អ្នកចាំទី ស៊ូ យ៉ាទី ដែលរងរបួសភ្លាត់សរសៃពួរសាច់ដុំភ្លៅ បន្តអវត្តមានជាមួយបឹងកេត នាជំនួបតទល់ជាមួយណាហ្គាវើល ដើម្បីប្រជែងដណ្តើមកំពូលតារាងនៅម៉ោង៦:៣០នាទីល្ងាចនេះ នាពហុកីឡដ្ឋានជាតិ។ គ្រូបង្វឹកណាហ្គាវើល មិនត្រឹមតែមិនបង្ហាញក្តីកង្វល់សម្រាប់ការវិលមកជួបបឹងកេត ថែមទាំងអះអាងថា បានមើលឃើញពីចំណុចខ្សោយរបស់ក្រុមនេះទៀតផង។
លោក ហៅ សុជាតិ គ្រូបង្វឹកក្រុមបឹងកេតបានអះអាងថា អ្នកចាំទី ស៊ូ យ៉ាទី មិនអាចជួយក្រុមបឹងកេតក្នុងជំនួបដ៏សំខាន់នៅល្ងាចនេះបានទេ ដោយសាររបួសភ្លាត់សរសៃពួរសាច់ដុំភ្លៅមិនទាន់ធូរស្បើយ១០០ភាគរយ។ អ្នកចាំទីដៃទី១ ស៊ូ យ៉ាទី បានរងរបួសភ្លាត់សរសៃពួរសាច់ដុំភ្លៅខាងក្រោយ និងដាច់សរសៃតូចៗកំភ្លួនជើងពេលព្យាយាមទាត់បាល់ចេញពីមុខទីឡើងទៅលើ នាជំនួបបឹងកេតយកឈ្នះព្រះខ័នរាជស្វាយរៀង ៣-១ កាលពីថ្ងៃទី២០ ខែឧសភា ឆ្នាំ២០១៨។
ក្រុមបឹងកេតត្រូវបើកទ្វារពហុកីឡដ្ឋានជាតិស្វាគមន៍ក្រុមណាហ្គាវើល នាការប្រកួតបញ្ចប់ជើងទី១នៃពានរង្វាន់មិត្តហ្វូនខេមបូឌានលីគននៅម៉ោង៦:៣០នាទីល្ងាចថ្ងៃទី២៤ ខែមិថុនា ឆ្នាំ២០១៨នេះ។ ការប៉ះគ្នារវាងក្រុមទាំងពីរល្ងាចនេះ នឹងក្លាយជាជំនួបមួយដ៏តានតឹងនិងទាក់ទាញបំផុតសម្រាប់ទស្សនិកជន ព្រោះជាប្រកួតដើម្បីប្រជែងដណ្តើមឈរកំពូលតារាង។ បច្ចុប្បន្នណាហ្គាវើលឈរកំពូលតារាងមានមាន២៥ពិន្ទុ ខណៈបឹងកេតឈរលេខរៀងទី២មាន២៤ពិន្ទុ។
បើមើលពីប្រវត្តិជួបក្រុមខ្លាំងៗរបស់ក្រុមទាំងពីរ បឹងកេតបានយកឈ្នះព្រះខ័នរាជស្វាយរៀង ៣-១ យកឈ្នះភ្នំពេញក្រោន ៣-២ និងស្មើ ១-១ ជាមួយវិសាខា។ ចំណែកណាហ្គាវើលបញ្ចប់ដោយគ្មានការស៊ុតបាល់បញ្ចូលទីជាមួយព្រះខ័នរាជស្វាយរៀង ឈ្នះភ្នំពេញក្រោន ១-០ តែចាញ់វិសាខា ៣-០។
យ៉ាងណាមិញ លោក មាស ចាន់ណា គ្រូបង្វឹកណាហ្គាវើលបាននិយាយថា លោកមិនមានការព្រួយបារម្ភនោះទេសម្រាប់ជួបជាមួយបឹងកេតនៅល្ងាចនេះ ដោយសារកូនក្រុមមានការយល់ចិត្តគ្នា និងយល់ពីបំណងរបស់លោក។ អ្វីដែលសំខាន់គ្រូបង្វឹករូបនេះអះអាងថា លោកបានមើលឃើញពីចំណុចខ្សោយរបស់ក្រុមបឹងកេត។
«ការជួបជាមួយបឹងកេត យើងមិនបារម្ភអីប៉ុន្មានទេ ដោយសារកីឡាករខ្ញុំយល់ដឹងពីទម្រង់លេង និងមានការយល់ចិត្តគ្នាក្នុងការលេង ពិសេសពួកគាត់យល់ពីទម្រង់លេងរបស់ខ្ញុំ។ យើងក៏ឃើញពីចំណុចលេងរបស់បឹងកេតដែរ ប៉ុន្តែយើងមិនទាន់អាចប្រាប់ថា យើងត្រូវលេងជាមួយគេយ៉ាងម៉េចនោះទេ ព្រោះបញ្ហានេះវាទាក់ទងនឹងយុទ្ធសាស្ត្រក្រុម»។ នេះជាការបញ្ជាក់របស់លោក មាស ចាន់ណា ដែលបានបន្ថែមថា ទោះមិនសង្ឃឹមឈ្នះ១០០ភាគរយ ក៏សង្ឃឹមបានត្រឹមស្មើដែរ។
មុនជំនួបដ៏ជក់ចិត្តខាងលើនេះមកដល់ ក៏មានការប្រកួតចំនួនពីរទៀតផងដែរ ក្នុងនោះក្រុមអគ្គស្នងការនគរបាលជាតិតទល់ជាមួយក្រសួងការពារជាតិនាវេលាម៉ោង៣:៣០នាទីនៅពហុកីឡដ្ឋានជាតិ។ នេះក៏ជាជំនួបជក់ចិត្តផងដែរ ព្រោះក្រុមទាំងពីរត្រូវការឈ្នះដូចគ្នា ដើម្បីប្រជែងដណ្តើមឈរតំបន់ Top 4។ បច្ចុប្បន្នក្រសួងការពារជាតិឈរលេខរៀងទី៤មាន១៨ពិន្ទុ រីឯអគ្គស្នងការនគរបាលជាតិឈរលេខរៀងទី៦មាន១៧ពិន្ទុ។
ចំណែកក្រុមកំពុងឈរតំបន់ក្រហមអគ្គិសនីកម្ពុជាបើកទ្វារកីឡដ្ឋានអគ្គិសនីកម្ពុជាទទួលស្វាគមន៍ភ្ញៀវអាស៊ីអឺរ៉ុបដែលកំពុងឈរលេខរៀងទី៧ នាវេលាម៉ោង៣រសៀល៕