អន្តរជាតិ
កូរ៉េខាងត្បូង៖ ពេទ្យកម្មសិក្សានាំគ្នាឈប់ធ្វើការ ប្រឆាំងនឹងការដំឡើងចំនួននិស្សិតពេទ្យ
ពេទ្យកម្មសិក្សានាំគ្នាឈប់ធ្វើការ ប្រឆាំងនឹងកំណែទម្រង់ដំឡើងចំនួននិស្សិតពេទ្យ AP - Chun Jung-in
×![]()
ដោយ៖អៀង សុខម៉ិញ/RFI
មន្ទីរពេទ្យកំពុងរអាក់រអួលយ៉ាងខ្លាំង ដោយក្រុមគ្រូពេទ្យថ្នាក់បញ្ចប់ហាត់ការនៅក្នុងមន្ទីរពេទ្យ ចំនួន៧១%បាននាំគ្នាលាលែងពីការងារ ដើម្បីតវ៉ាប្រឆាំងនឹងការធ្វើកំណែទម្រង់ដំឡើងចំនួននិស្សិតប្រលងចូលមហាវិទ្យាល័យវេជ្ជសាស្ត្រ។
បើតាមទិន្នន័យផ្លូវការនិងព័ត៌មានចុះផ្សាយនៅក្នុងសារព័ត៌មានជាតិ មន្ទីរពេទ្យធំៗចំនួន៥របស់កូរ៉េខាងត្បូងកំពុងមានដំណើរការយ៉ាងរអាក់រអួលបំផុត ដោយត្រូវបង្ខំចិត្តមិនទទួលអ្នកជំងឺ និងលុបគម្រោងការវះកាត់អ្នកជំងឺ អស់ប្រមាណ៥០% តាំងពីថ្ងៃអង្គារទី២០កុម្ភៈមក ព្រោះខ្វះពេទ្យ។ នៅថ្ងៃពុធនេះ ចំនួនគ្រូពេទ្យកម្មសិក្សាឈប់មិនមកធ្វើការមានចំនួនដល់ទៅ ៧៨១៣នាក់ ពោលគឺ៥ដងច្រើនជាងកាលពីថ្ងៃអង្គារម្សិលមិញ និងត្រូវជា៧១%នៃគ្រូពេទ្យកម្មសិក្សាសរុប។
ក្រុមគ្រូពេទ្យថ្នាក់បញ្ចប់កំពុងហាត់ការនៅតាមមន្ទីរពេទ្យ (les internes) បាននាំគ្នាលាលែងពីការងារ ដើម្បីប្រឆាំងនឹងគម្រោងកំណែទម្រង់របស់រដ្ឋាភិបាលដែលចង់ដំឡើងចំនួននិស្សិតចូលរៀនមហាវិទ្យាល័យវេជ្ជសាស្ត្រ។ លោកប្រធានាធិបតីកូរ៉េខាងត្បូង យ៉ូន សុកយោល បានជំនះធ្វើកំណែទម្រង់ដំឡើងបរិមាណនិស្សិតអាចចូលរៀនពេទ្យចំនួន៦៥% ឬត្រូវជា២ពាន់នាក់បន្ថែមក្នុងមួយឆ្នាំ ចាប់ពីឆ្នាំ២០២៥ទៅ។ សម្រាប់លោកប្រធានាធិបតី នេះជាវិធានការចាំបាច់របស់ប្រទេសក្នុងការមើលថែពលរដ្ឋចាស់ៗកាន់តែច្រើនឡើងៗ។ រដ្ឋាភិបាលព្យាករឃើញថាប្រទេសនឹងមានពលរដ្ឋអាយុលើសពី៦៥ឆ្នាំចំនួនដល់ទៅ៤៤%នៅឆ្នាំ២០៥០។ ហើយកូរ៉េខាងត្បូងមានគ្រូពេទ្យជាមធ្យមតែ២,៦នាក់ប៉ុណ្ណោះសម្រាប់មើលពលរដ្ឋ១ពាន់នាក់ ទល់នឹងមធ្យមភាគ៣,៧% នៃ៣៧រដ្ឋជាសមាជិកអង្គការប្រទេសអភិវឌ្ឍន៍។ ដូច្នេះបើគ្មានកំណែទម្រង់ទេ កូរ៉េខាងត្បូងខ្វះគ្រូពេទ្យដល់ទៅ១៥០០០នាក់នៅឆ្នាំ២០៣៥។
ប៉ុន្តែចំណាត់ការដំឡើងចំនួននិស្សិត នឹងធ្វើឱ្យធ្លាក់គុណភាពគ្រូពេទ្យនៅថ្ងៃអនាគត ហើយគុណភាពមើលថែព្យាបាលអ្នកជំងឺក៏ចុះថយនៅតាមនោះដែរ។ នេះជាការយល់ឃើញរបស់ក្រុមគ្រូពេទ្យ។ ម្យ៉ាងទៀត កំណែទម្រង់របស់រដ្ឋាភិបាល មិនឆ្កឹះចំបញ្ហាពិតនៃប្រព័ន្ធសុខាភិបាលកូរ៉េខាងត្បូងទេ។ កូរ៉េខាងត្បូងខ្វះអ្នកជំនាញផ្នែកខ្លះ ដូចជាជំនាញកុមារ ឬជំនាញបេះដូង ព្រោះនិស្សិតនាំគ្នាចាប់យកតែជំនាញវះកាត់កែសម្ផស្ស និងចិត្តសាស្ត្រ។ រដ្ឋាភិបាលគួរតែស្នើវិធានការកាត់បន្ថយបន្ទុកតាមផ្លូវច្បាប់វិញ ក្នុងករណីមានកំហុសវេជ្ជសាស្ត្រគ្រប់គ្រងមិនបានប្រសើរជាង។ នេះបើតាមការទាមទាររបស់សមាគមនិស្សិតពេទ្យកម្មសិក្សា ដែលជាអ្នកផ្តួចផ្តើមធ្វើកុប្បកម្មឈប់ធ្វើការ។ តែក្រុមអ្នកគាំទ្រកំណែទម្រង់ដែលមានដល់ទៅ៧៥% យល់ថាក្រុមប្រឆាំងមិនចង់មានពេទ្យច្រើន ដើម្បីអាចបន្តមានប្រាក់ចំណូលខ្ពស់។ នៅកូរ៉េខាងត្បូង ការជ្រើសរើសនិស្សិតពេទ្យតឹងតែងខ្លាំងណាស់ គ្រូពេទ្យចេញមកមានប្រាក់ខែខ្ពស់និងកិត្តិយសថ្លៃថ្លាខ្លាំងណាស់។
ប្រឈមនឹងអវត្តមានគ្រូពេទ្យដ៏សន្ធឹកសន្ធាប់យ៉ាងដូច្នេះ នាយករដ្ឋមន្ត្រីដែលបានចុះទៅសួរសុខទុក្ខអ្នកជំងឺដល់មន្ទីរពេទ្យ រដ្ឋមន្ត្រីក្រសួងយុត្តិធម៌ ក្រសួងមហាផ្ទៃ និងក្រសួងសុខាភិបាល បានថ្លែងសារ នៅថ្ងៃពុធនេះ ជំរុញឱ្យក្រុមគ្រូពេទ្យទាំងនោះត្រលប់ទៅបំរើការងារគោរពវិជ្ជាជីវៈ ដែលជាអ្នកការពារព្យាបាលសុខភាពមនុស្សទូទៅ។ គ្រូពេទ្យសិក្ខាកាមដែលមិនមកធ្វើការអាចនឹងត្រូវឃាត់ខ្លួននិងជាប់ទោសបើមិនព្រមស្តាប់បញ្ជារបស់រដ្ឋាភិបាល។ នេះជាពាក្យព្រមានរបស់រដ្ឋមន្ត្រីក្រសួងយុត្តិធម៌៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
