ជម្រើសជាតិ ត្រូវការតែអ្នកមានសមត្ថភាពទេ។ នេះជាសាររបស់លោក ហួត សេងទ្រី ដែលបានជំរុញឲ្យអត្ដពលិកប្រឹងដុសខាតសមត្ថភាពបន្ថែម ដើម្បីត្រៀមប្រកួតព្រឹត្តិការណ៍កីឡាជាតិ លើកទី៤ និងស៊ីហ្គេម ឆ្នាំ២០២៥ នៅប្រទេសថៃ។ 
 

ថ្លែងក្នុងពិធីបិទការប្រកួតជ្រើសរើសជើងឯកកីឡាប៊ីយ៉ាកម្ពុជា ឆ្នាំ២០២៣ កាលពីថ្ងៃទី១០ ខែមីនា ឆ្នាំ២០២៤ នៅ ក្លិប The Champion Snooker ប្រធាននាយកដ្ឋានរូបនេះ បាននិយាយដូច្នេះ៖«មានតែអ្នកមានសមត្ថភាពទេ ដែលអាច តំណាងកម្ពុជា ទៅចូលរួមបាន។ អ្នក ដែលមិនទាន់មានសមត្ថភាព ត្រូវហ្វឹកហាត់បន្ថែម។ ចំណែកអ្នកមានសមត្ថភាពឈ្នះគេ ហើយក៏មិនទាន់ បោះបង់ដែរ ត្រូវរក្សាតំណែង»។ 
  

សហព័ន្ធកីឡាប៊ីយ៉ាកម្ពុជា បានរៀបចំការប្រកួតជ្រើសរើសជើងឯក ឆ្នាំ២០២៤ ចាប់ពីថ្ងៃទី៨-១០ ខែមីនា ឆ្នាំ២០២៤។ លោក ម៉ារ៉ា សុជាតិ អគ្គលេខាធិការសហព័ន្ធកីឡាប៊ីយ៉ាកម្ពុជា បានសរសើរដល់ស្មារតីចូលរួមរបស់មន្ដ្រី និងកីឡាករ ដែលបានជួយឲ្យការប្រកួតនេះ ប្រព្រឹត្តទៅដោយឈរលើគោលការណ៍យុត្តិធម៌ និងគោរពតាមបទបញ្ជានៃការប្រកួត។
 

គួរបញ្ជាក់ថា ការប្រកួតជ្រើសរើសជើងឯកថ្នាក់ជាតិ ឆ្នាំ២០២៤ មានកីឡាករ ១៨នាក់ មកពី១២ក្លិបចូលរួម។ ក្រោយការប្រកួត៣ថ្ងៃនេះ អត្តពលិក កែវ រ៉ាវី ឈ្នះមេដាយមាស ។ ចំណែក ម៉ែន សុផានិត ជើងឯកឆ្នាំ២០២២ ដណ្ដើមបានត្រឹមមេដាយប្រាក់។ រីឯមេដាយសំរិទ្ធស្ទួន បានទៅលើកីឡាករ  ភួង សុភ័ក្ដ្រ និងកីឡាករ ឡេង ចន្ទគ្រីស្នា៕