ជាតិ
ប្រធានមន្ទីរវប្បធម៌រាជធានីភ្នំពេញត្រូវបានបញ្ចប់តំណែង ហើយអ្នកស្រី ណម ណារីម គ្រប់គ្រងបណ្តោះអាសន្ន លោក ស៊ុំ ម៉ាប់ អ្នកនាំពាក្យក្រសួងវប្បធម៌ និងវិចិត្រសិល្បៈ (រូបពីក្រសួងវប្បធម៌ និងវិចិត្រសិល្បៈ)
× ភ្នំពេញ៖ លោកស្រី ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បាន សម្រេចឱ្យ អ្នកស្រី ណម ណារីម អនុប្រធាននាយកដ្ឋានសិល្បៈទស្សនីយភាព ទទួលខុសត្រូវរួមនៅមន្ទីរវប្បធម៌និងវិចិត្រសិល្បៈរាជធានីភ្នំពេញ បណ្ដោះអាសន្ន ជំនួសប្រធានមន្ទីរចាស់ដែលត្រូវបានបញ្ចប់តំណែង។នេះបើតាមសេចក្តី សម្រេច ចុះថ្ងៃទី៩ ខែកុម្ភៈ។
លោកស្រី ភឿង សកុណា បានបញ្ជាក់នៅក្នុងសេចក្តីសម្រេចដដែលនេះដូច្នេះ៖ «ប្រគល់ភារកិច្ចជូនអ្នកស្រី ណម ណារីម អនុប្រធាននាយកដ្ឋាន សិល្បៈទស្សនីយភាព ឱ្យទទួលខុសត្រូវរួម នៅមន្ទីរវប្បធម៌ និងវិចិត្រសិល្បៈរាជធានីភ្នំពេញ ជាបណ្ដោះអាសន្ន ជំនួសលោក ជុំ វុឌ្ឍី ដែលត្រូវបានបញ្ចប់មុខតំណែង រហូតដល់មានចំណាត់ការថ្មី»។
ជុំវិញការបញ្ចប់តំណែងប្រធានមន្ទីរវប្បធម៌រាជធានីភ្នំពេញ លោក ស៊ុំ ម៉ាប់ អ្នកនាំពាក្យក្រសួងវប្បធម៌ និងវិចិត្រសិល្បៈ បានប្រាប់សារព័ត៌មានថ្មីៗយ៉ាងខ្លីថា ការផ្លាស់ប្ដូរតួនាទី ឬមុខតំណែង នៃអ្នកទទួលខុសត្រូវផ្នែកណាមួយ គឺជាផ្នែកនៃការគ្រប់គ្រង និងចាត់ចែង ការងារបច្ចេកទេស របស់ក្រសួង។ «ការតែងតាំងថ្មី មានការត្រួតពិនិត្យ និងឯកភាព ទាំងក្រសួង និងថ្នាក់ក្រោមជាតិ ដើម្បី បន្តនិរន្តរភាព និងប្រសិទ្ធភាពស្ថាប័ន»។ នេះជាការបញ្ជាក់បន្ថែមរបស់លោក ស៊ុំ ម៉ាប់។
យ៉ាងណាក៏ដោយ លោក ស៊ុំ ម៉ាប់ មិនបញ្ជាក់បន្ថែម ពីមូលហេតុនៃការបញ្ចប់មុខតំណែងលោក ជុំ វុឌ្ឍី ឡើយ៕
Tag:
វប្បធម៌
ក្រសួងវប្បធម៌
តំណែង
© រក្សាសិទ្ធិដោយ thmeythmey.com