ផ្សារបោះដុំអាស៊ាន-អន្តរជាតិ ឬ ផ្សារដើមគរថ្មី ដែលត្រូវបានសាងសង់ឡើងនៅលើផ្ទៃដី៣០ហិកតា ក្នុងខណ្ឌព្រែកព្នៅ នឹងបើកដំណើរការនៅពេលឆាប់ៗ។ បន្ទាប់ពីដំណើរការ ផ្សារនេះនឹងក្លាយជាកន្លែងបោះដុំផលិតផលកសិកម្មដ៏ធំរវាងកម្ពុជា-ចិន ដើម្បីផ្គត់ផ្គង់តម្រូវការក្នុងស្រុក។
ផ្សារដើមគរថ្មី ស្ថិតនៅតាមបណ្តោយមហាវិថីឈ្នះឈ្នះ ក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ ដែលបច្ចុប្បន្នត្រូវបានសាងសង់រួចក្នុងដំណាក់កាលទី១ដោយមានស្តង់លក់ដូរ ចំនួន ៦០០០ ស្តង់។ បើតាមលោក XIE LUPING អគ្គនាយកផ្សារបោះដុំអាស៊ាន-អន្តរជាតិ ផ្សារបោះដុំអាស៊ាន-អន្តរជាតិ នឹងដាក់ឱ្យប្រើប្រាស់នាអំឡុងពាក់កណ្តាលឆ្នាំ២០២៤។
ក្នុងពិធីចុះហត្ថលេខាដៃគូពាណិជ្ជកម្មសហប្រតិបត្តិការពាណិជ្ជកម្ម និងពិធីប្រគល់កូនសោជូនសហគ្រាស នាថ្ងៃទី១៨មករា លោក XIE LUPING បានបញ្ជាក់ថា ផ្សារនេះ នឹងជួយជំរុញយ៉ាងខ្លាំងដល់ពាណិជ្ជកម្មកសិផលរវាងកម្ពុជា-ចិន និងបណ្តាប្រទេសក្នុងតំបន់អាស៊ាន ជាមួយផលិតផលកសិកម្មដ៏សម្បូរបែប ដែលមានគុណភាព និងអនាម័យ។
លោកអគ្គនាយកផ្សារបោះដុំអាស៊ាន-អន្តរជាតិ បន្តនិយាយយ៉ាងដូច្នេះ៖ « យើងនឹងធ្វើការរួមគ្នាជាមួយដៃគូពាក់ព័ន្ធ ដើម្បីនាំយកកសិផល និងទំនិញដែលមានគុណភាពខ្ពស់ និងតម្លៃសមរម្យដល់ប្រជាជនប្រទេសទាំងពីរ និងជំរុញឱ្យកសិផលជាច្រើនរបស់កម្ពុជា ត្រូវបាននាំចេញទៅកាន់ទីផ្សារពិភពលោក តាមរយៈ មជ្ឈមណ្ឌលពាណិជ្ជកម្មអាស៊ាន-អន្តរជាតិ»។
បើតាមលោក XIE LUPING ប្រធានសភាពាណិជ្ជកម្មខេត្ត គ័ងស៊ី-កម្ពុជា ផ្សារបោះដុំធំជាងគេនៅកម្ពុជានេះ គឺអាចផ្ទុកទំនិញបានដល់ ៦ម៉ឺនតោន ហើយនឹងមានផលិតផលក្នុងស្រុក(កម្ពុជា) និងផលិតផលនាំចូលពីប្រទេសនានា ពិសេសប្រទេសជិតខាងដូចជា ចិន វៀតណាម និងថៃ ជាដើម។
កន្លងមក រដ្ឋបាលរាជធានីភ្នំពេញ តាមរយៈយន្តការនៃអនុគណៈកម្មាធិការវិនិយោគរាជធានីភ្នំពេញ បានជំរុញឱ្យមានការវិនិយោគបង្កើតផ្សារបោះដុំ និងលក់រាយផលិតផលកសិកម្ម បន្ថែមទៀត។ នេះជាការលើកឡើងរបស់លោក នួន ផារ័ត្ន អភិបាលរងរាជធានីភ្នំពេញ ដោយបានបន្ថែមថា ការវិនិយោគលើផ្សារបោះដុំនេះ មិនត្រឹមអាចរួមចំណែកដល់ការអភិវឌ្ឍសេដ្ឋកិច្ច តាមរយៈការទាក់ទាញវិនិយោគិនក្រៅស្រុកប៉ុណ្ណោះទេ ក៏ប៉ុន្តែ វាថែមទាំងជួយគាំទ្រដល់ពាណិជ្ជករ នៅពេលផលិតបានហើយ យកមកលក់នៅរាជធានីភ្នំពេញ ផងដែរ។
របាយការណ៍ក្រសួងកសិកម្ម រុក្ខាប្រមាញ់ និងនេសាទ បានបង្ហាញថា ក្នុងឆ្នាំ២០២៣ កម្ពុជាបាននាំកសិផលទៅកាន់ទីផ្សារអន្តរជាតិបាន ៨ ៤៤៩ ៤១៤,៣៦តោន ដែលមានតម្លៃប្រមាណ៤ពាន់លានដុល្លារអាម៉េរិក។ កសិផលដែលត្រូវបាននាំចេញនោះមាន ស្រូវ អង្ករ ផ្លែចេកស្រស់ ស្វាយ គ្រាប់ស្វាយចន្ទី ពោត ដំឡូងមី កៅស៊ូ មៀន ដូងប្រេង ម្រេច និងបន្លែស្រស់.... ជាដើម។
ដោយឡែក ទំនាក់ទំនងពាណិជ្ជកម្មរវាងកម្ពុជា និងចិន បានកើនដល់ទំហំជាង១២ពាន់លានដុល្លារ ក្នុងឆ្នាំ២០២៣ កើន ៥ភាគរយ បើធៀបនឹងឆ្នាំ២០២២។ ក្នុងនោះ ការនាំចេញរបស់កម្ពុជាសម្រេចបានជិត១,៥ពាន់លានដុល្លារ កើន១៩,២ភាគរយ ខណៈនាំចូលពីប្រទេសចិនវិញកើនក្នុងអត្រា៣ភាគរយ។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា៕