រសួងមហាផ្ទៃ បានចេញលិខិតបដិសធ ដោយមិនបានបញ្ជាក់ហេតុផលអ្វីឡើយ។ 

 

តែការព្យាយាមគង់បានសម្រេច ដោយលោក សុខសុវណ្ណ បានប្ដូរឈ្មោះបក្ស មកជា គណបក្សដើម្បីកម្ពុជា វិញ ក៏ទទួលបានការអនុញ្ញាតពីក្រសួងមហាផ្ទៃ តែម្ដង។ 

 

សូមជម្រាបថា កាលពីអំឡុងពេលបោះឆ្នោតថ្នាក់ជាតិអាណត្តិទី៧នេះ លោក ឯម សុខសុវណ្ណ គឺជាតំណាងរាស្ត្រឈរឈ្មោះនៅមណ្ឌលខេត្តស្វាយរៀង នៃគណបក្សយុវជនកម្ពុជា។ ប៉ុន្តែក្រោយការបោះឆ្នោតមួយថ្ងៃ ពោលគឺនៅថ្ងៃទី២៤ កក្កដា គេឃើញលោក សុវណ្ណ បង្ហោះលិខិតលាឈប់ពីបក្សយុវជនកម្ពុជា៕