ទៅលេងអឺរ៉ុប នៅកោះពេជ្រ! ពិព័រណ៍អឺរ៉ុបលើកដំបូងនៅកម្ពុជា នាចុងខែមិថុនានេះ

ជាតិ

សេដ្ឋកិច្ច

ទៅលេងអឺរ៉ុប នៅកោះពេជ្រ! ពិព័រណ៍អឺរ៉ុបលើកដំបូងនៅកម្ពុជា នាចុងខែមិថុនានេះ

23, Jun 2018 , 10:00 pm

រូបភាព

ដោយ: សារព័ត៌មានថ្មីៗ

ភ្នំពេញ៖ ពិព័រណ៍អឺរ៉ុប (EuroFair) នឹងត្រូវរៀបចំឡើងជាលើកដំបូងនៅកម្ពុជា ដើម្បីជំរុញសន្ទុះប្រើប្រាស់ផលិតផលអឺរ៉ុបនៅកម្ពជា។ កម្មវិធីដែល ត្រូវបានរៀបចំដោយសភាពាណិជ្ជកម្មអឺរ៉ុបនៅកម្ពុជា (EuroCham Cambodia) នេះ នឹងបើកឲ្យចូលទស្សនាដោយសេរី ចាប់ពីថ្ងៃទី២៩ខែមិថុនា ដល់ថ្ងៃទី១ខែកក្កដាឆ្នាំនេះ នៅមជ្ឈមណ្ឌលពិព័រណ៍កោះពេជ្រអគារ K និង L។

ដើម្បីជំរុញសកម្មភាពពាណិជ្ជកម្មរវាងកម្ពុជា និងសហគមន៍អឺរ៉ុប ការតាំងផលិតផលអឺរ៉ុបម៉ាកល្បីៗ ត្រូវរៀបចំឡើង។ ប្រធាន EuroCham Cambodia លោក Arnaud DARC បានថ្លែងដូច្នេះថា៖«ជាឱកាសដ៏អស្ចារ្យតែម្ដងសម្រាប់ពលរដ្ឋកម្ពុជា ក៏ដូចជាសហគមន៍ធុរកិច្ចក្នុងតំបន់ទាំងមូល ដើម្បីពិនិត្យគុណភាពទំនិញ និងសេវាកម្មរបស់ក្រុមហ៊ុនអឺរ៉ុប ដែលនឹងមានវត្តមានក្នុងកម្មវិធីនេះ។ លោកបន្តទៀតថា៖«ដោយសារតែសេដ្ឋកិច្ចកម្ពុជានៅតែបន្តកើនឡើង យើងជឿជាក់ថាផលិតផលអឺរ៉ុបនឹងដណ្ដើមបានទីតាំងនៅលើទីផ្សារកម្ពុជា»។

ក្រុមហ៊ុនប្រមាណ ៤០ មកពីអឺរ៉ុបនឹងដាក់បង្ហាញផលិតផលរបស់ខ្លួន ដែលមានដូចជា គ្រឿងសង្ហារឹម ទំនិញប្រើប្រាស់ គ្រឿងម៉ាស៊ីន បរិក្ខារពេទ្រ ឱសថ សេវាកម្មហិរញ្ញវត្ថុ ចំណីអាហារ និងភេសជ្ជ ជាដើម។ ការលក់បញ្ចុះតម្លៃ និងសកម្មភាពកម្សាន្តជាច្រើន នឹងផ្ដល់ជូនសម្រាប់អ្នកចូលទស្សនា។ មនុស្សជាងមួយម៉ឺននាក់ ត្រូវបានរំពឹងថានឹងចូលរួមក្នុងកម្មវិធីនេះ។

កម្មវិធីលើកដំបូងរបស់សហភាពអឺរ៉ុបនៅកម្ពុជាមួយនេះ នឹងត្រូវធ្វើឡើងមិនត្រឹមតែឆ្លើយតបនឹងតម្រូវការរបស់អ្នកជំនួញនោះទេ តែអ្នករៀបចំបានអះអាងថាកម្មវិធីនេះនឹងទាញការចាប់អារម្មណ៍បែបលក្ខណៈគ្រួសារផងដែរ។

ថ្លែងក្នុងសន្និសីទកាសែតស្ដីពីពិព័រណ៍អឺរ៉ុប នៅថ្ងៃទី២២ខែមិថុនា លោក Arnaud DARC អះអាងថា កម្ពុជាត្រូវបានជ្រើសរើសជាប្រទេសដំបូងគេក្នុងតំបន់អាស៊ាន ដើម្បីរៀបចំពិព័រណ៍អឺរ៉ុបនេះឡើង។ លោកបន្ថែមថា បន្ទាប់ពីកម្មវិធីដំបូងធ្វើឡើងនៅឆ្នាំ២០១៨នេះ EuroFair នឹងត្រូវធ្វើឡើងក្នុងរយៈពេល២ឆ្នាំទៀត ពោលគឺ EuroFair ត្រូវរៀបចំនៅកម្ពុជាក្នុងរយៈពេលពីរឆ្នាំម្ដង ។

រដ្ឋមន្ត្រីក្រសួងពាណិជ្ជកម្មរបស់កម្ពុជា នឹងអញ្ជើញជាអធិបតីក្នុងកម្មវិធីសម្ពោធបើក EuroFair នេះ។ ហើយកម្មវិធី ដែលត្រូវបានរៀបចំដោយ EuroCham Cambodia នេះ ត្រូវបានឧបត្ថមដោយក្រុមហ៊ុន Cambodia Airports និងគាំទ្រដោយគណៈប្រតិភូសហភាពអឺរ៉ុបប្រចាំកម្ពុជា ព្រមទាំងមានការចូលរួមពីសហភាពាណិជ្ជកម្មរបស់ប្រទេសមួយចំនួននៃសហគមន៍អឺរ៉ុប៕