ក្នុងសេចក្តីប្រកាសរបស់លោកស្រី Rudklao Intawong Suwankiri អ្នកនាំពាក្យរងរដ្ឋាភិបាលនៅថ្ងៃទី១៩ ខែមករា ថៃ បានរកឃើញសារធាតុ Lithium ក្នុងបរិមាណ ១៤,៨លានតោន នៅទីតាំងចំនួនពីរ ក្នុងខេត្តភាគខាងត្បូង Phang Nga។ សារធាតុ Lithium ត្រូវបានយកទៅផលិតអាគុយ ឬថ្ម ដែលអាចបំពាក់លើរថយន្តអគ្គិសនី ទូរសព្ទ និងសម្ភារអេឡិចត្រូនិចផ្សេងទៀត។ 

 

ការរកឃើញសារធាតុដ៏សំខាន់នេះ នឹងជួយពន្លឿនសេដ្ឋកិច្ចថៃបានមួយកម្រិតទៀត ស្របពេលរដ្ឋាភិបាលប្រទេសមួយនេះ បានដាក់ចេញគោលនយោបាយចង់ក្លាយជាមជ្ឈមណ្ឌលផលិតរថយន្តអគ្គិសនីនៅក្នុងតំបន់។ 

 

កន្លងមក ក្រុមហ៊ុនផលិតរថយន្តអគ្គិសនីចិនដូចជាក្រុមហ៊ុន BYD ជាដើម បានបោះទន់ជាច្រើនលានដុល្លារ ដើម្បីធ្វើឱ្យថៃក្លាយជាមជ្ឈមណ្ឌលផលិតរថយន្តប្រភេទ EV ដ៏ធំមួយក្នុងតំបន់។ 

 

យ៉ាងណាមិញ គេមិនទាន់បានដឹងច្បាស់ឡើយ ថាតើសារធាតុនោះ អាចត្រូវបានទាញយកពីក្រោមដីប៉ុន្មាន៕