ជាតិ
២០២៤៖ ថវិការដ្ឋសម្រាប់ព្រះរាជកិច្ចព្រះមហាក្សត្រ និងព្រះវររាជមាតាមានជាង២២,៥លានដុល្លារ
× សម្រាប់ឆ្នាំ២០២៤ នេះ កញ្ចប់ថវិកាដែលរដ្ឋាភិបាលត្រៀមចំណាយក្រសួងព្រះបរមរាជវាំងមានចំនួន ៩២ ៤៤៣លានរៀល (ជាង២២,៥លានដុល្លារអាម៉េរិក)។ នេះបើតាមរបាយការណ៍ថវិកាសង្ខេបឆ្នាំ២០២៤ (Budget in Brief, Fiscal Year 2024)។
ថវិកាសង្ខេបដែលចងក្រងដោយនាយកដ្ឋានថវិកានីយកម្មនៃក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា គម្រោងចំណាយថវិកាក្រសួងព្រះបរមរាជវាំង គឺលើកម្មវិធី «ព្រះរាជកិច្ចព្រះករុណា និងព្រះមហាក្សត្រី ព្រះវររាជមាតាជាតិខ្មែរ»។
កម្មវិធីនេះ មានអនុកម្មវិធី៣ ដោយក្នុងចំណោមថវិកា ៩២ ៤៤៣លានរៀល។ ថវិកា ៣០ ៩៣០លានរៀល ចំណាយលើព្រះរាជសកម្មភាពក្នុងវិស័យសង្គមកិច្ច មនុស្សធម៌ វប្បធម៌ និងសាសនា, ៤ ២១០លានរៀលលើព្រះរាជបេសកម្មក្រៅប្រទេស និង ៥៧ ៣០៣លានរៀល លើកិច្ចការគាំទ្រថ្វាយព្រះរាជកិច្ច និងការគ្រប់គ្រងរដ្ឋបាលទូទៅ។
ក្រសួងព្រះបរមរាជវាំង ស្ថិតក្នុងចំណោមក្រសួង ស្ថាប័ន ដែលបានអនុវត្តថវិកាកម្មវិធីពេញលេញចាប់ពីឆ្នាំ២០១៨មក។ គម្រោងចំណាយនេះ មានគោលបំណងបម្រើការងារឱ្យកាន់តែប្រសើរថ្វាយព្រះមហាក្សត្រ និងសម្តេចព្រះមហាក្សត្រី ក្នុងការបំពេញព្រះរាជបេសកកម្មបម្រើប្រទេសជាតិឱ្យមានការអភិវឌ្ឍន៍ និងមានកិត្តិយសលើឆាកអន្តរជាតិ តាមព្រះរាជកិច្ចរបស់ព្រះអង្គ ដែលរដ្ឋធម្មនុញ្ញបានកំណត់។
កាលពីឆ្នាំ២០២៣ គម្រោងថវិកាជាតិសម្រាប់ក្រសួងព្រះបរមរាជវាំង មាន៨៥ ៩០៣លានរៀល ហើយគម្រោងចំណាយដែលខ្ពស់បំផុតសម្រាប់ព្រះមហាក្សត្រ និងសម្តេចម៉ែ គឺក្នុងឆ្នាំ២០០០ ដែលមាន ១០២ ៨១៥លានរៀល៕
© រក្សាសិទ្ធិដោយ thmeythmey.com