ជម្លោះរវាងអុីស្រាអែល និងហាម៉ាស ដែលផ្ទុះឡើងចាប់តាំងពីថ្ងៃទី៧ ខែតុលា ឆ្នាំ២០២៣ នៅតែបន្ត ខណៈកិច្ចចរចារកបទឈប់បាញ់ មុនពេលពិធីបុណ្យរ៉ម៉ាឌន នៅតែមិនទាន់អាចទទួលបានជោគជ័យនៅឡើយ។ 

 

អាម៉េរិក កាតា និងអេហ្ស៊ីបបានចំណាយពេលជាច្រើនសប្តាហ៍ ដើម្បីជំរុញឱ្យមានបទឈប់បាញ់រវាងភាគីទាំងពីរ និងឱ្យក្រុមហាម៉ាសដោះលែងចំណាប់ខ្មាំងរហូតដល់ ៤០នាក់ជាថ្នូរនឹងបទឈប់បាញ់រយៈពេលប្រាំមួយសប្តាហ៍។ កិច្ចព្រមព្រៀងនេះ ក៏មានការដោះលែងអ្នកទោសប៉ាឡេស្ទីននៅអុីស្រាអែល និងបើកច្រកជំនួយបន្ថែមទៅតំបន់កាហ្សាផងដែរ។ 

 

មន្ត្រីអេហ្ស៊ីបពីររូប បាននិយាយថាការពិភាក្សាជុំចុងក្រោយបានបញ្ចប់នៅថ្ងៃទី៥ ខែមីនា។ ក្រុមហាម៉ាស បានដាក់សំណើថា ខ្លួននឹងមិនដោះលែងចំណាប់ខ្មាំងទាំងអស់ឡើយ លុះត្រាតែអុីស្រាអែលបញ្ឈប់ការវាយប្រហារ និងដកទ័ពចេញពីតំបន់កាហ្សា ហើយដោះលែងអ្នកទោសក្នុងចំនួនដ៏ច្រើន រួមទាំងក្រុមសកម្មប្រយុទ្ធជាន់ខ្ពស់ដែលត្រូវឃុំខ្លួនអស់មួយជីវិត។

 

«សន្តិសុខ និងសុវត្ថិភាពរបស់ប្រជាជនយើងបានសម្រេច លុះត្រាតែបទឈប់បាញ់ជាអចិន្ត្រៃយ៍ (មិនមែនតែ៦សប្តាហ៍) ការបញ្ចប់នៃការឈ្លានពាន និងការដកខ្លួនចេញពីគ្រប់ផ្នែកនៃកាហ្សា»។ មន្ត្រីជាន់ខ្ពស់ក្រុមហាម៉ាស លោក Osama Hamdan បានប្រាប់អ្នកសារព័ត៌មានបែបនេះនៅទីក្រុងបេរូត លីបង់ ក្នុងថ្ងៃទី៥ ខែមីនា។

 

ចំណែកនាយករដ្ឋមន្ត្រីអុីស្រាអែល លោក បេនចាមីន ណេតាន់យ៉ាហ៊ូ បានច្រានចោលការទាមទាររបស់ក្រុមហាម៉ាស ដោយប្តេជ្ញាម្តងហើយម្តងទៀតថានឹងបន្តសង្រ្គាមរហូតដល់ក្រុមហាម៉ាសបាត់វត្តមានចេញពីតំបន់កាហ្សា ហើយបញ្ជូនចំណាប់ខ្មាំងមកទាំងអស់។ ទន្ទឹមនឹងនេះ អុីស្រាអែលមិនបានបញ្ជូនគណៈប្រតិភូទៅជុំចរចាចុងក្រោយឡើយ។ 

 

ការមិនបញ្ជូនមន្រ្តីតំណាងទៅចរចានោះ អាចមកពីអុីស្រាអែលកំពុងទាមទារ និងរង់ចាំក្រុមហាម៉ាស ប្រគល់បញ្ជីចំណាប់ខ្មាំង។  តែក្រុមហាម៉ាស បានអះអាងថា បញ្ជីនោះ មិនពាក់ព័ន្ធទៅនឹងកិច្ចពិភាក្សានោះទេ ហើយចោទប្រកាន់អុីស្រាអែលថាជាលេសដើម្បីចៀសវាងចូលរួមក្នុងការចរចា។

 

លោក Benny Gantz សមាជិកនៃគណៈរដ្ឋមន្ត្រីសង្គ្រាមរបស់លោក ណេតាន់យ៉ាហ៊ូ និងជាគូប្រជែងនយោបាយដ៏សំខាន់ ក៏បានជួបជាមួយមន្ត្រីជាន់ខ្ពស់អាម៉េរិកក្នុងទីក្រុងវ៉ាស៊ីនតោន ដើម្បីដោះស្រាយបញ្ហានៅកាហ្សាផងដែរ។ ចំណែកអ្នកសម្រុះសម្រួល សង្ឃឹមថានឹងធ្វើកិច្ចព្រមព្រៀងមួយមុនពិធីបុណ្យរ៉ម៉ាឌន ដែលជាខែនៃការតមអាហារពីព្រឹកដល់ព្រលប់។

 

ពេលនេះ ប្រជាជនប៉ាឡេស្ទីន កំពុងត្រូវការជំនួយ និងស្បៀងអាហារយ៉ាងខ្លាំង ស្របពេលកុមារជាច្រើន ស្លាប់ដោយសារអត់អាហារ។ ចំណែកអាម៉េរិក នៅតែបន្តទម្លាក់ជំនួយស្បៀងអាហារតាមផ្លូវអាកាស៕