ក្រសួងបរិស្ថាន បានចេញសេចក្ដីជូនដំណឹងនៅថ្ងៃទី១៤ ខែមីនា ដោយបញ្ជាក់ថា មួយរយៈចុងក្រោយនេះមានសកម្មភាពកាប់គាស់ រុករាន ឆ្ការដុត ឬការឈូសឆាយដីព្រៃក្នុងតំបន់ការពារធម្មជាតិធ្វើជាកម្មសិទ្ធិ។ សកម្មភាពទាងនេះ បានបំពាននឹងបទប្បញ្ញត្តិច្បាប់ជាធរមាន និងកំពុងបានប្រើប្រាស់ដីដែលកំពុងស្ថិតក្នុងដំណើរការនីតិវិធីរបស់ស្ថាប័នតុលាការ។
 

ជុំវិញរឿងនេះ ក្រសួងបានប្រាប់ឱ្យសមត្ថកិច្ចពាក់ព័ន្ធបញ្ឈប់ជាបន្ទាន់ ការចុះហត្ថលេខាលើលិខិត ឬឯកសារស្នើសុំ កាន់កាប់ ប្រើប្រាស់ដីធ្លី លិខិតទិញលក់ លិខិតផ្ទេរការកាន់កាប់ ឬការបញ្ជាក់លើប្លង់បង្ហាញទីតាំងដី ដែលស្ថិតក្នុងតំបន់ការពារធម្មជាតិ។ ក្នុងបរិបទនេះ សមត្ថកិច្ចពាក់ព័ន្ធគ្រប់គ្រងតំបន់ការពារធម្មជាតិទាំងអស់ ត្រូវបន្តអនុវត្តច្បាប់១០០ភាគរយ ដោយគ្មានការលើកលែងជាដាច់ខាត និងបញ្ចប់នូវវប្បធម៌ ធ្វើកិច្ចសន្យាហើយដោះលែងជនប្រព្រឹត្តបទល្មើស។ 
 

ក្រសួងបរិស្ថាន ព្រមានផ្តន្ទាទោសតាមបទប្បញ្ញត្តិច្បាប់ ចំពោះបុគ្គលដែលបានប្រព្រឹត្តអំពើកាប់គាស់ឬ ឈូសឆាយដីព្រៃ ដើម្បីធ្វើកម្មសិទ្ធិ។ ជាមួយគ្នានេះ បុគ្គលដែលរំលោភយកដីតំបន់ការពារធម្មជាតិ ត្រូវប្រគល់ដីដែលខ្លួនបានកាន់កាប់ទាំងនោះ ទៅកាន់សមត្ថកិច្ច ឬក្រសួងបរិស្ថានវិញដោយស្ម័គ្រចិត្ត និងឥតលក្ខខណ្ឌ។

នាពេលថ្មីៗនេះ អាជ្ញាធរខេត្តពោធិ៍សាត់ ឃាត់ខ្លួនបានមនុស្ស៤នាក់ ពាក់ព័ន្ធនឹងការទន្ទ្រានយកដីក្នុងតំបន់ការ ពារធម្មជាតិ ស្ថិតនៅភូមិសាស្រ្តស្រុកវាលវែង និងស្រុកភ្នំក្រវាញ ខេត្តពោធិ៍សាត់ចំនួន១៥០,៩៤ហិកតា។ បច្ចុប្បន្ន អាជ្ញាធរខេត្ត បានកសាងសំណុំរឿង និងបញ្ជូនជនសង្ស័យ១ករណី ទៅតុលាការ៕