ជំនួបពិភាក្សា រយៈពេល២០នាទី រវាងសម្ដេច ហ៊ុន សែន និងលោក ម៉េដវេដេវ បានវាយតម្លៃខ្ពស់ លើកិច្ចសហប្រតិបត្តិការទ្វេភាគី កន្លងមក។ មេដឹកនាំទាំងពីរ ក៏បានគាំទ្រគ្នាទៅវិញទៅមក លើកិច្ចសហប្រតិបត្តិការអន្តរជាតិ ក្នុងក្របខណ្ឌវេទិកាទ្វេភាគី ,វេទិកាពហុភាគី និងវេទិកាតំបន់ ដែលជាកិច្ចពិភាក្សាស៊ីជម្រៅ នៅក្នុងការរួបរួមគ្នា ជាពិសេសការពារផលប្រយោជន៍នៃតំបន់រៀងៗខ្លួន ។ 
 

មេដឹកនាំបក្សកាន់អំណាចប្រទេសទាំងពីរ ក៏ប្ដេជ្ញាពង្រឹងកិច្ចសហការពហុភាគីនិយមឱ្យបានត្រឹមត្រូវនៅក្នុងតំបន់ និងក្នុងពិភពលោកទៀតផង។«កិច្ចសហប្រតិបត្តិការពហុភាគីនិយម នឹងបង្កើតបរិយាកាសឲ្យយើងអាចយោគយល់គ្នា នឹងជួយគ្នាទៅវិញទៅមក ទៅតាមភាពចាំបាច់ ស្របតាមច្បាប់ ដែលយើងបានគោរពនៅក្នុងអង្គការសហប្រជាជាតិ»។ នេះបើតាមហ្វេសប៊ុកសម្ដេច ហ៊ុន សែន ដែលបានស្រង់សម្តីនៅក្នុងជំនួបសន្ទនាជាមួយលោក មេដវេដេវ។
 

ជាមួយគ្នានេះ សម្ដេច ហ៊ុន សែន និងលោក ម៉េដវេដេវ ក៏បានមើលឃើញពីភាពចាំបាច់ នៃកិច្ចសហប្រតិបត្តិការគ្នាទៅវិញទៅមក ដើម្បីប្រយុទ្ធប្រឆាំងបដិវត្តន៍ព័ណ៌ និងលុបបំបាត់គំនិតជ្រៀតជ្រែកផ្ទៃក្នុងប្រទេសដទៃ។ មេដឹកនាំទាំងពីរ ចាត់ទុកបញ្ហានេះ គឺជាចំណុចមួយ ដែលត្រូវយកចិត្តទុកដាក់ដោះស្រាយ។
 

«ការជ្រៀតជ្រែកកិច្ចការផ្ទៃក្នុង គឺជាចំណុចមួយនៃការគំរាមកំហែងដល់សន្តិសុខជាតិរៀងៗខ្លួន ដូច្នេះយើងនឹងរួបរួមគ្នា ដើម្បីធ្វើយ៉ាងណាក៏ដោយ កុំឱ្យមានការជ្រៀតជ្រែកកិច្ចការផ្ទៃក្នុងរបស់ប្រទេសនីមួយៗ ហើយជួយមើលគ្នា និងចែករំលែកបទពិសោធន៍តាមភាពចាំបាច់»។ នេះជាសម្តីនៃកិច្ចសន្ទនារវាងមេដឹកនាំទាំងពីរ។
 

ទន្ទឹមនេះសម្ដេច ហ៊ុន សែន និងលោក ម៉េដវេដេវ ក៏បានគាំទ្រទៅលើកិច្ចសហប្រតិបត្តិការ និងកិច្ចពិភាក្សាផ្សេងៗ នៅវេទិកាធំៗ ដែលជាគំនិតផ្ដួចផ្ដើមរបស់រុស្ស៊ី រួមមាន សហគមន៍ប៊្រិដ (BRICS) ,សហគមន៍អឺរ៉ាស៊ី និងសហគមន៍រុស្ស៊ី-មេគង្គ ជាដើម ដែលភាគីទាំងពីរ នឹងផ្លាស់ប្ដូរកិច្ចសហប្រតិបត្តិការជាក់ស្ដែង។ មេដឹកនាំគណបក្សទាំងពីរ ក៏បានឯកភាពពិនិត្យមើលលើការងារណា ដែលអាចសហប្រតិបត្តិការលើកិច្ចព្រមព្រៀងចាស់ និងបង្កើននូវកិច្ចព្រមព្រៀងថ្មីទៅតាមលទ្ធភាព ៕