ជាតិ
សម្ដេច ស ខេង បញ្ជាឲ្យទប់ស្កាត់បទល្មើសនៅតាមព្រំដែន ដែលធ្វើឲ្យប៉ះពាល់ដល់ការអភិវឌ្ឍ
× ភ្នំពេញ៖ សម្ដេច ស ខេង រដ្ឋមន្ត្រីក្រសួងមហាផ្ទៃ បានបញ្ជាទៅសេនាធិការផ្នែកសន្តិសុខជាតិ ក្នុងនោះអគ្គស្នងការដ្ឋាននគរបាលជាតិ អគ្គនាយកដ្ឋានអន្តោប្រវេសន៍ គណៈបញ្ជាការឯកភាពរដ្ឋបាលខេត្តជាប់ព្រំដែន និងអាជ្ញាធរពាក់ព័ន្ធ ឲ្យទប់ស្កាត់រាល់បទល្មើសនានានៅតាមខ្សែបន្ទាត់នៃបណ្ដោយព្រំដែន ក៏ដូចជាច្រកទ្វារចេញចូលប្រទេសទាំងបី។ បញ្ជារបស់សម្ដេច ស ខេង ធ្វើឡើងតាមរយៈសេចក្ដីណែនាំមួយស្ដីពី «ការពង្រឹងស្ថិរភាព សន្តិសុខ សណ្ដាប់ធ្នាប់តាមបណ្ដោយព្រំដែន»។
សម្ដេច ស ខេង បានលើកឡើងថា ទោះបីបច្ចុប្បន្នសភាពការណ៍សន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម នៅកម្ពុជា មានលក្ខណៈល្អប្រសើរ បង្កការអនុគ្រោះដល់ដំណើរការអភិវឌ្ឍលើគ្រប់វិស័យ ហើយនៅតាមបណ្តោយព្រំដែនមានសភាពការណ៍ស្ងប់ស្ងាត់ សន្តិភាព និងមិត្តភាពសហប្រតិបត្តិការ ជាមួយប្រទេសជិតខាងក្ដី ប៉ុន្តែជារឿយៗ តែងសង្កេតឃើញថា មានបាតុភូតកើតឡើងពាក់ព័ន្ធទៅនឹងបទល្មើសនៃការចេញចូលឆ្លងកាត់ព្រំដែនខុសច្បាប់។
រដ្ឋមន្ត្រីក្រសួងមហាផ្ទៃ បានបន្តថា បទល្មើសនៃការចេញចូលឆ្លងកាត់ព្រំដែនខុសច្បាប់ ជាបច្ច័យអាក្រក់អាចបង្កឲ្យមានអសន្តិសុខតំបន់ព្រំដែន ប៉ះពាល់ដល់មិត្តភាព និងសហប្រតិបត្តិការជាមួយប្រទេសជិតខាង និងការអភិវឌ្ឍសេដ្ឋកិច្ចកម្ពុជា។ រដ្ឋមន្ត្រីរូបនេះ សង្កត់ធ្ងន់ថា សេនាធិការផ្នែកសន្តិសុខជាតិ ត្រូវទប់ស្កាត់បទល្មើសទាំងនោះប្រកបដោយប្រសិទ្ធភាព។
សម្ដេច ស ខេង បន្ថែមថា ដើម្បីមានវិធានការទាន់ពេលក្នុងការទប់ស្កាត់ និងការបង្ក្រាបបទល្មើសគ្រប់ប្រភេទប្រកបដោយប្រសិទ្ធភាពនៅតាមព្រំដែន កម្លាំងសមត្ថកិច្ច ត្រូវបង្កើនវិធានការប្រមូលព័ត៌មានជាប្រចាំ ជាពិសេសបទល្មើសឆ្លងដែនដូចជា អំពើភេវកម្ម ការដឹកអាវុធគ្រឿងផ្ទុះ ការជួញដូរមនុស្ស គ្រឿងញៀន និងអនុផលព្រៃឈើខុសច្បាប់ ជាដើម។
រដ្ឋមន្ត្រីក្រសួងមហាផ្ទៃ បានប្រាប់ទៅកងម្លាំងសមត្ថកិច្ចខាងលើ ឲ្យពង្រឹងវិធានការត្រួតពិនិត្យការចេញចូលឆ្លងកាត់ព្រំដែនឲ្យបានហ្មត់ចត់ ប្រកបដោយប្រសិទ្ធភាពខ្ពស់ ជាពិសេសត្រូវលុបបំបាត់ច្រករបៀងព្រំដែនទាំងអស់នៅក្នុងភូមិសាស្ត្រទទួលខុសត្រូវរបស់ខ្លួន។ សម្ដេច ស ខេង បានបញ្ជាក់ចុងក្រោយថា ត្រូវបង្កើនកិច្ចសហប្រតិបត្តិការឲ្យកាន់តែជិតស្និទ្ធជាមួយប្រទេសជាប់ព្រំដែន ដើម្បីផ្លាស់ប្ដូរសភាពការណ៍ ដែលមានប្រព័ន្ធទំនាក់ទំនងទាន់ហេតុការណ៍ ដើម្បីដោះស្រាយកិច្ចការបន្ទាន់៕
Tag:
ស ខេង
ព្រំដែន
សន្តិសុខជាតិ
© រក្សាសិទ្ធិដោយ thmeythmey.com