ជាតិ
នយោបាយជាតិ
សម្តេច ចៅសែន កុសល ឈុំ នៅតែជាប់ឈ្មោះជាអតីតនាយករដ្ឋមន្ត្រីដែលមានអាយុវែងជាងគេ
× ថ្វីដ្បិតតែសម្តេច ចៅសែន កុសល ឈុំ បានទទួលមរណភាពកាលពីថ្ងៃទី២២ ខែមករា ឆ្នាំ២០០៩ ទៅហើយក្តី ប៉ុន្តែរហូតមកពេលនេះ អតីតនាយករដ្ឋមន្ត្រីកម្ពុជារូបនេះ នៅស្ថិតក្នុងកំណត់ត្រាជាមេដឹកប្រទេសដែលមានអាយុវែងជាងគេលើពិភពលោកដដែល។
អ្នកនយោបាយដ៏ជិតស្និទ្ធជាមួយសម្តេចឪ នរោត្តម សីហនុ រូបនេះ បានធ្វើនាយករដ្ឋមន្ត្រីស្តីទីរបស់កម្ពុជា ចន្លោះពីថ្ងៃទី៦ ខែសីហា ដល់ថ្ងៃទី៦ ខែតុលា ឆ្នាំ១៩៦២ ហើយបានទទួលងារជាសម្តេចនៅក្នុងឆ្នាំ១៩៩៣ ។
អតីតប្រមុខរដ្ឋាភិបាល និងប្រធានសភារូបនេះ កើតនៅខេត្តមាត់ជ្រូក ទឹកដីកម្ពុជាក្រោម នាថ្ងៃទី៩ ខែកញ្ញា ឆ្នាំ១៩០៥ ហើយបានទទួលអនិច្ចកម្មនៅថ្ងៃទី ២២ ខែមករា ឆ្នាំ២០០៩ ពោលគឺសម្តេចមានអាយុ ១០៣ឆ្នាំ និង១៤៣ថ្ងៃ។ អាយុដ៏វែងនេះ បាននាំឲ្យលោករក្សាតំណែងជាអតីតប្រមុខរដ្ឋាភិបាល និងប្រមុខរដ្ឋ ដែលមានអាយុវែងជាងគេ។
អ្នកដែលឈរចំណាត់ថ្នាក់ទីពីរ គឺអតីតនាយករដ្ឋមន្ត្រី និងប្រធានាធិបតីតួកគី លោក Celal Bayar ដែលបានស្លាប់ក្នុងអាយុ១០៣ឆ្នាំ និង៩៨ថ្ងៃ ខណៈអតីតនាយករដ្ឋមន្ត្រី បារាំង លោក Antoine Pinay ស្លាប់ក្នុងអាយុ១០២ឆ្នាំ និង៣៤៨ថ្ងៃ រីឯព្រះអង្គម្ចាស់ Naruhiko Higashikuni អតីតនាយករដ្ឋមន្ត្រីជប៉ុន មានអាយុ១០២ឆ្នាំ និង៤៨ថ្ងៃ។
អតីតនាយករដ្ឋមន្ត្រីកម្ពុជាមួយរូបទៀត គឺលោក ឯក យីអ៊ុន។ តាមឯកសារ លោកកើតនៅឆ្នាំ១៩១០ ហើយទទួលមរណភាពនៅឆ្នាំ២០១៣ ប៉ុន្តែមិនមានការបញ្ជាក់ថ្ងៃខែច្បាស់លាស់ឡើយ។ ដូច្នេះលោក ឯក យីអ៊ុន មានអាយុចន្លោះពី១០២ ទៅ១០៣ឆ្នាំ ខណៈលោកកាន់តំណែងនាយករដ្ឋមន្ត្រីស្តីទីតែ៦ថ្ងៃប៉ុណ្ណោះ ចន្លោះពីថ្ងៃទី១១ ដល់ថ្ងៃទី១៧ ខែមករា ឆ្នាំ១៩៥៨ ។
បន្ទាប់ពីអតីតនាយករដ្ឋមន្ត្រីហូឡង់ Piet de Jong បានទទួលមរណភាពក្នុងអាយុ១០១ឆ្នាំកាលពីឆ្នាំ២០១៦ បច្ចុប្បន្ន អតីតថ្នាក់ដឹកនាំដែលអាចបំបែកកំណត់ត្រាសម្តេចចៅ សែនកុសលឈុំ បាននោះ រួមមាន អតីតនាយករដ្ឋមន្ត្រីវៀតណាម Do Muoi (កើតឆ្នាំ១៩១៧) អតីតនាយករដ្ឋមន្ត្រីស៊ូដង់ Babiker Awadalla (កើតឆ្នាំ១៩១៧) និងអតីតនាយករដ្ឋមន្ត្រីកូរ៉េខាងត្បូង Hyun Soong-jong (កើតឆ្នាំ១៩១៩)។
លោក នួន ជា អតីតនាយករដ្ឋមន្ត្រីស្តីទីនៃរបបកម្ពុជាប្រជាធិបតេយ្យ (ខែកញ្ញា ឆ្នាំ១៩៧៦ ដល់ខែមករា ឆ្នាំ១៩៧៧) ស្ថិតក្នុងចំណោមប្រមុខរដ្ឋាភិបាលដែលមានអាយុចំណាស់ជាងគេផងដែរ ដោយលោកបានកើតនៅថ្ងៃទី៧ ខែកក្កដា ឆ្នាំ១៩២៦ ដោយបច្ចុប្បន្នមានអាយុ៩១ឆ្នាំ៕
© រក្សាសិទ្ធិដោយ thmeythmey.com