អ្នកស្រាវជ្រាវ និងជាបុរាណវិទូ លោក អ៊ឹម សុខរិទ្ធី ពន្យល់ថា ករណីស្ដេចពុំមានបុត្រា​សម្រាប់ស្នងរាជ្យបន្ត គេត្រូវរកបងប្អូនប្រុសខ្សែខាងមហេសីឱ្យឡើងសោយរាជ្យនគរបន្ត។ ប៉ុន្តែក្នុងករណី មានអ្នកជ្រែករាជ្យ ស្ដេចដែលមកថ្មីត្រូវយកកូនស្រីស្ដេចចាស់ជាមហេសីទើបមានសិទ្ធិស្របច្បាប់​ក្នុងការគ្រងរាជ្យ។ តែក្នុងករណីស្ដេចចាស់ពុំមានកូនស្រីឬបុត្រី ស្ដេចមកថ្មីត្រូវរៀបអភិសេក​ជាមួយមហេសីស្ដេចមុន ជាមហេសី ឬប្រពន្ធទីមួយ ទើបស្របច្បាប់ឡើងគ្រប់គ្រងនគរមួយបាន៕