លោក Luis Manuel Diaz ជាឪពុករបស់ Luis Diaz កាលពីថ្ងៃទី២៨ ខែតុលា និងប្រពន្ធរបស់លោក ត្រូវបានខ្មាន់កាំភ្លើងចាប់ខ្លួន។ បើតាមកាមេរ៉ាសុវត្ថិភាពដែលបានដាក់នៅជិតទីតាំងកើតហេតុ បង្ហាញថា ឪពុករបស់ Diaz អំឡុងពេលចាប់ខ្លួន លោកបានស្ថិតនៅក្នុងរថយន្ត ខណៈដែលម្តាយរបស់គេ ស្ថិតនៅខាងក្រោយរថយន្ត។ 
 

អ្នកស្រី Cilenis Marulanda រួចខ្លួនចេញពីការចាប់ជំរិត បន្ទាប់ពីក្រោយពេលកើតហេតុភ្លាមៗ ក្រុមប៉ូលិសក្នុងតំបន់បានទៅជួយសង្គ្រោះអ្នកស្រីទាន់ពេល ប៉ុន្តែលោក Manuel Diaz ដែលស្ថិតនៅក្នុងរថយន្តត្រូវបានខ្នាន់កាំភ្លើងនាំយកទៅ។ ម្តាយឪពុករបស់កីឡាករ Diaz មានទីលំនៅស្ថិតនៅក្នុងទីក្រុងមួយឈ្មោះ Barrancas នៅក្នុងខេត្ត ​La Guajira ប្រទេសកូឡុំប៊ី ក្បែទៅនឹងប្រទេសវ៉េណេស៊ុយអេឡា។ ក្រុមឧទ្ទាម ELN គឺជាក្រុមទ័ពព្រៃដ៏សកម្មមួយដែលនៅសេសសល់ដ៏សំខាន់របស់ប្រទេសកូឡុំប៊ី ហើយក្រុមឧទ្ទាមមួយនេះបានកើតឡើងតាំងពីឆ្នាំ ១៩៦៤ និងមានសមាជិកដល់ពេលបច្ចុប្បន្នប្រមាណ ២,៥០០នាក់។
  

មកដល់ពេលនេះមន្ត្រីប៉ូលិស និងទាហានប្រទេសកូឡុំប៊ីច្រើនរយនាក់កំពុងតែបំពេញការងារក្នុងការស្វែងរក និងជួយសង្គ្រោះឪពុករបស់ Diaz នៅក្នុងទីក្រុង Serrania de Perija ដែលជាតិក្រុងព្រំដែនរវាងកូឡុំប៊ី និងវ៉េណេស៊ុយអេឡា។ បើតាមសេចក្តីថ្លែងការណ៍របស់រដ្ឋាភិបាលកូឡុំប៊ី ឪពុករបស់ Diaz ត្រូវបានក្រុមឧន្ទាមបញ្ជូនទៅដល់ក្នុងប្រទេសវ៉េណេស៊ុយអេឡា ហើយក៏បានទាមទារឱ្យមានការដោះលែងជាបន្ទាន់លើឪពុក Diaz។ មកដល់ពេលនេះក្រុមមន្ត្រីបូលិស ទាហានរុករកបានរកឃើញ ម៉ូតូ ២គ្រឿង និងរថយន្ត ដែលក្រុមចាប់ជំរិតបានប្រើពេលធ្វើសកម្មភាព។
 

«ត្រូវតែមានការដោះលែងជាបន្ទាន់សម្រាប់លោក Luis Manuel Diaz។ យើងសូមដាស់តឿនទៅកាន់ក្រុមឧទ្ទាម ELN ដែលបានចាប់ជំរិតគឺជាអំពើឧក្រិដ្ឋកម្មដែលបំពានលើច្បាប់មនុស្សធម៌អន្តរជាតិ ហើយវាជាកាតព្វកិច្ចរបស់ ELN របស់ពួកគេដែលជាផ្នែកមួយនៃដំណើរការសន្តិភាពបច្ចុប្បន្ន ដើម្បីមិនត្រឹមតែបឈ្ឈប់ការចាប់ជំរិតប៉ុណ្ណោះទេ ប៉ុន្តែថែមទាំងបណ្តេញពួកគេជារៀងរហូត។»។ នេះបើតាមសម្តីប្រធានគណៈប្រតិភូរដ្ឋាភិបាលចរចាជាមួយក្រុម ELN លោក Otty Patino។
 

កាលពីប៉ុន្មានថ្ងៃមុនរវាងរដ្ឋាភិបាលកូឡុំប៊ី និងក្រុម ELN ក៏បានរៀបចំកិច្ចចរចាសន្តិភាពមួយផងដែរ ប៉ុន្តែការចរចាឱ្យដោះលែងនោះ ត្រូវបានរងបរាជ័យ ប៉ុន្តែមកដល់ពេលនេះ ប្រធានាធិបតីកូឡុំប៊ី លោក Gustavo Petro ក៏បានប្រើប្រាស់យុទ្ធសាស្ត្រក្នុងការស្វែងរកសន្តិភាព គឺរដ្ឋាភិបាលរបស់លោករៀបចំការចរចាជាមួយក្រុមឧទ្ទាមឡើងវិញ។
 

យ៉ាងណា នាថ្ងៃទី១ ខែវិច្ឆិកា មនុស្សរាប់រយនាក់នៅក្នុងប្រទេសកូឡុំប៊ី បានអមដំណើររបស់អ្នកស្រី Cilenis Marulanda ម្តាយរបស់កីឡាករ Diaz ក្នុងពេលដែលមានការដង្ហែរទាមទារឱ្យមានការដោះលែងលោក Luis Manuel Diaz៕