ជាតិ
គម្រោងចំណាយថវិកាជាតិសម្រាប់គ.ជ.ប. ក្នុងឆ្នាំ២០២៤ មាន ជាង៣៣លានដុល្លារ
× គម្រោងចំណាយថវិកាគណៈកម្មការជាតិរៀបចំការបោះឆ្នោត (គ.ជ.ប.) នៅឆ្នាំ២០២៤នេះ មានចំនួន ១៣៥ ៧៨៥លានរៀល (ជាង៣៣លានដុល្លារអាម៉េរិក)។ នេះបើតាមរបាយការណ៍ថវិកាសង្ខេបឆ្នាំ២០២៤ (Budget in Brief, Fiscal Year 2024) ផ្សាយដោយក្រសួងសេដ្ឋកិច្ច និងហិរញ្ញវត្ថុ។
គម្រោងចំណាយ គ.ជ.ប. នៅឆ្នាំ២០២៤ នេះ ផ្តោតលើកម្ពុជាចំនួន២ គឺសេវាគាំទ្រទូទៅ និង កិច្ចដំណើរការរៀបចំការបោះឆ្នោត។ សម្រាប់សេវាគាំទ្រទូទៅ មានកញ្ចប់ថវិកា ៤០ ៨៣៣លានរៀល ដែលនឹងប្រើប្រាស់ក្នុងការលើកកម្ពស់ប្រសិទ្ធភាពការផ្តល់សេវាគាំទ្រទូទៅ។
សម្រាប់កិច្ចដំណើរការរៀបចំការបោះឆ្នោត ពោលគឺការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ មានកញ្ចប់ថវិកាចំនួន ៩៤ ៩៥២លានរៀល ដោយ ៤៩ ១៣៤លានរៀល លើការពង្រឹងប្រសិទ្ធភាពនៃកិច្ចដំណើរការចុះឈ្មោះបោះឆ្នោត និង ៤៥ ៨១៨លានរៀល លើការពង្រឹងប្រសិទ្ធភាពនៃកិច្ចដំណើរការបោះឆ្នោត៕
Tag:
ថវិកាជាតិ
បោះឆ្នោត
ព្រឹទ្ធសភា
© រក្សាសិទ្ធិដោយ thmeythmey.com