សង្រ្គាមនៅអ៊ុយក្រែន បានឈានចូលឆ្នាំ៣ ហើយ ដោយពន្លឺនៃសន្តិភាព មិនទាន់មានបន្តិចនោះទេ។ អ៊ុយក្រែន និងរុស្ស៊ី នៅតែបន្តវាយប្រហារទៅវិញទៅមក នៅក្នុងតំបន់ជម្លោះភាគខាងកើតអ៊ុយក្រែន។ 

 

ក្នុងសន្និសីទសារព័ត៌មានក្នុងក្រុងកៀវ នៅថ្ងៃទី២៥ ខែកុម្ភៈ លោក វ៉ូឡូឌីមៀ ហ្សេលេនស្គី ប្រធានាធិបតីអ៊ុយក្រែន រំពឹងថា ក្រុងកៀវនឹងប្រឈមការវាយប្រហារទ្រង់ទ្រាយធំពីក្រុងមូស្គូនៅរយៈពេល ២ខែខាងមុខ។ ទោះអាចរងការវាយប្រហារពីរុស្ស៊ីក្តី តែមេដឹកនាំអ៊ុយក្រែនរូបនេះ បានបង្ហាញភាពជឿជាក់ថា ខ្លួនបានរៀបចំយុទ្ធសាស្រ្តសម្រាប់ទប់រុស្ស៊ីហើយ។

 

«រុស្ស៊ី នឹងត្រៀមវាយបកនៅពេលចាប់ផ្តើមរដូវក្តៅ ឬដំណាច់ខែឧសភាខាងមុខ ប្រសិនបើពួកគេអាច»។ លោក ហ្សេលេនស្គី បានលើកឡើងបែបនេះ នៅចំពោះមុខអ្នកសារព័ត៌មាន ដោយបន្តជាមួយទឹកចិត្តមោះមុតថា អ៊ុយក្រែន នឹងត្រៀមសម្រាប់ការវាយប្រហារ។ បើតាមប្រមុខរដ្ឋអ៊ុយក្រែន ក្រុងកៀវមានផែនការយ៉ាងច្បាស់ ដើម្បីប្រឆាំងនឹងក្រុងមូស្គូ។ 

 

យ៉ាងណាមិញ លោក ហ្សេលេនស្គី មិនបានបង្ហើបពីយុទ្ធសាស្រ្តទប់កម្លាំងរុស្ស៊ីនៅសមរភូមិជួរមុខឡើយ ដោយបានត្រឹមបន្លុយថា ការផ្លាស់ប្តូរអគ្គមេបញ្ជាការកម្លាំងប្រដាប់អ៊ុយក្រែន កាលពីពេលថ្មីៗនេះ ជាផ្នែកមួយនៃយុទ្ធសាស្រ្តរបស់ខ្លួន។ អគ្គមេបញ្ជាការកម្លាំងប្រដាប់អ៊ុយក្រែនថ្មី លោក Oleksandr Syrskyi នឹងត្រូវដោះស្រាយបញ្ហាសំខាន់ៗក្នុងជួរទ័ពដូចជាអំពើពុករលួយ និងការកែនកម្លាំងថ្មីជាដើម។ 

 

ក្នុងសន្និសីទដដែល មេដឹកនាំអ៊ុយក្រែន បានបន្ថែមថា លោកប្រធានាធិបតីវ្ល៉ាឌីមៀ ពូទីន បានបំផ្លើសពីចំនួនទ័ពអ៊ុយក្រែន ដែលបានបាត់បង់ជីវិតនៅសមរភាព។ បើតាមលោក ហ្សេលេនស្គី ចាប់តាំងពីសង្រ្គាមផ្ទុះឡើង កាលពី ២ឆ្នាំមុន កងទ័ពអ៊ុយក្រែនចំនួន៣១០០០នាក់​ បានទទួលមរណភាព។ យ៉ាងណាក៏ដោយ មេដឹកនាំអ៊ុយក្រែន នៅតែចាត់ទុកចំនួននេះ ជាទំហំដ៏ច្រើនមួយ។ 

 

បន្ថែមពីនេះ ប្រធានាធិបតីអ៊ុយក្រែន បានអំពាវនាវឱ្យបណ្តាប្រទេសលោកខាងលិចរួបរួមគ្នា និងផ្តល់ជំនួយបន្ថែមមកអ៊ុយក្រែន ក្នុងគោលបំណងទប់ការវាយប្រហាររុស្ស៊ី។ ពេលនេះ អ៊ុយក្រែនត្រូវការខ្លាំង គឺជំនួយសន្តិសុខ ស្របពេលសភាអាម៉េរិក មិនទាន់អនុម័យជំនួយប្រមាណ ៦០ពាន់លានដុល្លារសម្រាប់អ៊ុយក្រែនចេញ៕