ជាតិ
សេដ្ឋកិច្ច
លោក បណ្ឌិត គី សេរីវឌ្ឍន៍, លោកបណ្ឌិត ស្រ៊ុន សុភ័ក្រ្ត, លោកស្រី ម៉ារ អមរា និងអ្នកឧកញ៉ា គួច ម៉េងលី។
×![]()
បច្ចុប្បន្ននេះ ពលរដ្ឋ ខ្មែរកាន់តែច្រើនបានផ្ដល់តម្លៃ និងប្រើប្រាស់ប្រាក់រៀលនៅក្នុងជីវិតប្រចាំថ្ងៃ របស់ ពួកគេ។ នេះបើទោះជាការចាយវាយទាំងនោះត្រូវប្រព្រឹត្តិទៅតាមប្រព័ន្ធអេឡិចត្រូនិកច្រើនក៏ដោយ។ ក្នុងកាលៈទេសៈ នេះ អ្នកជំនាញហិរញ្ញវត្ថុ និងធុរជនមួយចំនួនបានចាប់ អារម្មណ៍អំពីការបង្កើន តម្លៃរូបិយវត្ថុ ជាតិ តាម រយៈការផលិត ក្រដាសប្រាក់រៀល ជាប្រភេទប្លាស្ទិក ប៉ូលីមើរ(Polymer)។
ជាការលើកស្ទួយមុខមាត់ប្រទេសជាតិមួយកម្រិតទៀត ប្រសិនបើធនាគារជាតិនៃកម្ពុជាសម្រេចបោះពុម្ពប្រាក់រៀលជាប្លាស្ទិក។ លោក វេជ្ជបណ្ឌិត គួច ម៉េងលី ស្ថាបនិកក្រុមហ៊ុន ម៉េងលី ជេ. គួច អេឌ្យូខេសិន មើលឃើញបែបនេះ ពីការបោះពុម្ពរូបិយវត្ថុជាតិជាប្លាស្ទិក ដែលមិនត្រឹមលើកទឹកចិត្តប្រជាពលរដ្ឋឱ្យចូលរួមប្រើប្រាស់ប្រាក់រៀលកាន់តែសកម្មក្នុងជីវភាពប្រចាំថ្ងៃប៉ុណ្ណោះទេ តែថែមទាំងកាត់បន្ថយថ្លៃចំណាយរបស់រដ្ឋាភិបាលក្នុងការបោះពុម្ពក្រដាសប្រាក់ញឹកញាប់ទៀតផងដែរ។
សូមទស្សនាវីដេអូខាងក្រោ៖
«ដើម្បីលើកទឹកចិត្តដល់ពលរដ្ឋយើង លើកស្ទួយដល់មុខមាត់លុយជាតិយើង ហើយដើម្បីឱ្យលុយយើងប្រើប្រាស់បានយូរ ជាជាងបោះពុម្ពញឹកញាប់។ [ការបោះពុម្ពលុយជាប្លាស្ទិក] គឺជារឿងល្អមួយ ដែលប្រទេសមួយចំនួននៅពិភពលោក ដូចជានៅអឺរ៉ុប និងប្រទេសអភិវឌ្ឍន៍ប្រើលុយប្លាស្ទិក»។
សម្រាប់លោក គួច ម៉េងលី ប្រសិនបើធនាគារជាតិ សម្រេចចិត្តបោះពុម្ពក្រដាសប្រាក់រហូតដល់កម្រិតជាប្លាស្ទិកនេះ នឹងធ្វើឱ្យប្រជាពលខ្មែរមានមោទកភាព និងសប្បាយចិត្តក្នុងការប្រើប្រាស់ ដោយយល់ថា
កម្ពុជាទំនើប ជឿនលឿនមិនចាញ់បរទេសឡើយ។ ជាមួយគ្នានេះ ការប្រើប្រាស់លុយប្លាស្ទិក ក៏មិនសូវងាយខូច ប្រលាក់ ហើយធន់នឹងការទទឹក សើម ឬអាចលាងសម្អាតទឹកបាន ផងដែរ។
អ្នកឧកញ៉ា គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន
ការបោះពុម្ពប្រាក់រៀលនៅលើជាប្លាស្ទិកនេះ ជាការបង្កើនគុណភាព រួមទាំងបង្ហាញពីប្រណិតភាពរបស់រូបិយវត្ថុខ្មែរ ខណៈអត្រានៃការប្រើប្រាស់ប្រព័ន្ធទូទាត់ប្រាក់តាមទម្រង់ឌីជីថល មានកំណើនគួរឱ្យកត់សម្គាល់។ ដ្បិតបច្ចុប្បន្ន ក៏ដូចជាពេលអនាគត ពលរដ្ឋខ្មែរមានទំនោរខ្លាំងទៅលើការទូទាត់ប្រាក់តាមប្រព័ន្ធឌីជីថលយ៉ាងណាក្តី ក៏ប៉ុន្តែកម្ពុជាក៏មិនអាចលុបបំបាត់នូវការប្រើប្រាស់ក្រដាសប្រាក់បានដែរ។ ក៏ព្រោះក្រដាសប្រាក់ ជាអត្តសញ្ញាណរបស់កម្ពុជា តំណាងឱ្យអធិបតេយ្យភាព និងឯកភាពភាពជាតិ។
បើតាមលោក ស៊ុ្រន សុភ័ក្រ្ត សាស្ត្រចារ្យសេដ្ឋកិច្ច នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ក្នុងបរិការណ៍ដែលការប្រើប្រាស់ក្រដាសប្រាក់រៀលមានការធ្លាក់ចុះដូចពេលសព្វថ្ងៃ ធនាគារជាតិ គួរយកឱកាសនេះ ដើម្បីពង្រឹងគុណភាពក្រដាសប្រាក់រៀលឱ្យបានកាន់តែល្អប្រសើរ។
លោកបណ្ឌិត ស្រ៊ុន សុភ័ក្រ្ត សាស្ត្រចារ្យសេដ្ឋកិច្ច នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច
«ពីព្រោះ យើងអត់ត្រូវការក្រដាសប្រាក់ក្នុងបរិមាណច្រើនដូចពេលមុនទេ។ អ៊ីចឹង! ស្របពេលនេះ គឺយើងអាចចាប់ផ្តើមគិតបោះពុម្ពលុយជាប្លាស្ទិកវិញ ដើម្បីធ្វើឱ្យគុណភាពក្រដាសប្រាក់យើងកាន់តែល្អ ហើយទស្សនៈរបស់អ្នកប្រើប្រាស់ គឺឱ្យតម្លៃខ្ពស់លើប្រាក់រៀលជាងពេលមុនៗ»។ លោក ស៊ុន សុភ័ក្រ្ត បានបង្ហាញការយល់ឃើញបែបនេះមកកាន់សារព័ត៌មានថ្មីៗលើការបោះពុម្ពប្រាក់រៀលជាប្លាស្ទិក ដោយជឿជាក់ថា បើក្រដាសប្រាក់រៀល មានទម្រង់ថ្មី មានគុណភាពល្អជាងមុន នោះមនុស្សម្នាក់ៗច្បាស់ជាចង់បាន ចង់កាន់ និងប្រើប្រាស់ប្រាក់រៀលជាមួយនឹងទំនុកចិត្តខ្ពស់។
« ជាពិសេស ធ្វើឱ្យអ្នកប្រើប្រាស់កាន់តែមានមោទកភាព ដោយលុយជាតិកម្ពុជា មានគុណភាព ដូចទៅនឹងលុយរបស់ប្រទេសជឿលឿនក្នុងពិភពលោក ផងដែរ។ ដូចជា៖ នៅប្រទេសអង់គ្លេស ប្រទេសកាណាដា និងអូស្រ្តាលី...ជាដើម។ ការព្រីន ឬបោះពុម្ពក្រដាសប្រាក់របស់ប្រទេសទាំងនោះ គឺនៅលើប្លាស្ទិកទាំងអស់។ «អ៊ីចឹង! ពលរដ្ឋខ្មែរម្នាក់ៗ គឺមានមោទកភាពដែលលុយជាតិរបស់យើងមានគុណភាពកម្រិតស្មើនឹងលុយប្រទេសមហាអំណាច និងប្រទេសជឿនលឿន»។ នេះជាការលើកឡើងរបស់សាស្ត្រចារ្យ ស៊ុន សុភ័ក្ត្រ។
សារៈសំខាន់មួយទៀតនៃការបោះពុម្ពប្រាក់ជាប្លាស្ទិក ដែលផលិតចេញពីសារធាតុPolymer នៅពេលប្រើប្រាស់រួចហើយ គឺអាចយកមកប្រើប្រាស់ឡើងវិញបាន(Recycle) ខុសពីក្រដាសប្រាក់ធម្មតាដែលប្រើហើយ រហែក ឬខូច ត្រូវតែកម្ទេចចោលទាំងម្តង។
ទាំងអស់នេះហើយ ជាផលប្រយោជន៍ដែលអ្នកជំនាញខាងលើ ក៏ដូចជាលោកស្រី ម៉ារ អមរា អនុប្រធាននាយកប្រតិបត្តិជាន់ខ្ពស់ និងជាគណៈប្រធាននាយិកាប្រតិបត្តិហិរញ្ញវត្ថុ និង គណៈប្រធាននាយិកាប្រតិបត្តិប្រតិបត្តិការ របស់ធនាគារអេស៊ីលីដា ដែលចង់ឱ្យមានការគិតគូរចំពោះការបោះពុម្ពប្រាក់រៀលជាប្លាស្ទិក។
លោកស្រី ម៉ារ អមរា អនុប្រធាននាយកប្រតិបត្តិជាន់ខ្ពស់ និងជាគណៈប្រធាននាយិកាប្រតិបត្តិហិរញ្ញវត្ថុ និង គណៈប្រធាននាយិកាប្រតិបត្តិប្រតិបត្តិការ របស់ធនាគារអេស៊ីលីដា
ក្នុងបទសម្ភាសជាមួយកម្មវិធីការឈ្វេងយល់អំពីប្រាក់រៀលជាមួយសារព័ត៌មានថ្មីៗ អ្នកជំនាញនៅក្នុងវិស័យធនាគារ និងហិរញ្ញវត្ថុរូបនេះបានបញ្ជាក់ថា៖ « ក្រដាសបោះពុម្ពលុយប្លាស្ទិកនេះ គឺជាប្រភេទ ក្រដាសPolymer ដែលយើងអាចប្រើប្រាស់ឡើងវិញបានរហូតដល់៥ដង»។ ដូច្នេះ សោភ័ណភាព និងគុណភាពក្រដាសប្រាក់ ជាធាតុសំខាន់ក្នុងការជំរុញពលរដ្ឋខ្មែរឱ្យចូលរួមប្រើប្រាស់ប្រាក់រៀលកាន់តែច្រើនផងដែរ។
យ៉ាងណាមិញ ជុំវិញពីគំនិតរបស់អ្នកខាងលើ លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៅរាជបណ្ឌិត្យសភាកម្ពុជា បានលើកឡើងថា កម្ពុជាមិនទាន់ដល់ពេលចាប់ផ្តើមបោះពុម្ពប្រាក់ជាប្លាស្ទិកនៅឡើយទេ។ លោកលើកឡើងបែបនេះ ដោយយល់ឃើញថាការបោះពុម្ពប្រាក់រៀលជាប្លាស្ទិក គឺរដ្ឋាភិបាលត្រូវបង្កើនការចំណាយច្រើនក្នុងការធ្វើពុម្ពថ្មី និងលើថ្លៃវត្ថុធាតុដើមសម្រាប់បោះពុម្ព។
លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ច នៅរាជបណ្ឌិត្យសភាកម្ពុជា
« បោះពុម្ពប្រាក់ជាប្លាស្ទិកនេះ នឹងធ្វើឱ្យថ្លៃដើមក្នុងការបោះពុម្ពសាច់ប្រាក់នោះគឺខ្ពស់ ខណៈពេលដែលយើងបោះហើយ តែប្រជាពលរដ្ឋយើងមិនទាន់សូវចាយលុយ។ ដូច្នេះហើយ ការលើកទឹកចិត្តទុកសាច់ប្រាក់មួយចំនួន ដើម្បីបង្វែរទៅជាការទំនុកបម្រុង ទៅការជួយចេញខាតថ្លៃការប្រាក់ និងសេវានានាសម្រាប់ប្រជាពលរដ្ឋដែលងាកមកប្រើប្រាស់ប្រាក់រៀលវិញ។ នោះខ្ញុំយល់ថា ហាក់ដូចជាមានសារសំខាន់ជាង។ យើងត្រូវជំរុញ លើកទឹកចិត្តឱ្យពលរដ្ឋប្រើប្រាស់ប្រាក់រៀលសិន ហើយនៅពេលប្រាក់រៀលត្រូវបានគេប្រើជាប្រចាំហើយវាឆាប់ខូច ឆាប់សឹក បានគេដូចមកប្រើប្រាស់ប្លាស្ទិកវិញ»៕
Tag:
ប្រាករៀល
© រក្សាសិទ្ធិដោយ thmeythmey.com
