អន្តរជាតិ
លោក ស៊ី ប្រាប់រដ្ឋមន្ត្រីការពារជាតិអាមេរិក៖«ចិនមិនឃ្លានទឹកដីគេ ហើយក៏មិនអាចឲ្យបាត់ដីខ្លួនមួយអ៊ីញដែរ»
× ប្រមុខរដ្ឋនិងជាមេដឹកនាំដ៏មានឥទ្ធិពលខ្លាំងបំផុតរបស់ចិនលោក ស៊ី ជិនភីង បានបញ្ជាក់ប្រាប់ប្រមុខការពារជាតិអាមេរិកថា ចិនគ្មានចេតនាបង្កបញ្ហា ឬចលាចលដល់ពិភពលោកឡើយ។ ប៉ុន្តែលោកបានប្រាប់អាមេរិកចាំថា ក្នុងនាមមហាអំណាចមួយ ចិនមិនបណ្តោយឲ្យបាត់ទឹកដីសូម្បីតែមួយអ៊ីញ ហើយក៏មិនចង់បានដីរបស់គេដែរ។
ជំនួបផ្លូវការរវាង លោក ស៊ី និងរដ្ឋមន្ត្រីការពារជាតិអាមេរិកលោក ជេម ម៉ាធីស ធ្វើឡើងនៅវិមានប្រជាជនចិននាក្រុងប៉េកាំង នៅថ្ងៃពុធទី ២៧ ខែមិថុនា។ ចំណែកវត្តមានលោក ម៉ាធីស នៅចិនក៏ជាផ្នែកមួយនៃដំណើរទស្សនកិច្ចផ្លូវការនៅតំបន់អាស៊ីដែរ។
បើតាមការចុះផ្សាយរបស់ទីភ្នាក់ងារព័ត៌មាន AFP ក្នុងជំនួបទល់មុខនេះ លោក ស៊ី បានព្យាយាមបកស្រាយប្រាប់ប្រមុខការពារជាតិអាមេរិកពីចេតនា និងការរះត្រដែតឡើងរបស់មហាអំណាចចិននាពេលបច្ចុប្បន្ន។ លោកធានាថា ចេតនារបស់ចិនគឺ ល្អ ស្រលាញ់សន្តិភាព និងមិនបង្កភាពចលាចលដល់តំបន់ និងពិភពលោកឡើយ។
អ្វីដែលគួរឲ្យកត់សម្គាល់នោះ មេដឹកនាំដែលគេចាត់ទុកថាមានឥទ្ធិពលខ្លាំងបំផុតបន្ទាប់លោកពីម៉ៅ សេទុងនេះក៏បានប្រាប់តំណាងរដ្ឋបាលក្រុងវ៉ាស៊ីនតោនត្រង់ៗដែរថា អាមេរិក និងចិនត្រូវទុករឿងខ្វែងគំនិតគ្នាមួយឡែកនិងសម្រេចប្រយោជន៍រួមទើបបាន។
ប៉ុន្តែបើទោះជាមេដឹកនាំចិនចង់មានទំនាក់ទំនងល្អ និងកិច្ចសហប្រតិបត្តិការជាមួយអាមេរិកក្តី លោក ស៊ី បានឆ្លៀតបញ្ជក់ប្រាប់លោក ម៉ាធីសដែរថា រឿងបញ្ហាទឹកដីជារឿងដោយឡែក ហើយអាមេរិកមិនបាច់សង្ឃឹមថា ចិននឹងធ្វើសម្បទានណាមួយជុំវិញបញ្ហាទឹកដីឡើយ។
«យើងមិនបានបាត់បង់ដីដែលបន្សល់ទុកមកពីដូនតាសូម្បីតែមួយអ៊ីញ។ អ្វីដែលជារបស់អ្នកដទៃ យើងក៏មិនចង់បានដូចគ្នា»។ នេះជាសម្តីរបស់លោក ស៊ី និយាយទៅកាន់លោក ម៉ាធីស។
យ៉ាងណាក៏ដោយចុះ ប្រធានាធិបតីចិនរូបនេះមិនបានបញ្ជាក់ឲ្យច្បាស់ថា លោកចង់សំដៅលើទឹកដីណាមួយឡើយ ប៉ុន្តែគេអាចយល់បានថា លោកចង់សំដៅលើដែនជម្លោះសមុទ្រចិនខាងត្បូងដ៏រ៉ាំរ៉ៃនិងបញ្ហាកោះតៃវ៉ាន់ដែលចិនចាត់ទុកជាអាណាខេត្តខ្លួនដែរ។
ជម្លោះសមុទ្រចិនខាងត្បូងកាន់តែក្តៅ និងតានតឹង ដោយសារអាមេរិកបន្តទិតៀនចិនរឿងបន្តគឃ្លើនសម្ញែងសាច់ដុំយោធានៅសមុទ្រចិនខាងត្បូងមិនខ្វល់អ្នកដទៃជាពិសេសការបន្តធ្វើយោធូបនីកម្ម និងដំឡើងអាវុធនៅតំបន់ជម្លោះជាថ្មីទៀតថ្មីៗនេះ។ លោក ម៉ាធីស ខ្លួនឯងនោះក៏តែងតែរិះគន់ចិនដូចគ្នា ហើយលោកបានចាត់ទុកចិនជាគូប្រជែងយុទ្ធសាស្ត្រ និងជាការគំរាមកំហែងសន្តិសុខធំបំផុតរបស់អាមេរិកផង។ ឆ្លើយតបនឹងការពង្រាយអាវុធនេះ អាមេរិកបានសម្រេចលុបចោលការអញ្ជើញចិនឲ្យចូលរួមក្នុងសមយុទ្ធយោធាកងទ័ពជើងទឹកវិញ ដែលសកម្មភាពនេះធ្វើឲ្យចិនអាក់អន់ចិនដែរ។
ស្កាត់មកជួបមេដឹកនាំចិនពេលនេះ លោក ម៉ាធីស ក៏ចង់សួរនាំចិនផងដែររឿងពង្រាយសព្វាវុធទៅកាន់ជម្លោះសមុទ្រចិនខាងត្បូង បើទោះជារឿងស្នូលគឺមកសុំឲ្យចិនជំរុញការសាយនុយក្លេអ៊ែរកូរ៉េខាងជើងក្តី។ អាមេរិកសង្ឃឹមថា ចិននឹងបន្តតួនាទី និងប្រើប្រាស់ឥទ្ធិពលដ៏សម្បើមរបស់ខ្លួនដើម្បីដាក់សម្ពាធលើក្រុងព្យុងយ៉ាងឲ្យគោរពការសន្យារំសាយនុយក្លេអ៊ែរដែលធ្វើឡើងពេលជួបលោក ដូណាល់ ត្រាំ នៅសិង្ហបុរីនោះ។
មុនជួបជាមួយលោក ស៊ី លោក ម៉ាធីស ក៏បានជជែកពិភាក្សាជាមួយសមភាគីចិនលោក Wei Fenghe ដែរ ដោយក្នុងជំនួបនោះមន្ត្រីជាន់ខ្ពស់ចិនក៏បានបញ្ជាក់ឡើងវិញពីគោលជំហររបស់ខ្លួនលើបញ្ហាតំបន់ដូចជាសមុទ្រចិនខាងត្បូង កូរ៉េខាងជើង និងតៃវ៉ាន់ដែរ។ ប៉ុន្តែភាគីទាំងពីរបានកត់សម្គាល់ពីសារសំខាន់នៃទំនាក់ទំនងនិងកិច្ចសហប្រតិបត្តិការល្អផ្នែកយោធារវាងភាគីទាំងពីរ។ មូលដ្ឋានគ្រឹះនៃទំនាក់ទំនងមហាអំណាចទាំងពីរគឺបញ្ចៀសភាពតានតឹងឬប្រឈមមុខគ្នា និងពង្រឹងទំនាក់ទំនងបន្ថែមដោយឈរលើគោលការណ៍គោរពផលប្រយោជន៍គ្នាទៅវិញទៅមក។
ពាក់ព័ន្ធនឹងរឿងតៃវ៉ាន់ របបដឹកនាំក្រុងប៉េកាំងនៅតែមានមន្ទិលសង្ស័យចំពោះចេតនាអាមេរិកដែលនៅបន្តផ្គត់ផ្គង់សព្វាវុធដល់កោះដែលខ្លួនចាត់ទុកជាអាណាខេត្តនោះ។ ខណៈដែលលោក ម៉ាធីស ស្ថិតនៅប៉េកាំង នាវាចម្បាំងចិននៅបន្តធ្វើសមយុទ្ធយោធាត្រៀមប្រយុទ្ធរៀងរាល់ថ្ងៃអស់រយៈពេលយ៉ាងតិចមួយសប្តាហ៍ហើយនៅក្បែរដែនទឹកតៃវ៉ាន់។ ក្រៅពីនេះកងទ័ពអាកាសចិនក៏បន្តធ្វើលំហាត់យោធាញឹកញាប់ដែរក្នុងគោលដៅគំរាមកោះតៃវ៉ាន់៕
Tag:
ចិន
ស៊ី ជិនភីង
ជេម ម៉ាធី
សមុទ្រចិនខាងត្បូង
កូរ៉េខាងជើង
© រក្សាសិទ្ធិដោយ thmeythmey.com