ត្រូវរៀបផ្ទះខ្លួនឯងឱ្យស្អាត! ត្រូវប្រែក្លាយទ្រឹស្តីទៅជាការអនុវត្តឱ្យមានលទ្ធផលជាផ្លែផ្កាជាក់ស្តែងលើដី! សម្តេច នាយករដ្ឋមន្ត្រី ហ៊ុន ម៉ាណែត កម្រភ្លេចណាស់ពីការលើកឡើងដដែលៗបែបនេះ ទៅកាន់មន្ត្រីគ្រប់ជាន់ថ្នាក់។ កត្តាមួយដ៏សំខាន់ដើម្បីធានាភាពរលូននៃដំណើរទៅមុខរបស់រដ្ឋាភិបាល គឺកំណែទម្រង់រដ្ឋបាលសាធារណៈ។ ទាក់ទងនឹងបញ្ហានេះ លោក ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានបញ្ជាក់ថា គ្រប់គ្នាពិតជាមានឆន្ទៈដើម្បីសាងសមិទ្ធផលទុកជូនអ្នកជំនាន់ក្រោយ។
រដ្ឋាភិបាលអណត្តិទី៧ បានបោះជំហានចូលដល់ខែទី៤របស់ខ្លួន ហើយកាលពីថ្ងៃទី២០ ខែធ្នូ ក៏ជាជំនួបសំណេះ សំណាលលើកទី៤ផងដែរ រវាងរដ្ឋមន្ត្រីក្រសួងមុខងារសាធារណៈជាមួយថ្នាក់ដឹកនាំ និងមន្ត្រីបច្ចេកទេស។ ក្នុងជំនួប ក្រៅពីគោលបំណងឈ្វេងយល់ពីគ្នាទៅវិញទៅមក លោក ហ៊ុន ម៉ានី ស្តាប់របាយការណ៍ ការចែករំលែកបទពិសោធន៍ ព្រមទាំងការលើកឡងនូវបញ្ហាប្រឈមនានាដើម្បីសិក្សា និងរកដំណោះស្រាយ។ ទាំងនេះ គឺជាឆ្លើយតបទៅនឹងការងារកំណែរទម្រង់រដ្ឋបាលសាធារណៈ។
«ការងារកែទម្រង់នៃប្រព័ន្ធរដ្ឋបាលសាធារណៈ យើងមិនមែនត្រឹមតែនិយាយទេ តែយើងត្រូវតែធ្វើ ហើយធ្វើឱ្យចេញជាលទ្ធផល»។ លោករដ្ឋមន្ត្រី ហ៊ុន ម៉ានី បានបញ្ជាក់យ៉ាងដូច្នេះទៅកាន់មន្ត្រីក្រោមឱវាទរបស់ខ្លួន ដែលត្រូវបានដកស្រង់ដោយទំព័រហ្វេសប៊ុកផ្លូវការរបស់ក្រសួងមុខងារសាធារណៈ។
ដូចគ្នាផងដែរ នៅចំពោះមុខថ្នាក់ដឹកនាំ និងមន្ត្រីបច្ចេកទេសអគ្គលេខាធិការនៃគណៈកម្មាធិការកែទម្រង់រដ្ឋបាលសាធារណៈនៅសាលាភូមិន្ទរដ្ឋបាល កាលពីថ្ងៃទី២១ ខែធ្នូ រដ្ឋមន្ត្រីរូបនេះ បានអះអាងថា៖ «យើងពិតជាមានឆន្ទៈ ក្នុងការកែទម្រង់ពិតប្រាកដ ហើយយើងសុទ្ធតែមានចំណែកស្មើៗគ្នា ក្នុងការជំរុញ និងធ្វើទំនើបកម្មប្រព័ន្ធមុខងារសាធារណៈ … កែប្រែចក្ខុវិស័យនៃការកែទម្រង់រដ្ឋបាលសាធារណៈរបស់សម្តេចធិបតី ឱ្យក្លាយជាសមិទ្ធផល បន្សល់ទុកជូនដល់អ្នកជំនាន់ក្រោយ»។
លទ្ធផលផ្លែផ្កាជាក់ស្តែងលើដី! នេះជាអ្វីដែលសម្តេចនាយករដ្ឋមន្ត្រី ហ៊ុន ម៉ាណែត ចង់បាន ហើយក៏ជាអ្វីដែលលោក ហ៊ុន ម៉ានី តាំងចិត្តសម្រេចឱ្យបានផងដែរក្នុងនាមជារដ្ឋមន្ត្រីក្រសួងមុខងារសាធារណៈ។
តាមទំព័រហ្វេសប៊ុកខ្លួន ក្រសួងមុខងារសាធារណៈ បានបង្ហាញពីការបំពេញមុខងាររបស់អគ្គាធិការដ្ឋានលើផ្នែកអធិការកិច្ច ការវាយតម្លៃគុណភាពនៃប្រព័ន្ធមុខងារសាធារណៈ និងការវាយតម្លៃគុណភាពនៃសេវាសាធារណៈ អនុលោមតាមលិខិតបទដ្ឋានគតិយុត្តផ្សេងៗ។
នាថ្ងៃទី២២ ខែធ្នូ នេះ ក្រសួងមុខងារសាធារណៈ បានប្រកាសលទ្ធផលបេក្ខជនប្រឡងជ្រើសរើសមន្រ្តីកសិកម្មឃុំ ដោយមានអ្នកជាប់ចំនួន ២៥០នាក់ ក្នុងនោះមានស្រ្តីចំនួន ៩៤នាក់។ ក្នុងដំណើរការរៀបចំប្រកាសលទ្ធផលនៅ លោក ហ៊ុន ម៉ានី បានវាយតម្លៃថា បេក្ខជនដែលប្រឡងជាប់ សុទ្ធសឹងតែជាបេក្ខជនមានសមត្ថភាពពិតប្រាកដ ទាំងចំណេះដឹងទូទៅ ជំនាញ និងភាសា។
ក្រោយប្រឡងជាប់ មន្រ្តីកសិកម្មឃុំទាំង២៥០នាក់ នឹងត្រូវចូលរួមវគ្គបណ្ដុះបណ្ដាលរយៈពេល ១ឆ្នាំជាមុនសិន នៅខែកុម្ភៈ ឆ្នាំ២០២៤ខាងមុខ។ តាមរយៈការប្រឡងនេះ ក្រសួងមុខងារសាធារណៈ និងក្រសួងកសិកម្ម ក៏បានរៀបចំបេក្ខជនបម្រុងចំនួន ១០នាក់ក្នុងមួយស្រុក ដើម្បីត្រៀមក្នុងករណីបេក្ខជនឈប់ដោយប្រការណាមួយ។
ការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំ-សង្កាត់ ស្ថិតក្នុងចំណោមគោលនយោបាយអាទិភាពទាំង៦នៃយុទ្ធសាស្ត្របញ្ចកោណ ដំណាក់កាលទី១របស់សម្តេចនាយករដ្ឋមន្ត្រី ហ៊ុន ម៉ាណែត ដើម្បីជំរុញការលើកកម្ពស់ផលិតភាពកសិកម្ម និងជួយដល់គ្រួសារកសិករ ក្នុងការលើកស្ទួយផលិតផលកសិកម្មរបស់ខ្លួន និងការរៀបចំឱ្យមានសមាគមកសិករនៅតាមទីជនបទ៕