លោក ប៉ុញ កើន ដែលបានបើកក្លិបគុនល្បុក្កតោ នៅភូមិត្រពាំងព្រៃ ឃុំត្រពាំងធំខាងត្បូង ស្រុកត្រាំកក់ ខេត្តតាកែវ បានផ្ដល់បទសម្ភាសទៅក្រុមប្រឹក្សាកីឡាក្រសួងមហាផ្ទៃថា រូបលោក បានប្រឹងផ្សព្វផ្សាយ និងបើកក្លិបនេះ ដើម្បីឲ្យផ្ទេរមរតកក្បាច់គុន ក៏ដូចជាកាតព្វកិច្ចថែរក្សា ទៅកាន់ក្មេងជំនាន់ក្រោយ។ 
 

«ក្បាច់គុននេះ មិនមែនជារបស់ខ្ញុំតែម្នាក់ទេ ប៉ុន្ដែគឺជារបស់ដូនតាយើង។ ជាវប្បធម៌ជាតិ និងជាក្បាច់គុនសម្រាប់ក្មេងៗជំនាន់ក្រោយហ្វឹកហាត់។ នៅពេលខាងមុខ ក្មេងទាំងនោះមានឱកាសយកទៅប្រើការដូចជាប្រកួតព្រឹត្តិការណ៍ថ្នាក់ជាតិ ឬអន្ដរជាតិ និងប្រឡងចូលក្របខ័ណ្ឌផ្សេងៗ។»។ គ្រូបង្វឹករូបនេះ បាននិយាយដូច្នេះ។
 

បច្ចុប្បន្នក្លិបគុនល្បុក្កតោគោកធ្លក មានសិស្សជាង២០នាក់។ បើតាមលោក ប៉ុញ កើន ក្លិបកំពុងជួប ការលំបាក ខ្វះសម្ភារៈហ្វឹកហាត់ដូចជា ហ្គង់ ហ្ស៊ីប និងបញ្ហាទីលានហ្វឹកហាត់តូច ដែលជាហេតុ ធ្វើឲ្យការបញ្ចេញក្បាច់ពិបាក។
 

ដ្បិតជួបការលំបាក ប៉ុន្តែគ្រូបង្វឹករូបនេះ នៅតែប្ដេជ្ញាបណ្ដុះបណ្ដាលយុវជនពីក្បាច់បុរាណខ្មែរនេះ ។ បើតាមលោក ប៉ុញ កើន ប្រជាជនក្នុងភូមិ-ឃុំរបស់លោក មានការយល់ដឹង និងចាប់ផ្ដើមស្រឡាញ់នូវអ្វីជារបស់ខ្មែរ ជាពិសេសសិល្បៈក្បាច់គុនមួយនេះ ។ លោក បានសង្កត់ធ្ងន់ថា ពលរដ្ឋក្នុងភូមិ តែងតែបញ្ជូនកូនៗ មកហ្វឹកហាត់ ដោយមិនហាមឃាត់ឡើយ៕