កីឡាជាតិ
ជាតិ
កុំព្រោះតែ View! អ្នកផលិតមាតិការគុនខ្មែរ ត្រូវថ្លឹងផលប្រយោជន៍ និងផងប៉ះពាល់ ក្រុម Admin សម្ភាសកីឡាករប្រដាល់អន្ដរជាតិ
× ភ្នំពេញ៖ អ្នកផលិតមាតិកាអំពីគុនខ្មែរ ផ្សព្វផ្សាយនៅលើបណ្តាញសង្គម មានកំណើនកាន់តែច្រើន គឺជារឿងល្អសម្រាប់ប្រជាប្រិយភាពគុនខ្មែរ នៅក្នុង និងក្រៅប្រទេស។ នេះជាការយល់ ឃើញ របស់ លោក ហេង សុខឃន អគ្គលេខាធិការសហព័ន្ធកីឡាប្រដាល់គុនខ្មែរ។ យ៉ាងណាក៏ដោយ លោក ហេង សុខឃន ស្នើឱ្យអ្នកផលិតត្រូវគិតគូរឱ្យបានគ្រប់ជ្រុងជ្រោយពីខ្លឹមសារផលិតរបស់ខ្លួន ចៀសវាងជះផលអាក្រក់ដល់កីឡាករ និងវិស័យកីឡាមួយនេះ។
កីឡាប្រដាល់គុនខ្មែរ កំពុងទទួលបានការចាប់អារម្មណ៍យ៉ាងខ្លាំង ពីអ្នកគាំទ្រជាតិ និងអន្ដរជាតិ។ រាល់សប្ដាហ៍មានការប្រកួត ពី៥ ទៅ៦សង្វៀនឯណោះ ដែលជាឱកាសឱ្យកីឡាករ-កីឡាការិនី និងធនធានថ្នាល បញ្ចេញសមត្ថភាព។
ក្រៅពីកិច្ចខិតខំពង្រឹងសមត្ថភាពកីឡានេះ របស់ស្ថាប័នរដ្ឋ និងអ្នកពាក់ព័ន្ធក្នុងវិស័យនេះ ការផ្សព្វផ្សាយ ទាំងនៅតាមស្ថាប័នផ្លូវការ និងតាមបណ្តាញសង្គម បានរួមចំណែកយ៉ាង សម្បើមដល់ប្រជាប្រិយភាពកីឡាគុនខ្មែរ។ កំណើនៃការផ្សព្វផ្សាយពីគុនខ្មែរ កាន់តែផុស ផុស បន្ទាប់ពីព្រឹត្តិការណ៍ស៊ីហ្គេម លើកទី៣២ នៅកម្ពុជា។ ទន្ទឹមនឹងនេះ អ្នក ផលិតមាតិកាផ្សព្វផ្សាយពីគុនខ្មែរផ្សាយតាមបណ្ដាញសង្គម ហាក់កើនឡើងច្រើនដែរ។ នេះបើតាម លោក ហេង សុខឃន អគ្គលេខាធិការសហព័ន្ធកីឡា ប្រដាល់គុនខ្មែរ។
ទន្ទឹមនឹងការសាទរ លោក ហេង សុខឃន ព្រួញចិត្តខ្លាំងដែរ ចំពោះខ្លឹមសារនៃការ ផ្សព្វ ផ្សាយ ពិសេសមាតិកាដែលផលិតចេញពីអ្នកគាំទ្រកីឡាគុនខ្មែរ នៅតាមបណ្តាញសង្គម ដែលអាចជះផលមិនល្អដល់កីឡាករ និងគុនខ្មែរ។ លោក ហេង សុខឃន លើកឡើងដូច្នេះ ៖«គេស្គាល់ កីឡាករ-កីឡាការិនីយើងច្រើន ស្គាល់គុនខ្មែរច្រើន គឺជារឿងល្អ ប៉ុន្ដែពួកគាត់ត្រូវដឹង អ្វីខ្លះគួរផ្សាយ និងមិនគួរផ្សាយ។ បើប៉ះពាល់ដល់កីឡាករ-កីឡាការិនី មិនគួរ ផ្សាយទេ ព្រោះអ្នកទាំងនោះ បានហត់នឿយក្នុងការហ្វឹកហាត់ និងប្រកួតដើម្បីជាតិ ហើយ ។ ដូច្នេះ កុំឲ្យកីឡាករកីឡាការិនីយើងត្រូវប្រឈមដោះស្រាយរឿងលើបណ្ដាញសង្គម ទៀត។»។
លោក ផុន សំណាង ជាអ្នកបង្កើតមាតិកាពីគុនខ្មែរម្នាក់យល់ស្របថាការផ្សព្វផ្សាយច្រើន ពីវិស័យ ឬអំពីរឿងអ្វីមួយ ច្រើនគឺជារឿងល្អ។ ប៉ុន្ដែក៏ពុំគួរឱ្យចំនួនច្រើនពេក រហូតពិបាក គ្រប់គ្រងសណ្ដាប់ធ្នាប់នោះដែរ។
អំពីការផលិតមាតិកាគុនខ្មែរ លោក ផុន សំណាង សង្កេតឃើញថា មានមាតិកាជាវីដេអូ មួយចំនួនដែលត្រូវបានផលិត និងផ្សព្វផ្សាយនៅលើបណ្តាញសង្គម ដោយមិនមានខ្លឹមសារគ្រប់ជ្រុងជ្រោយនោះទេ ពោលការផ្សព្វផ្សាយនោះ គ្រាន់តែចង់បានអ្នកទស្សនាច្រើនប៉ុណ្ណោះ។ ខ្លឹមសារទៀតសោត អាចធ្វើឱ្យប៉ះពាល់ដល់មុខមាត់កីឡាករ និងវិស័យនេះទៀតផង។ «កីឡាករស្លាប់រស់ លើពួកគាត់ហើយប្រសិនជា ពួកគាត់អត់ដឹងថាអ្វីគួរផ្សាយ និងអ្វីមិនគួរផ្សាយ។ ខ្ញុំ ខ្លួនឯងក៏ពេលខ្លះមានភ្លាត់ដែរ ប៉ុន្ដែខ្ញុំ ព្យាយាមធ្វើឲ្យបានល្អ មុនពេលផលិតវីដេអូនោះ។»។
អ្នកផលិតមាតិការូបនេះ បាននិយាយដូច្នេះ។
ដូចគ្នានេះដែរ អ្នកផលិតមាតិកាគុនខ្មែរម្នាក់ទៀត គឺ លោក ធី ប៉ុនណារ៉ា ក៏ស្នើឱ្យអ្នក ផលិតផ្សេងទៀត យកចិត្តទុកដាក់ចំពោះក្រមសីលធម៌នៃការផ្សព្វផ្សាយ ហើយត្រូវថ្លឹងថ្លែងនូវសំណួររបស់ខ្លួនមុនពេលសួរទៅលើកីឡាករ-កីឡាការិនី។ ម្យ៉ាងវិញទៀត អ្នកទាំងនោះ ត្រូវដឹងថាចំណុចណាកីឡាករ-កីឡាការិនី និយាយក្រៅផ្លូវការ។ «ខ្ញុំគិតថាយើងគួរតែយល់ដឹងខ្លះ ពីច្បាប់នៃសារព័ត៌មាន ហើយយើងគួរតែយល់ថា ពេលដែលសួរអីមួយទៅថា បើខ្លួនយើងអ្នកស្ដាប់តើប៉ះពាល់អ្វីខ្លះ? យើង ចង់បាន View ពេកក៏មិនគាត់ និយាយរួមយើងត្រូវគិតឲ្យបានល្អ។»។ លោក ធី ប៉ុនណារ៉ា យល់ដូច្នេះ៕
Tag:
(ប្រដាល់គុនខ្មែរ
Admin)
© រក្សាសិទ្ធិដោយ thmeythmey.com