នៅក្នុងខែវិច្ឆិកា ឆ្នាំ២០២៣ លោក Hua Quoc Anh បានបង្ហោះវីដេអូលើបណ្តាញសង្គម TikTok របស់ខ្លួនដែលមានអ្នកតាមដានរហូតដល់៧០ម៉ឺនគណនី ដោយមានភ្ជាប់ជាមួយវីដេអូស្រ្តីពាក់ឈុតបុរាណថៃដើរនៅជុំវិញប្រាសាទអង្គរវត្ត ក្នុងខេត្តសៀមរាប។ 

 

វីដេអូនោះ ក៏មានភ្ជាប់មកជាមួយទង់ជាតិ និងស្តេចថៃផងដែរ រួមជាមួយនឹងការបញ្ចូលសំឡេង «សួស្តីប្រទេសថៃ»។ វីដេអូបែបនេះ បានបង្កឱ្យប្រជាជនវៀតណាម និងកម្ពុជារិះគន់យ៉ាងខ្លាំង។ នេះបើតាមការចុះផ្សាយរបស់សារព័ត៌មាន Vietnam Express។​

 

ក្រោយការបង្ហោះវីដេអូដែលខុសបែបនោះ លោក Hua Quoc Anh ត្រូវបានអាជ្ញាធរវៀតណាមផាកពិន័យ។ តាមការប្រកាសរបស់អាជ្ញាធរហូជីមិញ នៅក្នុងថ្ងៃទី៣ ខែមករា លោក Hua Quoc Anh ត្រូវបានអាជ្ញាធរពិន័យក្នុងទំហំទឹកប្រាក់ប្រមាណ ៣០៦ដុល្លារ និងព្រមានបុរសរូបនេះ ឱ្យរៀនពីកំហុស និងគោរពច្បាប់វៀតណាម នៅពេលប្រើប្រាស់អ៊ីនធឺណិត និងបណ្តាញសង្គម។ 

 

ចំណែកអាជ្ញាធរអប្សរា បានចាត់ទុកវីដេអូនោះប៉ះពាល់ដល់បេតិកភណ្ឌ និងវប្បធម៌កម្ពុជាយ៉ាងខ្លាំង។ ស្របគ្នានេះ អាជ្ញាធរកម្ពុជា ក៏បានស្នើបណ្តាញសង្គម TikTok បិទវីដេអូខាងលើថែមទៀត៕