ជាតិ
សុំទិដ្ឋាការទៅបារាំង និង១២ប្រទេសផ្សេងទៀតនៅអឺរ៉ុប អាចធ្វើឡើងនៅមជ្ឈមណ្ឌល TLScontact
× ឯកអគ្គរដ្ឋទូតបារាំងប្រចាំកម្ពុជា លោក ហ្សាក់ ប៉ឺឡេ កាលពីល្ងាចថ្ងៃទី១៩ ខែធ្នូ បានបើកសម្ពោធមជ្ឈមណ្ឌល TLScontact ដើម្បីស្វាគមន៍ការដាក់ពាក្យសុំទិដ្ឋាការទៅប្រទេសបារាំង និងប្រទេស១២ទៀតនៅអឺរ៉ុប (តំបន់ស៊ែនហ្គែន)។
ស្ថិតនៅជាន់ទី៥ នៃអគារវឌ្ឍនៈ TLScontact បានដំណើរការចាប់តាំងពីថ្ងៃទី១៣ ខែធ្នូ មក មុននឹងឈានដល់ពិធីសម្ពោធផ្លូវការ។ មជ្ឈមណ្ឌលថ្មីនេះ ត្រូវបានជ្រើសរើសឱ្យទទួលសាធារណជន ផ្តល់ព័ត៌មាន រៀបចំការណាត់ ទទួលពាក្យសុំទិដ្ឋាការ និងប្រមូលថ្លៃសេវា។ ការដកលិខិតឆ្លងដែនក៏ធ្វើនៅមជ្ឈមណ្ឌលនេះផងដែរ។
តាមសេចក្តីប្រកាសព័ត៌មានរបស់ស្ថានទូតបារាំងប្រចាំកម្ពុជា ការជ្រើសរើសមជ្ឈមណ្ឌលខាងលើឲ្យទទួល ពាក្យសុំទិដ្ឋាការគឺបានបង្ហាញពីឆន្ទៈរបស់ស្ថានទូតបារំាងក្នុងការកែលម្អលក្ខខណ្ឌទទួលស្វាគមន៍អ្នកស្នើ សុំទិដ្ឋាការដែលមានចំនួនកើនឡើងជាលំដាប់ ក៏ដូចជាជួយកាត់បន្ថយថិរវេលានៃការណាត់ និងផ្តល់សេវា ផ្សេងៗបន្ថែម ដើម្បីធានាផាសុកភាពប្រសើរបំផុតរបស់អ្នកស្នើសុំទិដ្ឋាការ។
TLScontact ស្វាគមន៍អ្នកស្នើសុំទិដ្ឋាការពីថ្ងៃចន្ទដល់ថ្ងៃសុក្រ (ពីម៉ោង៨ព្រឹកដល់ម៉ោង៤រសៀល) ឬនៅម៉ោងណាមួយក្រៅពីនេះបើមានតម្រូវការ និងនៅព្រឹកថ្ងៃសៅរ៍។ មជ្ឈមណ្ឌលនេះក៏ផ្តល់ផងដែរនូវសេវាផ្សេងៗទៀតដូចជាការជួយរៀបចំឯកសារ ឬការទៅយកស្នាមខ្ចៅដៃ(ស្នាមម្រាមដៃ)ដល់គេហដ្ឋានអ្នកស្នើសុំទិដ្ឋាការ។
ទោះយ៉ាងណាក៏ដោយ ការប្រើប្រាស់សេវាបន្ថែមទាំងនេះមិនធានានូវការទទួលបានទិដ្ឋាការ ឬការណាត់ជួបឆាប់ រហ័ស ឬការពិនិត្យពាក្យសុំលឿនជាងអ្នកផ្សេងដោយសា្ថនទូតបារាំងនោះទេ។
ពលរដ្ឋកម្ពុជាទាំងអស់ត្រូវស្នើសុំទិដ្ឋាការដើម្បីអាចធ្វើដំណើរទៅប្រទេសបារាំង មិនថារយៈពេលស្នាក់នៅប៉ុន្មានថ្ងៃ ឬកាន់ឯកសារធ្វើដំណើរអ្វីនោះទេ (លិខិតឆ្លងដែនធម្មតា ផ្លូវការ ឬការទូត) លើកលែងតែករណីពួកគេមានប័ណ្ណស្នាក់នៅបារាំងដែលនៅមានសុពលភាព សម្រាប់ការស្នាក់នៅប្រទេសបារំាង ឬប្រទេសណាមួយនៃតំបន់ស៊ែនហ្គែន រួមមាន បែលហ្សិក អេស្ប៉ាញ អេស្តូនី ក្រិច ហុងគ្រី អ៊ីស្លង់ ឡេតូនី ម៉ាល់ត៍ ន័រវេស ព័រទុយហ្កាល់ ស្លូវ៉េនី និងសាធារណរដ្ឋឆែក៕
© រក្សាសិទ្ធិដោយ thmeythmey.com