កីឡាជាតិ
ជាតិ
ហេតុផល៣យ៉ាងជំរុញឲ្យ ចាន់ វឌ្ឍនាកា សម្រេចត្រឡប់មករួមរស់ជាមួយបឹងកេតសាជាថ្មី
×![]()
ខ្សែប្រយុទ្ធឆ្នើមកម្ពុជា ចាន់ វឌ្ឍនាកា បានសម្រេចត្រឡប់មករួមរស់ជាមួយក្លិបបឹងកេតសាជាថ្មី នៅពាក់កណ្តាលរដូវឆ្នាំ២០១៨ ក្រោយប្រកបអាជីពនៅក្រៅប្រទេសជាងមួយរដូវកាលកន្លងមកនេះ។ ខ្សែប្រយុទ្ធរូបនេះបានបញ្ជាក់ថា មានហេតុផលសំខាន់៣យ៉ាង ដែលជំរុញឲ្យរូបគេសម្រេចរួមរស់ជាមួយបឹងកេត ហើយបដិសេធជាមួយក្លិបនៅក្រៅប្រទេស។ ចំណែកអ្នកស្រី ពុធ ធីតា ប្រធានក្លិបបឹងកេតបាននិយាយថា ការសម្រេចរបស់ វឌ្ឍនាកា ដោយសារបេះដូងរបស់គេនៅជាមួយបឹងកេត។
ទីបំផុតពាក្យចចាមអារ៉ាមនិងចម្ងល់របស់មហាជនពីអនាគតក្លិបរបស់ខ្សែប្រយុទ្ធឆ្នើម ចាន់ វឌ្ឍនាកា ត្រូវបានលាតត្រដាងបន្ទាប់ពីក្លិបបាល់ទាត់បឹងកេតរៀបចំសន្និសីទសារព័ត៌មានបង្ហាញមុខកីឡាករ ចាន់ វឌ្ឍនាកា ជាផ្លូវការនៅថ្ងៃទី២៣ មិថុនា ឆ្នាំ២០១៨នេះ។ ការសម្រេចចុះកិច្ចសន្យាលេងឲ្យក្លិបបឹងកេតនៅជើងទី២របស់ វឌ្ឍនាកា ដោយសាររូបគេឃើញចំណុចសក្តានុពលមួយចំនួនរបស់ក្លិបបឹងកេត និងការរីកចម្រើននៃវិស័យកីឡាបាល់ទាត់នាពេលបច្ចុប្បន្ន។
«សម្រាប់ខ្ញុំមានកត្ត៣ចំណុច គឺទី១សក្តានុពលរបស់លីគបាល់ទាត់កម្ពុជាមានក្រុមដែលអាចប្រកួតប្រជែងគ្នាបានច្រើន, ទី២ថ្នាក់ដឹកនាំមានឆន្ទៈខ្ពស់ក្នុងការដឹកនាំក្លិបបាល់ទាត់នៅកម្ពុជា និងទី៣ក្លិបទាំងមូលមានឆន្ទៈខ្ពស់ក្នុងការចង់ឈ្នះពានលីគកំពូល៣រដូវកាលជាប់គ្នា»។ នេះជាការបង្ហាញហេតុផលរបស់កីឡាករ ចាន់ វឌ្ឍនាកា ដែលសម្រេចមករួមរស់ជាមួយបឹងកេត ក្រោយបដិសេធទៅលេងជាមួយក្លិបនៅក្រៅប្រទេស។
ឆ្លើយនឹងសំនួររបស់អ្នកសារព័ត៌មានដែលសួរថា តើបឹងកេតមានយុទ្ធសាស្ត្រពិសេសបែបណាក្នុងការទាក់ទាញ វឌ្ឍនាកា ឲ្យមកចូលរួមជាមួយបឹងកេត? អ្នកស្រី ពុធ ធីតា ប្រធានក្លិបថ្មីរបស់បឹងកេតបានបញ្ជាក់ថា៖«និយាយរួមទៅដោយសារ វឌ្ឍនាកា មានបេះដូងនៅជាមួយក្លិបបឹងកេតស្រាប់ ជាហេតុធ្វើឲ្យយើងងាយស្រួលនិយាយតាមនឹងដែរ ព្រោះគាត់ចង់លេងឲ្យបឹងកេត បើគាត់មិនចង់ក៏ពិបាកដែរ»។ នេះជាការលើកឡើងរបស់អ្នកស្រី ពុធ ធីតា។
ពាក់ព័ន្ធជាមួយកិច្ចសន្យា លោក បែ មករា អ្នកចាត់ការទូទៅក្លិបបឹងកេតបានបញ្ជាក់ថា ការចូលរួមសាជាថ្មីរបស់កីឡាករ ចាន់ វឌ្ឍនាកា ជាមួយបឹងកេតលើកនេះ គ្មានការចុះកិច្ចសន្យាថ្មីនោះទេដោយសាររូបគេជាកីឡាកររបស់ក្លិបនេះស្រាប់។ ហើយការចូលរួមរបស់គេ គឺផ្តោតតែក្នុងជើងទី២នៃរដូវកាលឆ្នាំ២០១៨ តែប៉ុណ្ណោះ។
«តាមពិតទៅ វឌ្ឍនាកា ជាកីឡាកររបស់បឹងកេត។ ពីមុនយើងឲ្យគាត់ជាអ្នកសម្រេចចិត្តក្នុងជ្រើសរើសក្លិប ដោយសារយើងចង់ឲ្យគាត់វិវត្តខ្លួនឲ្យកាន់តែប្រសើរ។ បច្ចុប្បន្នគាត់លេងឲ្យបឹងកេត ហើយបើរដូវកាលក្រោយគាត់ចង់នៅបន្តជាមួយបឹងកេតគាត់អាចនៅបាន តែបើសិនគាត់ចង់សាកល្បងនៅក្រៅប្រទេសម្តងទៀត យើងនឹងតាមគំនិតរបស់គាត់»។ ជាការលើកឡើងរបស់លោក បែ មករា ដែលបានបន្ថែមថា វត្តមានរបស់ វឌ្ឍនាកា ធ្វើឲ្យបឹងកេតមានជម្រើសកាន់តែច្រើនក្នុងការប្រយុទ្ធ ពិសេសធ្វើឲ្យតំបន់ប្រយុទ្ធរបស់បឹងកេតកាន់តែមុតស្រួច។
តាមរយៈបទពិសោធលេងឲ្យក្លិបបរទេសជាង១រដូវកាលកន្លងមកនេះ ធ្វើឲ្យខ្សែប្រយុទ្ធជំនាញឆ្វេងខាងលើមានទំនុកចិត្តថា រូបគេនឹងអាចជួយបឹងកេតទទួលបានលទ្ធផលល្អប្រសើរនៅរដូវកាលឆ្នាំ២០១៨។ ក្រោយផ្ទេរពីក្លិបក្របខណ្ឌទី៣ជប៉ុន Fujeida My FC កាលពីដើមរដូវកាលឆ្នាំ២០១៨ កីឡាករ ចាន់ វឌ្ឍនាកា បានចុះកិច្ចសន្យារយៈពេល១ឆ្នាំលេងក្លិបក្របខណ្ឌកំពូលម៉ាឡេស៊ី Pahang FA។ តែរូបគេត្រូវបានចែកផ្លូវជាមួយក្លិបនេះក្រោយបង្ហាញខ្លួនបានពាក់កណ្តាលរដូវកាល។
ក្រោយចាកចេញពីក្លិប Pahang FA មានពាក្យចចាមអារ៉ាមថា រូបគេត្រូវបានក្លិបលីគកំពូលសិង្ហបុរី Home United និងក្លិបថៃ Chiangrai United ចរចារូបគេឲ្យទៅលេងនៅជើងទី២នេះ។ ប៉ុន្តែ វឌ្ឍនាកា បានចេញមុខច្រានចោលចំពោះព័ត៌មាននេះ៕
Tag:
បាល់ទាត់
ចាន់ វឌ្ឍនាកា
បឹងកេត
បែ មករា
© រក្សាសិទ្ធិដោយ thmeythmey.com
