ដោយ៖ ថោង ប្រណី

 

 

 

 

តាមការលើកឡើងរបស់លោក សុំ សុភ័ក្រ្ត ប្រធានសហគមន៍កន្ត្រកស្នាដៃខ្មែរ ថាកន្ត្រក ដែលផលិតអំពីស្លឹករឹត លក់ដាច់ស្ទើរគ្រប់រដូវកាល ដោយសារមានការគាំទ្រខ្ពស់ ពីអតិថិជនទូទៅ។ លោក សុភ័ក្ត្រ បន្តថា ទន្ទឹមនឹងការលក់ដាច់ច្រើន អាជីវកម្មនេះក៏ជួបបញ្ហា លំបាកខ្លះដែរ គឺការរកវត្ថុធាតុដើមមកផលិតកន្ត្រក ព្រោះស្លឹករឹតត្រូវប្រមូលទិញពីខេត្តក្រចេះ ដោយសារទីនោះសម្បូរច្រើន។ ម្យ៉ាងទៀត នៅក្នុងរដូវវស្សាការកាប់ស្លឹករឹតគឺជួបបញ្ហាលំបាក ដោយសារមានទឹកលិច ហើយអាចប្រឈមនឹងគ្រោះថ្នាក់ផ្សេងៗជាថាហេតុក៏មាន។ 

 

លោក សុំ សុភ័ក្រ្ត បន្ថែមថា ខុសពីផលិតផលផ្សេងៗរបស់សហគមន៍កន្ត្រកស្នាដៃខ្មែរ កន្ត្រកស្លឹករឹតមួយនេះគឺអ្នកផលិតនៅតាមតំបន់ខ្លួនឯងផ្ទាល់ដែលជាអ្នកច្នៃម៉ូតតាមបទពិសោធន៍និងចំណេះដែលមានស្រាប់។ លោកបញ្ជាក់ដែរថា ក្នុងកន្ទ្រកស្លឹករឹតមួយ អាចលក់បានតម្លៃ២៥០០០៛ ទៅ២៨០០០៛។ រីឯការផលិតវិញអាចចំណាយពេលមួយ ឬពីរថ្ងៃ ដើម្បីផលិតបានកន្ត្រកស្លឹករឹតមួយ។ 

 

យ៉ាងណាក៏ដោយ ក្នុងនាមជាប្រធានសហគមន៍កន្ត្រកស្នាដៃខ្មែរ លោកចង់ឱ្យពលរដ្ឋខ្មែរគ្រប់រូប ជួយ  បន្តការគាំទ្រផលិតផលដែលធ្វើឡើងដោយស្នាដៃកូនខ្មែរផ្ទាល់ ដើម្បីជាការរួមចំណែកបង្កើត ការងារ និងប្រាក់ចំណូលដល់អ្នកផលិត៕