ជាតិ
សង្គមជាតិ
យូនីសេហ្វ៖«ឪពុក ជាធនធានអភិវឌ្ឍកុមារដ៏ល្អបំផុត ដែលមិនទាន់ប្រើប្រាស់អស់លទ្ធភាពនៅឡើយ»
× ក្នុងពេលដែលប្រទេសជាច្រើនលើពិភពលោកកំពុងប្រារព្ធទិវាឪពុក យូនីសេហ្វ បានដាក់ដំណើរការគេហទំព័រថ្មីមួយ «ស្ដីពីការចិញ្ចឹមបីបាច់កូន» ដើម្បីឱ្យឪពុកអាចរំលែកបទពិសោធនៃបិតាភាពពួកគេ។ គេហទំព័រនេះ នឹងប្រមូលផ្ដុំការចែករំលែកដំបូន្មានពីការចិញ្ចឹមបីបាច់កូន ឧបសគ្គចម្បងនានា តម្រូវការ និងភាពជោគជ័យក្នុងការចិញ្ចឹមបីបាច់ថែរក្សាកូន របស់ឪពុកជុំវិញពិភពលោក។
ដើម្បីអបអរសាទរទិវាឪពុក ដែលត្រូវបានប្រារព្ធឡើងក្នុងប្រទេសប្រហែល ៩០ នៅក្នុងខែមិថុនានេះ យូនីសេហ្វ បានដាក់ឱ្យដំណើរការគេហទំព័រថ្មីមួយ ស្ដីពីការចិញ្ចឹមបីបាច់កូន (parenting) ដែលជាផ្នែកមួយនៃយុទ្ធនាការ «ឪពុកដ៏អស្ចារ្យ (Super Dads)» ដើម្បីទទួលស្គាល់តួនាទីឪពុក ក្នុងការអភិវឌ្ឍកូនតូចរបស់ពួកគេ។
បណ្ឌិត Pia Britto ប្រធានផ្នែកអភិវឌ្ឍកុមារតូចរបស់យូនីសេហ្វ មានប្រសាសន៍ក្នុងសេចក្តីប្រកាសព័ត៌មានថា ឪពុក គឺជាធនធានដ៏ល្អបំផុតដើម្បីអភិវឌ្ឍកុមារ ហើយបើសិនជាចង់ផ្ដល់ឱ្យកុមារនូវការចាប់ផ្ដើមល្អបំផុតក្នុងជីវិត គេត្រូវទទួលស្គាល់ និងប្រើប្រាស់តួនាទី (ឪពុក) នេះឱ្យអស់លទ្ធភាព។
តាមយូនីសេហ្វ គេហទំព័រស្ដីពីការចិញ្ចឹមបីបាច់កូននេះ នឹងប្រមូលផ្ដុំឪពុកជុំវិញពិភពលោក មកចែករំលែកដំបូន្មានពីការចិញ្ចឹមបីបាច់កូន ឧបសគ្គចម្បងនានា តម្រូវការ និងភាពជោគជ័យរបស់ពួកគេ។ គេហទំព័រនេះ ក៏នឹងមាន «ថ្នាក់ជំនាញខ្នាតតូចអំពីការចិញ្ចឹមបីបាច់កូន»ជាលើកដំបូងផងដែរ។
យុទ្ធនាការ «ឪពុកដ៏អស្ចារ្យ» មានគោលបំណង រំឭកប្រាប់ឪពុកម្ដាយនៅគ្រប់ទីកន្លែងថា នៅពេលឪពុកថែរក្សាកូនតូចរបស់ពួកគេអំឡុងឆ្នាំដំបូងបង្អស់នៃជីវិត តាមរយៈការផ្ដល់សេចក្ដីស្រឡាញ់ និងការការពារ ការលេងជាមួយពួកគេ និងការមើលខុសត្រូវលើអាហារូបត្ថម្ភរបស់ពួកគេ នោះកូនៗរបស់ពួកគេ នឹងរៀនសូត្របានប្រសើរ មិនសូវមានបញ្ហាផ្នែកឥរិយាបថ និងក្លាយជាមនុស្សប្រកបដោយសុខភាពមាំមួន និងសប្បាយរីករាយ។
បើទោះជា ឪពុកមានតួនាទីយ៉ាងសំខាន់ក្នុងការអភិវឌ្ឍន៍កុមារ យ៉ាងណាក៏ដោយ ប៉ុន្តែបណ្ឌិត Britto ក៏សង្កេតឃើញដែរថា នៅមិនទាន់មានការវិនិយោគគ្រប់គ្រាន់ ទៅលើការគាំទ្រ ដែលឪពុកត្រូវការជាបន្ទាន់ ដើម្បីអនុវត្ត និងក្លាយជាឪពុកល្អបំផុត តាមលទ្ធភាពដែលពួកគេអាចធ្វើបាននៅឡើយ។ ដូច្នេះហើយក្នុងទិវានេះ យូនីសេហ្វ បានអំពាវនាវសារជាថ្មី ដើម្បីលុបបំបាត់ឧបសគ្គផ្នែកវប្បធម៌ និងហិរញ្ញវត្ថុ ដែលរារាំងឪពុក ពីការចំណាយពេលវេលាដ៏មានតម្លៃជាមួយនឹងកូនតូចៗរបស់ពួកគេ។ បណ្ឌិត Britto បន្ថែមថា៖«ពុំមានពេលណា ដែលសំខាន់សម្រាប់ការអភិវឌ្ឍខួរក្បាល ស្មើរយៈពេល១០០០ថ្ងៃដំបូង នៃជីវិតកុមារឡើយ»៕
(ឧបត្ថម្ភដោយ ៖ បេប៊ី អោតឡេត ជាហាងលក់សម្ភារទារក កុមារ និងស្ត្រីមានផ្ទៃពោះធំជាងគេបង្អស់នៅកម្ពុជា)
Tag:
អប់រំ
ឪពុក
កុមារ
© រក្សាសិទ្ធិដោយ thmeythmey.com