ជាតិ
រូបផ្ដល់ឱ្យដោយលោក គង់ សម័យ កូនប្រុសរបស់ព្រឹទ្ធាចារ្យ គង់ ណៃ
×![]()
ដោយ: ប៉ូ សាគុន
ភ្នំពេញ៖ ខណៈពេលនេះ ព្រឹទ្ធាចារ្យ គង់ ណៃ មានសុខភាពល្អប្រសើរជាងមុខបន្តិច ក្រោយពីលោកមានអាការព្រឺរងា និងរឹងថ្គាម កាលពីម៉ោងជាង២យប់។ ទោះជាយ៉ាងណា សុខភាពរបស់លោក នៅតែខ្សោយ ហើយស្មារតី ក៏វង្វេងផង។ 
លោក គង់ សម័យ ត្រូវជាកូមប្រុសរបស់ព្រឹទ្ធាចារ្យ គង់ ណៃ បានប្រាប់សារព័ត៌មានថ្មីៗថា ឪពុករបស់លោក បានធូរស្រាយបន្តិច នៅពេលព្រឹក ក្រោយពីបានព្យួរសេរ៉ូមនៅផ្ទះ។ យ៉ាងណាក៏ដោយ លោកថាគ្រួសារ ក៏ចង់បញ្ជូនព្រឹទ្ធាចារ្យទៅពេទ្យដែរ ប៉ុន្តែដោយសារខ្វះខាតថវិកា ទើបបានជាសម្រេចចិត្ត ព្យាបាលព្រឹទ្ធារ្យនៅផ្ទះ។
«ពេលនេះគាត់បានធូរជាងមុនបន្តិច។ យប់មិញម៉ោងជាង២ គាត់ចាប់ព្រឺរងារ និងរឹងថ្គាម ប៉ុន្តែព្រឹកឡើងបានរាងធូរ យើងក៏ដាក់ស៊ឺរ៉ូមឱ្យគាត់នៅផ្ទះ។ ពួកយើងចង់យកគាត់ទៅពេទ្យដែរ ប៉ុន្តែយើងខ្វះថវិកា ស្របពេលគាត់បានធូរផង ក៏នៅព្យាបាលនៅផ្ទះ ព្រោះអស់ថ្លៃចំណាយតិច»។ នេះជាការបញ្ជាក់របស់លោក គង់ សម័យ។
លោក សម័យ បន្ថែមថា ស្មារតីរបស់ឪពុកលោក ចាប់ផ្ដើមវង្វេងតាំងពីប្រមាណ១ឆ្នាំមុន៖«គាត់វង្វេងប្រហែល១ឆ្នាំហើយ។ កូនៗទាំងអស់ គាត់អត់សូវចាំទេ ទាល់តែរំលឹកច្រើន ទើបគាត់ចាំខ្លះ។ ពេលខ្លះគាត់អត់ចាំតែម្ដង»។
បច្ចុប្បន្នព្រឹទ្ធាចារ្យកោសល្យវោហារ គង់ ណៃ មានជន្មាយុ៧៨ឆ្នាំ។ លោករស់នៅស្រុកកំណើត ក្នុងភូមិដូង ឃុំស្វាយទងខាងជើង ស្រុកកំពង់ត្រាច ខេត្តកំពត។ លោកមានកូន១០នាក់ស្រី៤ ហើយក្នុងចំណោមកូនទាំងអស់ មានតែកូនប្រុសម្នាក់ប៉ុណ្ណោះ ដែលបន្តកេរចាប៉ីពីលោក។
កាលពីឆ្នាំ២០១៧ ព្រឹទ្ធាចារ្យ បានទទួលពានរង្វាន់មួយ ពីប្រទេសជប៉ុន ដែលមានឈ្មោះថា”ពានរង្វាន់សិល្បៈវប្បធម៌ហ្វុគុអូកា Fukuoka Prize)”។
សូមរំលឹកថា ព្រឹទ្ធាចារ្យ គង់ ណៃ ធ្លាប់បានធ្លាក់ខ្លួនឈឺ តាំងពីឆ្នាំ២០១៩មកម្ល៉េះ ដោយកាលនោះលោកមានអាការមិនឃ្លានអាហារ ពិបាលបន្ទោបង់ ក្អកធ្លាក់ឈាម។ គ្រូពេទ្យថា នោះបណ្ដាលមកពីជំងឺសួត ឈាមស និងជំងឺរបេង។ ទោះជាយ៉ាងណា លោកព្រឹទ្ធាចារ្យ បានធូរស្បើយឡើយវិញ ក្រោយពីទទួលបានការព្យាបាលទៀតទាត់។
ព្រោះតែក្រុមគ្រួសាររបស់ព្រឹទ្ធាចារ្យ គង់ ណៃ មានការខ្វះខាតថវិកាព្យាបាលជំងឺ សហគមន៍ចាប៉ីអមតៈ ក៏បានកៀរគរថវិកាពីសម្បុរសជន ដើម្បីយកទៅជួយសម្រួល ការព្យាបាលរបស់ព្រឹទ្ធាចារ្យផងដែរ។ ហើយសហគមន៍ចាប៉ីដងវែង ក៏បានអំពាវនាវដល់សប្បុរសជនទាំងអស់ មេត្តាជួយតាមសទ្ធា ដើម្បីជួយព្យាបាលព្រឹទ្ធាចារ្យផងដែរ៕
Tag:
ព្រឹទ្ធាចារ្យ
ចាប៉ីដងវែង
វប្បធម៌
© រក្សាសិទ្ធិដោយ thmeythmey.com
