កីឡាជាតិ
ជាតិ
អ្នកចូលរួម Raid Amazones តំបន់អង្គរ ជាទូតសុច្ឆន្ទៈទេសចរណ៍ និងវប្បធម៌ខ្មែរ
× ព្រឹត្តិការណ៍កីឡាបែបឧបសគ្គ RAID Amazones នឹងរៀបចំធ្វើជាលើកទី៤ នៅប្រទេសកម្ពុជា នាទឹកដីអង្គរ ខេត្តសៀមរាប។ ព្រឹត្តិការណ៍កីឡា ដែលមានការចូលរួមសុទ្ធតែនារីពីតំបន់អឺរ៉ុបជិត៣០០នាក់ នឹងជួយផ្សព្វផ្សាយវប្បធម៍ប្រវត្តិសាស្រ្តខ្មែរ និងតំបន់ទេសចរណ៍ជុំវិញរមណីយដ្ឋានអង្គរ ទៅកាន់ពិភពលោក។
អ្នកចូលរួមជានារីមកពីទ្វីបអឺរ៉ុប ដែលភាគច្រើនជាជនជាតិបារាំង ជិត៣០០នាក់ នឹងបង្ហាញខ្លួននៅទឹកដីសៀមរាប ដើម្បីប្រកួតប្រជែងកីឡា Raid Amazones ដែលមានទាំងរត់ឆ្លងឧបសគ្គ ជិះកង់ ចែវទូក និងស្វែងរកកំណប់ ចាប់ពីថ្ងៃទី១៥ ដល់ថ្ងៃទី២០ ខែមីនា ឆ្នាំ២០២៤។
ក្នុងកិច្ចសម្ភាសជាមួយសារព័ត៌មានឌីជីថលថ្មីៗ លោក វ៉ាត់ ចំរើន អគ្គលេខាធិការគណកម្មាធិការអូឡាំពិកកម្ពុជា (NOCC) លើកឡើងថា អ្នកចូលរួមកីឡាបែបឧបសគ្គនៅតំបន់អង្គរនេះ ទាមទារឲ្យមានការយល់ដឹងច្រើនអំពីវប្បធម៍ប្រវត្តិសាស្រ្តខ្មែរ និងកម្លាំងថាមពលដើម្បីទ្រាំទ្រនឹងរដូវប្រាំងនៅកម្ពុជា។ ត្រូវដឹងពីវប្បធម៍ប្រវត្តិសាស្រ្តខ្មែរ ដើម្បីផ្តល់ភាពងាយស្រួលដល់អ្នកចូលរួម ក្នុងការប្រកួតជែង ជាពិសេសកម្មវិធីស្វែងរកកំណប់។
ដោយសារតែអ្នកចូលរួម Raid Amazones ទាមទារឱ្យមានការសិក្សាស្រាវជ្រាវពីវប្បធម៍ប្រវត្តិសាស្រ្តខ្មែរផង ទើបអគ្គលេខាធិការ NOCC ជឿជាក់ថា ស្ត្រីទាំងជិត៣០០នាក់នោះ នឹងក្លាយជាតួអង្គផ្សព្វផ្សាយពីតំបន់ទេសចរណ៍ វប្បធម៌ខ្មែរ និងអ្វីដែលកម្ពុជាមានទៅកាន់ប្រទេសពួកគេរៀងខ្លួន។
«ស្ត្រីជិត៣០០នាក់ដែលមានវត្តមានក្នុងកម្មវិធី RAID Amazones នៅទឹកដីអង្គរ នឹងក្លាយជាទូតសុច្ឆន្ទៈរបស់កម្ពុជា ក្នុងការផ្សព្វផ្សាយវប្បធម៍ ទេសចរណ៍ ជាពិសេសតំបន់បេតិកភណ្ឌកម្ពុជា ដែលពួកគេបានដឹង ទៅកាន់ប្រជាជនក្នុងប្រទេសពួកគេ»។ នេះជាការបញ្ជាក់របស់លោក វ៉ាត់ ចំរើន។
Raid Amazones បង្កើតឡើងដោយបុរសជនជាតិបារាំងឈ្មោះ Alexandre Debanne ដែលជានាយកប្រតិបត្តិទូរទស្សន៍ និងប្រព័ន្ធផ្សព្វផ្សាយ ZBO ក្នុងរយៈពេលជាង២០ឆ្នាំមកហើយ។ កម្មវិធីនេះ ធ្វើឡើងនៅតាមបណ្តាប្រទេសជាច្រើន ដោយនេះជាលើកទី៤ហើយសម្រាប់កម្ពុជាជាម្ចាស់ផ្ទះ ដែលរៀបចំឡើងនៅក្នុងទឹកដីអង្គរ។
កម្មវិធីកីឡាបែបឧបសគ្គនេះ ធ្វើឡើងក្នុងគោលបំណងលើកទឹកចិត្តស្ត្រី ថាពួកគេក៏អាចធ្វើការងារ និងចូលរួមព្រឹត្តិការណ៍កីឡាបានដូចបុរសដែរ៕
Tag:
(Raid Amazones
តំបន់អង្គរ)
© រក្សាសិទ្ធិដោយ thmeythmey.com