កីឡារាំ៖ លោកស្រី ហ៊ុន ស៊ីណាត ផ្តាំគណៈកម្មការរៀបចំ ដាក់ពិន្ទុឱ្យត្រឹមត្រូវ គ្មានបក្ខពួក

កីឡាជាតិ

ជាតិ

កីឡារាំ៖ លោកស្រី ហ៊ុន ស៊ីណាត ផ្តាំគណៈកម្មការរៀបចំ ដាក់ពិន្ទុឱ្យត្រឹមត្រូវ គ្មានបក្ខពួក

11, Dec 2023 , 1:59 pm

រូបភាព

ដោយ: ទេព ពិទូរ្យ

ការប្រកួតកីឡារាំជ្រើសរើសជើងឯកថ្នាក់ជាតិឆ្នាំ២០២៣ ធ្វើឡើងនៅសាលដំបូលទូក នៃមជ្ឈមណ្ឌលជាតិហ្វឹកហ្វឺនកីឡា ក្នុងពហុកីឡដ្ឋានជាតិអូឡាំពិក ថ្ងៃទី១១ ខែធ្នូ។ លោកស្រី ហ៊ុន ស៊ីណាត ផ្តាំគណៈកម្មការ រៀបចំការប្រកួត គណៈកម្មការបច្ចេកទេស និងចៅក្រម ត្រូវឈរលើស្មារតីទទួលខុសត្រូវ ដាក់ពន្ទុដោយយុត្តិធ៌ម សុក្រិត្យ មិនលំអៀង និងមិនប្រកាន់បក្ខពួក។

បង្ហាញវត្តមានលើកដំបូងក្នុងនាមអ្នកបើកកម្មវិធីការប្រកួតកីឡារាំជ្រើសរើសជើងឯកថ្នាក់ជាតិឆ្នាំ២០២៣ លោកស្រី ហ៊ុន ស៊ីណាត បង្ហាញក្តីរីករាយ និងអរគុណក្រសួងអប់រំ យុវជន និង កីឡា ដែលផ្តល់ឱ្យសហព័ន្ធកីឡារាំកម្ពុជា រៀបចំព្រឹត្តិការណ៍នេះឡើង។ លោកស្រី ចាត់ទុកព្រឹត្តិការណ៍នេះ ជាការឆ្លុះបញ្ចាំងសមត្ថភាព បទពិសោធន៍ បច្ចេកទេសថ្មី និងទេពកោសល្យរបស់កីឡាករ-កីឡាការិនី ក្រោយទទួលការហ្វឹកហាត់ច្រើនឆ្នាំ មុនចូលរួមប្រកួតប្រជែងនៅពេលនេះ។

នៅចំពោះមុខអ្នកចូលរួម ដែលមានក្រុមគ្រូបង្វឹក អត្តពលិកកីឡារាំទាំងអស់ លោកស្រី ឧកញ៉ា បានផ្តែផ្តាំគណៈកម្មការរៀបចំការប្រកួត បច្ចេកទេស និងចៅក្រម ត្រូវផ្តល់ពិន្ទុដល់កីឡាករកីឡាការិនីដោយឈរលើភាពយុត្តិធ៌ម សុក្រិត្យ មិនលំអៀង និងមិនប្រកាន់បក្ខពួក ដើម្បីឱ្យវិស័យកីឡានេះកាន់តែមានការអភិវឌ្ឍន៍ប្រកបដោយសមត្ថភាព។

លើសពីនេះ លោកស្រី ហ៊ុន ស៊ីណាត ក៏បានណែនាំកីឡាករ កីឡាការិនីទាំងអស់ ត្រូវខិតខំយកចិត្តទុកដាក់គោរបទបញ្ជាការប្រកួតនានាដែលសហព័ន្ធកីឡារាំកម្ពុជា ក៏ដូចជាគណៈកម្មាធិការអូឡាំពិកបានកំណត់ ដើម្បីជាផ្លូវទៅចូលរួមប្រកួតកីឡារាំអន្តរជាតិនានានៅពេលខាងមុខ។

ដោយឡែកលោកស្រី ញ៉ែម មរកត ប្រធានសហព័ន្ធកីឡារាំកម្ពុជា បានសូមណូមពរ មន្ត្រីថ្នាក់ដឹកនាំ គណៈកម្មាធិការប្រតិបត្តិ គ្រូបង្វឹក និងកីឡាករ កីឡាការិនី រក្សាឱ្យបានសាមគ្គីភាពផ្ទៃក្នុង និងបង្កើនការសហការគ្នា ដើម្បីឱ្យវិស័យកីឡានេះឆ្ពោះទៅមុខ និងទទួលបានការគាំទ្រកាន់តែច្រើន។

ការប្រកួតកីឡារាំជ្រើសរើសជើងឯកថ្នាក់ជាតិប្រចាំឆ្នាំ ២០២៣ មានក្លិបចូលរួមចំនួន៥ ក្នុងនោះមានអត្តពលិកសរុប ៤៤រូប ដោយប្រកួតប្រជែងលើ ២០វិញ្ញាសា។ ទាំង៥ក្លិប រូមមាន ក្លិបសាលាវេស្ទឡាញន៍ ខេត្តកណ្តាល ក្រសួងមហាផ្ទៃ ក្រសួងការពារជាតិ និងក្លិបខេត្តកំពង់ចាម។