ចេញពីក្លោងទ្វាមួយ ចូលក្លោងទ្វាមួយ , ពីប្រាសាទមួយ ទៅប្រាសាទមួយ ក្រុមស្ត្រីពាក់អាវព័ណ៌ក្រហមទាំងនោះ ឆ្លេឆ្លាចុះឡើង ដោយភ្នែករំពៃសម្លឹងមើលរូបចម្លាក់តាមជញ្ជាំង ដើម្បីពិនិត្យផ្ទៀងផ្ទាត់គ្នា ជាមួយរូបភាពលើក្រដាសសមួយសន្លឹក ដែលកាន់ជាប់នឹងដៃ។ ស្ត្រីស្បែកស ទាំងនេះ ពិតជាពិបាកយល់ណាស់ ចំពោះសំនួរ និងស្វែងយល់ចម្លើយ។
 

បើសួរស្ត្រីស្បែកសទាំងនេះថា នឿយហត់ទេ? ពិតណាស់ គឺពួកគេឆ្លើយថា ហត់! ពិបាកទេ ? ពិតណាស់ គឺពិបាក! ប៉ុន្តែបើសួរថា ខកចិត្តទេ? ពួកគេប្រាកដជាឆ្លើយថា មិនខកចិត្តនោះទេ ព្រោះកម្មវិធី Raid Amazones មួយនេះ បាននាំពួកគេឱ្យស្គាល់ពីប្រពៃណីវប្បធម៌កម្ពុជា លើសពីសកម្មភាពកីឡា តាមរយៈវិញ្ញាសាស្វែងរកកំណប់អាថ៌កំបាំងលើទឹកដីអង្គរនេះ។ ក្រៅពីស្វែងរកចម្លើយ កីឡាការិនី បានថតរូបភាពខ្លួនឯង (Selfie) និងក្រុម ភ្ជាប់ជាមួយទីប្រាសាទអង្គរវត្ត ប្រាសាទតាព្រហ្ម ប្រាសាទបាយ័ន ប្រាសាទបាភួន និងប្រាសាទគោលដៅផ្សេងៗទៀត។ បន្ថែមពីនេះ ពួកគេ ក៏បានស្វែងយល់ពីរសជាតិជីវិតតាមតំបន់ស្រុកស្រែចម្ការ ម្ហូបអាហារខ្មែរ និងផ្ទះបណ្ដែតទឹករបស់ប្រជាពលរដ្ឋ រស់នៅតាមដៃបឹងទន្លេសាបទៀតផង ។
 

ជាពលរដ្ឋខ្មែរម្នាក់ ដែលបានចូលរួមកម្មវិធី Raid Amazones នេះ កញ្ញា ទា កល្យាណ សកម្មភាពយ៉ាងខ្លាំង ក្នុងការស្វែងរកកំណប់អាថ៌កំបាំង ជាមួយជនបរទេសផ្សេងទៀត ដែលជាមិត្តរួមក្រុម។ វិញ្ញាសានេះ វាពិតជាពិបាកសម្រាប់ កល្យាណ និងមិត្តរួមក្រុម។ ដ្បិតពិបាក ហើយនឿយហត់ក្តី ប៉ុន្តែ កល្យាណ នៅតែគិតថា សកម្មភាពនៃការប្រកួតប្រជែងគ្នានេះ ពិតជាផ្ដល់ចំណេះដឹង និងបទពិសោធន៍ជីវិតបន្ថែមដល់ខ្លួន។ បើតាមកល្យាណ មិត្តរួមក្រុមខ្លួន ជាជនជាតិបរទេសនោះ ក៏ពេញចិត្តចំពោះកម្មវិធីនេះដែរ។

 
 

«មិនត្រឹមតែជាល្បែងកម្សាន្តមួយទេ តែធ្វើឱ្យពួកគាត់ (មិត្តបរទេស) បានយល់ដឹងពីវប្បធម៌យើងថែមទៀត» ។ នេះបើតាមកល្យាណ ដែលបានបន្ថែមថា មិត្តបរទេសរួមក្រុមខ្លួន បានព្យាយាមស្រាវជ្រាវស្វែងយល់ពីរូបចម្លាក់ និងរូបសក្ការៈនានា តាមលក្ខខណ្ឌកម្មវិធី។ 
 

ពេលវេលាចេះតែរំកិលទៅមុខ ព្រះសូរសែងបញ្ចេញរស្មី ប្របពីលើប្រាសាទ នាកណ្ដាលថ្ងៃត្រង់ ដែលជាសញ្ញាបង្ហាញថា សកម្មភាពរុករកកំណប់អាថ៌កំបាំង តាមរូបចម្លាក់ លើជញ្ជាំងថ្មប្រាសាទនេះ ក៏ដល់ពេលកំណត់ហើយ។ គ្មានឡើយ សំឡេងស្រែកហ៊ោអបអរជោគជ័យ ក្នុងវិញ្ញាសាកំណប់អាថ៌កំបាំងនេះទេ ។ វាបង្ហាញន័យគ្រប់គ្រាន់ហើយថា ក្រុមបេក្ខនារីទាំងអស់ មិនអាចសម្រេចបានលទ្ធផលឡើយ ប៉ុន្តែពួកគេ នៅតែមានស្នាមញញឹម ចំពោះការប្រឹងប្រែងរបស់ខ្លួន។ ក្រុមអ្នករៀបចំកម្មវិធី ក៏បានឱ្យសញ្ញាបញ្ចប់ការប្រកួតប្រជែង នៅម៉ោងជិត១២ថ្ងៃត្រង់ ដែលតម្រូវឱ្យបេក្ខនារី ឡើងលើរថយន្ត ត្រឡប់ទៅកាន់កន្លែងស្នាក់នៅវិញ៕