យុទ្ធនាការបាញ់ថ្នាំមូស បង្ការជំងឺគ្រុនឈាម នៅរាជធានីភ្នំពេញ

ជាតិ

យុទ្ធនាការបាញ់ថ្នាំមូស បង្ការជំងឺគ្រុនឈាម នៅរាជធានីភ្នំពេញ

04, Mar 2024 , 11:19 am

រូបភាព

ទិដ្ឋភាពកងពលតូចលេខ៧០ ចុះបាញ់ថ្នាំ។ រូបភាពពីរដ្ឋបាលរាជធានីភ្នំពេញ។

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ដើម្បីចូលរួមបង្ការ និងទប់ស្កាត់ការកើនឡើងនៃជំងឺគ្រុនឈាម រដ្ឋបាលរាជធានីភ្នំពេញ និងមន្ទីរសុខាភិបាល បានសហការរៀបចំយុទ្ធនាការបាញ់ថ្នាំមូស ចាប់ពីថ្ងៃទី២៣ កុម្ភៈ ដល់ថ្ងៃទី១៣ មីនា។ បើតាមលោក ងី មានហេង ប្រធានមន្ទីរសុខាភិបាលរាជធានីភ្នំពេញ គិតត្រឹមថ្ងៃទី៣ មីនា ការបាញ់ថ្នាំមូស សម្រេចបាន ៦៤សង្កាត់ ក្នុងចំណោម ១០៥សង្កាត់។

៦សប្ដាហ៍ដើមឆ្នាំ២០២៤នេះ ចំនួនពលរដ្ឋកើតជំងឺគ្រុនឈាម បានកើនឡើងប្រមាណ ១០០០ករណី ក្នុងរាជធានីភ្នំពេញ ដែលខ្ពស់ជាងឆ្នាំ២០២៣។ ដោយសារកំណើននៃជំងឺគ្រុនឈាមនេះ ទើបរដ្ឋបាលរាជធានីភ្នំពេញ និងមន្ទីរសុខាភិបាល សហការរៀបចំយុទ្ធនាការបាញ់ថ្នាំមូស នៅក្នុងមូលដ្ឋានរាជធានីភ្នំពេញ ដោយមានការចូលរួមពីកងពលតូចលេខ៧០។

ក្នុងយុទ្ធនាការ១០ថ្ងៃមកនេះ ក្រុមការងារ និងអាជ្ញាធរ បានចុះបាញ់ថ្នាំមូល នៅខណ្ឌចំនួន ៥ ស្មើនឹង៦៤សង្កាត់។ ថ្លែងប្រាប់សារព័ត៌មានថ្មីៗ តាមទូរសព្ទដៃ លោក ងី មានហេង ប្រធានមន្ទីរសុខាភិបាលរាជធានីភ្នំពេញ បញ្ជាក់ថា ការចុះបាញ់ថ្នាំមូសនេះ គឺជាការយកចិត្តទុកដាក់លើសុខមាលភាពប្រជាពលរដ្ឋ និងបង្ការជំងឺគ្រុនឈាម ដែលបង្កឡើងដោយមូសខ្លា។

រូបភាពពីរដ្ឋបាលរាជធានីភ្នំពេញ។

ការចុះបាញ់ថ្នាំមូសនេះ ចាប់ផ្ដើមពីម៉ោង ៤កន្លះតទៅ ដែលជាពេលវេលាមូសចេញ។ ក្រៅពីបាញ់ថ្នាំ តាមដងផ្លូវ និងលំនៅដ្ឋានហើយ ក្រុមការងារ ក៏បាញ់ថ្នាំមូសនៅលើស្មៅ ឬលូ ដែលជាម្រកមូសខ្លាផងដែរ។ សម្រាប់លោក ងី មានហេង យុទ្ធនាការបាញ់ថ្នាំមូសនេះ ផ្ដល់អត្ថប្រយោជន៍ដល់ប្រជាពលរដ្ឋ តាមរយៈការសម្លាប់មូសខ្លាចេញពីមូលដ្ឋាន និងជួយកាត់បន្ថយការកើតជំងឺគ្រុនឈាម។

«វិធានការណ៍ដែលល្អបំផុត និងមានប្រសិទ្ធភាព គឺលុបបំបាត់ជម្រកមូសខ្លា។ មូសខ្លាជាភ្នាក់ងារចម្លងជំងឺគ្រុនឈាម បើមិនមានមូសខ្លា នោះជំងឺគ្រុនឈាម នឹងមានអាចកើតមាននោះទេ»។ នេះជាការបញ្ជាក់បន្ថែមរបស់លោកវេជ្ជបណ្ឌិត ងី មានហេង ដោយបន្តថា ការលុបបំបាត់ជម្រកមូសខ្លា ដែលនៅជុំវិញផ្ទះ ពិតជាមានសារៈសំខាន់។

ទន្ទឹមនឹងនេះ លោក ងី មានហេង អំពាវនាវឱ្យពលរដ្ឋចូលរួមទប់ស្កាត់ការរីករាលដាលជំងឺគ្រុនឈាម។ ជំងឺគ្រុនឈាម ជាជំងឺដែលគំរាមកំហែងដល់កុមារ។ ជំងឺនេះ ឆ្លងតាមរយៈវីរុសដាំង(Dengue Virus) ដែលបង្កឡើងដោយសារមូសខ្លាខាំ៕