ប្រទេសអឺរ៉ុបកណ្តាលពហិកាចូលរួមកិច្ចប្រជុំដោះស្រាយបញ្ហាជនអន្តោប្រវេសន៍ចុងសប្តាហ៍នេះ

អន្តរជាតិ

ប្រទេសអឺរ៉ុបកណ្តាលពហិកាចូលរួមកិច្ចប្រជុំដោះស្រាយបញ្ហាជនអន្តោប្រវេសន៍ចុងសប្តាហ៍នេះ

22, Jun 2018 , 10:19 pm

រូបភាព

រូបភាព AFP

ដោយ: ថ្មីៗ

រដ្ឋអឺរ៉ុបកណ្តាលមិនចូលរួមប្រជុំមួយជាមួយប្រទេសមេដឹកនាំអឺរ៉ុបផ្តោតលើវិបត្តិជនអន្តោប្រវេសន៍នៅក្រុងព្រុចសែលចុងសប្តាហ៍នេះទេ ដោយលើកហេតុផលថាកិច្ចប្រជុំនេះរៀបចំដោយគណៈកម្មការអឺរ៉ុបមិនមែនក្រុមប្រឹក្សាអឺរ៉ុបដែលជាស្ថាប័នកំពូលមានសម្រេចចិត្តទេ។ ប្រទេសទាំងនោះរួមមានហុងគ្រី ប៉ូឡូញ ស្លូវ៉ាគី និងសាធារណរដ្ឋឆែក។

មេដឹកនាំប្រទេសអឺរ៉ុបប្រាំបួនរួមទាំងអាល្លឺម៉ង់និងបារាំងផងនោះនឹងជួបប្រជុំគ្នាទ្រង់ទ្រាយតូចនៅក្រុងព្រុយសែលនៅង្ងៃអាទិត្យ ទី ២៤ ខែមិថុនានេះដើម្បីឈានទៅពិភាក្សាគ្នាលើការដោះស្រាយបញ្ហាជនអន្តោប្រវេសន៍អឺរ៉ុប និងកម្រិតការបម្លាស់ទីរបស់ប្រជាជនសុំសិទ្ធិជ្រកកោននៅអឺរ៉ុបផង។ កិច្ចប្រជុំនេះត្រូវរៀបចំឡើងមុនកិច្ចប្រជុំកំពូលសហភាពអឺរ៉ុបនឹងត្រូវចាប់ផ្តើមនៅសប្តាហ៍ក្រោយនេះដែរ។

យ៉ាងណាក៏ដោយ បើតាមការចុះផ្សាយរបស់ទីភ្នាក់ងារព័ត៌មាន AFP កិច្ចប្រជុំកម្រិតតូចដែលរៀបឡើងដោយគណៈកម្មការអឺរ៉ុបនេះ(European Commission) នឹងមិនមានការចូលរួមពីសំណាក់ មេដឹកនាំប្រទេសអឺរ៉ុបកណ្តាលឡើយ។ ប៉ូឡូញ ហុងគ្រី ស្លូវ៉ាគី និងឆែក នឹងពហិកាកិច្ចប្រជុំនេះ។

នាយករដ្ឋមន្ត្រីហុងគ្រីលោក Viktor Orban បានប្រកាសរួចរាល់ ខ្លួននឹងមេដឹកនាំប្រទេសប៉ូឡូញ ស្លូវ៉ាគី និងឆែកនឹងមិនចូលរួមកិច្ចប្រជុំកម្រិតតូចនេះ។ លោកបានអះអាងថា កិច្ចប្រជុំបែបនេះគឺតែត្រូវរៀបចំឡើងដោយក្រុមប្រឹក្សាអឺរ៉ុបដែលជាស្ថាប័នកំពូលដែលមានអំណាចសម្រេចចិត្ត មិនមែនគណៈកម្មការអឺរ៉ុបឡើយ។

ចំណែកនាយករដ្ឋមន្ត្រីប៉ូឡូញ Mateusz Morawiecki វិញបានអះអាងថា កិច្ចប្រជុំនៅថ្ងៃអាទិត្យនេះមិនមានអ្វីថ្មីឡើយ ហើយវាជារឿងមិនអាចទទួលយកបានឡើយដែលត្រូវទៅចូលរួមកិច្ចប្រជុំដែលផ្តោតលើសំណើរដដែលៗដែលប្រទេសលោកបដិសេធរួចទៅហើយនោះ។

ក្រៅពីនេះ មេដឹកនាំប្រទេសអូទ្រីសលោកអធិការបតី Sebastian Kurz ក៏បានប្រកាសពីជំហររបស់ខ្លួនប្រឆាំងជនអន្តោប្រវេសន៍ដូចប្រទេសអឺរ៉ុបកណ្តាលបួនខាងលើដែរ។ លោកបានសង្កត់ធ្ងន់ថា អឺរ៉ុបត្រូវតែជាតំបន់ដែលមានសមត្ថភាពការពារប្រទេសសមាជិកជាពិសេសត្រូវពង្រឹងការគ្រប់គ្រងព្រំដែន និងការពារប្រជាជននៅក្នុងតំបន់។ អូទ្រីស និងប្រទេសបួនខាងលើតែងមានជំហររ៉ឹងត្អឹងចំពោះបញ្ហាជនអន្តោប្រវេសន៍ ហើយក៏បន្តបដិសេធរាល់សំណើរបស់មេដឹកនាំអឺរ៉ុបក្នុងការបែងចែកបន្ទុកទទួលយកជនភៀសខ្លួនក្នុងចំណោមរដ្ឋសមាជិកសហភាអឺរ៉ុបផងដែរ។

ដោយឡែកក្នុងកិច្ចប្រជុំកំពូលអឺរ៉ុបថ្ងៃ២៨ ដល់ថ្ងៃ ២៩ ខែមិថុនាខាងមុខនេះ សមាជិកសហភាពអឺរ៉ុបទាំង ២៨ នឹងពិភាក្សាគ្នាពីបញ្ហាជនអន្តោប្រវេសន៍ ជាពិសេសំណើររបស់លោកស្រី អេនជេឡា មឺហ្គែល ក្នុងការកំណត់យកគោលនយោបាយបែងចែកបន្ទុកទទួលយកជនភៀសខ្លួន និងអន្តោប្រវេសន៍នេះផង។

លោកស្រី មឺហ្គែល ដែលកំពុងដឹកនាំរដ្ឋាភិបាលចម្រុះជាមួយបក្ស Christian Social Union (CSU) សង្ឃឹមថា រដ្ឋសមាជិកនឹងមានការប្តេជ្ញាចិត្តក្នុងការកម្រិតការធ្វើដំណើររបស់ប្រជាជនស្វែងរកសិទ្ធិជ្រកកោនក្នុងតំបន់អឺរ៉ុបផងដែរ។ លោកស្រីកំពុងរងសម្ពាធខ្លាំងផងពីនយោបាយក្នុងស្រុកក្នុងការជំរុញឲ្យមានការប្រឹងប្រែងបន្ថែមពីសមាជិកអឺរ៉ុបក្នុងការដោះស្រាយបញ្ហាជនអន្តោប្រវេសន៍នេះ។

បក្ស CSU បានបញ្ជាក់រួចហើយថា ខ្លួននឹងហាមអាល្លឺម៉ង់ទទួលយកប្រជាជនសុំសិទ្ធិជ្រកកោនដែលទទួលបានការចុះឈ្មោះនៅរដ្ឋអឺរ៉ុបផ្សេងទៀតទេ បើសិនជាកិច្ចប្រជុំខាងមុខគ្មានការឯកភាពគ្នាចែករម្លែកបន្ទុកដ៏ធ្ងន់នេះទេ។

យ៉ាងណាក៏ដោយ គេវាយតម្លៃថា ភាគរយតិចណាស់ដែលសមាជិកសហភាពអឺរ៉ុបទាំងនេះឈានដល់ឯកភាពគ្នាទទួលសំណើរដ៏ធំមួយនេះ។