លោក លឹម ហេង ថតវីដេអូបោះមេដែកតាមស្ទឹង ផ្តល់ការកម្សាន្តនិងសម្អាតបរិស្ថាន

ជាតិ

បទសម្ភាសន៍

វីដេអូ

លោក លឹម ហេង ថតវីដេអូបោះមេដែកតាមស្ទឹង ផ្តល់ការកម្សាន្តនិងសម្អាតបរិស្ថាន

03, Mar 2024 , 9:00 am

រូបភាព

លោក លឹម ហេង អ្នកផលិតវីដេអូបោះមេដេក សម្រាប់យូធូប រស់នៅក្នុងខេត្តសៀមរាប។ រូបភាពដោយ លោក ថោង ប្រណី៕

ដោយ៖ ថោង ប្រណី

សៀមរាប៖ សកម្មភាពបោះមេដែកស្រូបយកវត្ថុលោហៈផ្សេងៗតាមស្ទឹង ត្រូវបានលោក លឹម ហេង ផលិតជាវីដេអូ និងបង្ហោះវាទៅក្នុងយូធូប និងបណ្តាញសង្គមផ្សេងៗទៀត។ លោក លឹម ហេង បានប្រាប់សារព័ត៌មានឌីជីថលថ្មីៗថា មាតិកាវីដេអូប្រភេទនេះ ពុំសូវមានអ្នកផលិតច្រើននៅឡើយនៅកម្ពុជា។ លោក លឹម ហេងបន្តទៀតថា លោកផលិតវីដេអូប្រភេទនេះ ក្នុងបំណងផ្តល់ការកម្សាន្តដល់អ្នកទស្សនា និងជាសកម្មភាពមួយដែលចូលរួមសម្អាតបរិស្ថានផងដែរ។ លើសពីនេះបុរសរូបនេះ រំពឹងថា នៅពេលវីដេអូទាំងនោះមានអ្នកទស្សនាច្រើនក្នុង YouTube វាអាចផ្តល់ប្រាក់ចំណូលខ្លះត្រឡប់មកវិញដែរ។

តទៅនេះសូមលោកអ្នកនាង ទស្សនាវីដេអូដូចខាងក្រោម៖

ដៃម្ខាងកាន់ខ្សែ ដៃម្ខាងទៀតកាន់ដុំមេដែក ដែលមានទម្ងន់ប្រហែល៣គីឡូក្រាម ដើម្បី ត្រៀមបោះទៅក្នុងទឹក ហើយថែមទាំងមានកាមេរ៉ាចងភ្ជាប់នឹងដើមទ្រូង សម្រាប់ថតវីដេអូ ផងនោះ លោក លឹម ហេង តែងផលិតវីដេអូដោយការបោះមេដែកទៅក្នុងបាតស្ទឹង អូរ ឬ ប្រឡាយនានា ដើម្បីស្រូបយកកម្ទេចកម្ទីដែក ដែលមានកប់ក្នុងភក់ស្ទើររាល់ថ្ងៃ។ លោក លឹម ហេង រៀបរាប់ថា នៅកម្ពុជា នៅពុំមានមាតិកាវីដេអូបែបនេះច្រើននោះទេ ដូច្នេះទើប លោកធ្វើឱ្យប្លែកពីគេ និង ផងដែរ។

ការបោះមេដែកចូលទៅប្រភពទឹករបស់ លោក លឹម ហេង គឺក្នុងគោលបំណងចង់ចូលរួម សម្អាតបរិស្ថាន តាមរយៈការប្រមូលវត្ថុប្រើប្រាស់ផ្សេងៗផលិតពីលោហៈ ដែលមាននៅក្នុងទឹកដូចជាដែកគោល កាំបិត ពូថៅ ញញួរ សម្បកកំប៉ុង ស័ង្កសី និងសារធាតុផ្សេងទៀតដែលមេដែកអាចស្រូបបាន។ បើតាម លោក លឹម ហេង វត្ថុទាំងអស់នេះអាចបង្កគ្រោះថ្នាក់ ដល់ពលរដ្ឋដែលចុះក្នុងទឹកនោះ ដើម្បីបង់សំណាញ់ ឬចុះរាវរករបស់របរផ្សេងៗ។

លោហធាតុដែលលោក ហេង ប្រមូលបានកន្លងមក មានប្រហែល ៥០ទៅ៦០គីឡូក្រាម។ ក្រៅពីនោះលោកក៏ធ្លាប់ស្រូបបានគ្រាប់បែកចំនួនពីរដែរ ដែលលោកបានប្រគល់ទៅអ្នកជំនាញស៊ីម៉ាក យកទៅវិនិច្ឆ័យ។

បុរសរូបនេះ ក៏សង្ឃឹមថា វីដេអូដែលលោកបានបង្ហោះនៅ YouTube មានអ្នកទស្សនាច្រើន ឈានដល់ បានប្រាក់ចំណូលខ្លះ ហើយអាចឱ្យលោកបន្តសកម្មភាពនេះបានកាន់តែទូលំទូលាយថែមទៀត។ លោក លឹម ហេង អាចធ្វើដំណើរទៅបោះមេដែកតាមដងស្ទឹងនានាដែលនៅឆ្ងាយពីខេត្តសៀមរាប ឬបណ្តាខេត្ត ផ្សេងៗបាន។

លោក លឹម ហេង ក៏បានស្នើដល់ពលរដ្ឋចូលរួមសម្អាតបរិស្ថាន និងកុំបោះចោលវត្ថុប្រើប្រាស់ចូលក្នុងប្រភពទឹក ដែលធ្វើឱ្យទឹកកខ្វក់ ប៉ះពាល់ដល់ការរស់នៅរបស់ជីវចម្រុះនៅក្នុងទឹក៕