ជាតិ
សុខភាព
កម្ពុជារកឃើញករណីជំងឺអុតស្វាលើបុរសអាយុ២៨ឆ្នាំម្នាក់នៅភ្នំពេញ រូបតំណាង
× ក្រសួងសុខាភិបាល នាថ្ងៃទី១៣ ខែធ្នូ នេះ បានប្រកាសពីការរកឃើញករណីជំងឺអុតស្វាលើបុរសអាយុ២៨ឆ្នាំម្នាក់ ដែលរស់នៅភូមិប៉េសេ សង្កាត់ទឹកថ្លា ខណ្ឌសែនសុខ រាជធានីភ្នំពេញ។
បើតាមក្រសួង បុរសនេះ ចាប់ផ្តើមមានរោគសញ្ញានៅប្រដាប់ភេទ បន្ទាប់មករាលដាលដល់កខាងស្តាំ ថ្ពាល់ កំភួនដៃ និងជើង ហើយត្រូវបញ្ជូនទៅធ្វើតេស្តនៅវិទ្យាស្ថានសុខភាពសាធារណៈ នាថ្ងៃទី១១ ខែធ្នូ។ បន្ទាប់ពីទទួលបានលទ្ធផលវិជ្ជមានវីរុសអុតស្វា អ្នកជំងឺត្រូវបានដាក់ឱ្យសម្រាកព្យាបាលដាច់ដោយឡែក។
បច្ចុប្បន្ន ក្រុមឆ្លើយតបបន្ទាន់របស់ក្រសួងសុខាភិបាល កំពុងអង្កេតស្រាវជ្រាវរកប្រភពចម្លង និងស្វែងរកករណីសង្ស័យ និងអ្នកប៉ះពាល់ដើម្បីទប់ស្កាត់ការចម្លងនៅក្នុងសហគមន៍។
វីរុសអុតស្វា ឆ្លងពីមនុស្សម្នាក់ទៅមនុស្សម្នាក់ តាមរយៈការរួមភេទគ្រប់ទម្រង់ជាមួយអ្នកជំងឺអុតស្វា និងការប៉ះពាល់ដោយផ្ទាល់នឹងកន្លែងមានដំបៅ ទឹកសារពាង្គកាយ ទឹកមាត់ ដំណក់តូចៗ តាមផ្លូវដង្ហើម និងសម្ភារប្រើប្រាស់ដែលប្រឡាក់ជាមួយនឹងវីរុស រួមមានសម្លៀកបំពាក់ ពូក កន្សែង ស្លាបព្រា ចាន កែវទឹក ជាដើម។
ជាមួយគ្នានេះ វីរុសអុតស្វា ក៏អាចឆ្លងពីម្តាយទៅកូនតាមរយៈទងសុក ក្នុងអំឡុង ឬក្រោយពេលសម្រាលតាមរយៈការប៉ះផ្ទាល់ ក្នុងករណីស្ត្រីមានផ្ទៃពោះ ឬឪពុកម្តាយមានជំងឺអុតស្វា៕
© រក្សាសិទ្ធិដោយ thmeythmey.com